ಬಿಎಫ್‌ಸಿ ಡ್ರಾ

ಬೆಂಗಳೂರು : ಅತ್ಯಂತ ರೋಚಕವಾಗಿ ಮೂಡಿಬಂದ ಪಂದ್ಯದಲ್ಲಿ ಆತಿಥೇಯ ಬೆಂಗಳೂರು ಎಫ್‌ಸಿ ತಂಡ ಅಪಾಯಕಾರಿ ಮುಂಬಯಿ ಸಿಟಿ ಎಫ್‌ಸಿ ವಿರುದ್ಧ ಡ್ರಾ ಫಲಿತಾಂಶಕ್ಕೆ ತೃಪ್ತಿಪಟ್ಟಿತು.

ಇಲ್ಲಿನ ಶ್ರೀ ಕಂಠೀರವ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಇಂಡಿಯನ್‌ ಸೂಪರ್‌ ಲೀಗ್‌ನ 5ನೇ ಆವೃತ್ತಿಯ 53ನೇ ಪಂದ್ಯದಲ್ಲಿ ಬೆಂಗಳೂರು ಎಫ್‌ಸಿ 1-1 ಗೋಲ್‌ಗಳಿಂದ ಮುಂಬಯಿ ಎದುರು ಸಮಬಲ ಸಾಧಿಸಿ, ಪ್ರಸಕ್ತ ಲೀಗ್‌ನಲ್ಲಿ ತನ್ನ ಅಜೇಯ ಓಟವನ್ನು ಮುಂದುವರಿಸಿದೆ. ಬಿಎಫ್‌ಸಿ ಈವರೆಗೆ ಆಡಿದ 10 ಪಂದ್ಯಗಳಲ್ಲಿ 7 ಜಯ ದಾಖಲಿಸಿದ್ದು, 3ರಲ್ಲಿ ಡ್ರಾಗೆ ತೃಪ್ತಿಪಟ್ಟು ಸೋಲಿಲ್ಲದ ಸರದಾರನಂತೆ ಅಂಕಪಟ್ಟಿಯ ಅಗ್ರಸ್ಥಾನ ಕಾಯ್ದುಕೊಂಡಿದೆ.

ಬಿಎಫ್‌ಸಿ ಪರ ಯುವ ಪ್ರತಿಭೆ ಉದಾಂತ ಸಿಂಗ್‌ (23ನೇ ನಿಮಿಷ) ಗೋಲ್‌ ದಾಖಲಿಸಿ ಆರಂಭದಲ್ಲೇ ಗೆಲುವಿನ ವಿಶ್ವಾಸ ತುಂಬಿದ್ದರು. ಆದರೆ, 31ನೇ ನಿಮಿಷದಲ್ಲಿ ಚೆಂಡನ್ನು ಗುರಿ ಮುಟ್ಟಿಸಿದ ಮುಂಬಯಿನ ಸ್ಟ್ರೈಕರ್‌ ಮೊಡೌ ಸೌಗೌ ಆತಿಥೇಯರ ಸಂಭ್ರಮವನ್ನು ಮೊಟಕುಗೊಳಿಸಿದರು.

ಮುಂಬಯಿ ತಂಡದ ಸೆಹನಾಜ್‌ ಸಿಂಗ್‌ 2 ಬಾರಿ ಹಳದಿ ಕಾರ್ಡ್‌ ಪಡೆದ ಕಾರಣ ರೆಡ್‌ ಕಾರ್ಡ್‌ ಶಿಕ್ಷೆಗೆ ಗುರಿಯಾಗಬೇಕಾಯಿತು. ಇದರಿಂದಾಗಿ 10 ಆಟಗಾರರೊಂದಿಗೆ ಹೋರಾಡುವಂತಾದರೂ ಪ್ರವಾಸಿ ತಂಡ ಆತಿಥೇಯರಿಗೆ ಗೆಲುವಿನ ಗೋಲ್‌ ದಾಖಲಿಸುವ ಅವಕಾಶ ನೀಡದೆ ಗಮನ ಸೆಳೆಯಿತು.