ಚೋಪ್ರಾ ಹೆಸರು ಖೇಲ್‌ ರತ್ನಗೆ ಶಿಫಾರಸು

ಹೊಸದಿಲ್ಲಿ : ಕಳೆದ ವರ್ಷ ಏಷ್ಯನ್‌ ಗೇಮ್ಸ್‌ನಲ್ಲಿ ಚಿನ್ನದ ಪದಕ ಗೆದ್ದಿದ್ದ ಭಾರತದ ಮುಂಚೂಣಿ ಜಾವೆಲಿನ್‌ ಥ್ರೋ ಪಟು ನೀರಜ್‌ ಚೋಪ್ರಾ ಅವರ ಹೆಸರನ್ನು ಭಾರತೀಯ ಅಥ್ಲೆಟಿಕ್ಸ್‌ ಒಕ್ಕೂಟ ಪ್ರಸಕ್ತ ಸಾಲಿನ ಪ್ರತಿಷ್ಠಿತ ರಾಜೀವ್‌ ಗಾಂಧಿ ಖೇಲ್‌ ರತ್ನ ಪ್ರಶಸ್ತಿಗೆ ಶಿಫಾರಸು ಮಾಡಿದೆ. ಇವರ ಹೆಸರನ್ನು ಕಳೆದ ವರ್ಷವೂ ಖೇಲ್‌ ರತ್ನಕ್ಕೆ ಶಿಫಾರಸು ಮಾಡಲಾಗಿತ್ತು. ಆದರೆ ಕೊನೆಯಲ್ಲಿ ಅರ್ಜುನ ಪ್ರಶಸ್ತಿಗೆ ಪರಿಗಣಿಸಲಾಗಿತ್ತು. ಇದೇ ವೇಳೆ, ಏಷ್ಯನ್‌ ಗೇಮ್ಸ್‌ ಚಿನ್ನದ ಪದಕ ವಿಜೇತರಾದ ತೇಜಿಂದರ್‌ ಪಾಲ್‌ ಸಿಂಗ್‌ ತೂರ್‌ (ಶಾಟ್‌ ಪುಟ್‌), ಅರ್ಪಿಂದರ್‌ ಸಿಂಗ್‌ (ಟ್ರಿಪಲ್‌ ಜಂಪ್‌), ಮನ್‌ಜೀತ್‌ ಸಿಂಗ್‌ (800 ಮೀಟರ್‌) ಮತ್ತು ಸ್ವಪ್ನ ಬರ್ಮನ್‌ (ಹೆಪ್ಟಾಥ್ಲಾನ್‌) ಹಾಗೂ 100 ಮತ್ತು 200 ಮೀಟರ್‌ ರೇಸ್‌ನಲ್ಲಿ ಬೆಳ್ಳಿ ಗೆದ್ದಿದ್ದ ದುತೀ ಚಾಂದ್‌ ಹೆಸರುಗಳನ್ನು ಅರ್ಜುನ ಪ್ರಶಸ್ತಿಗೆ ಶಿಫಾರಸು ಮಾಡಲಾಗಿದೆ.
ಅರ್ಜುನಗೆ ಅಮಿತ್‌ ಹೆಸರು
ಭಾರತೀಯ ಬಾಕ್ಸಿಂಗ್‌ ಒಕ್ಕೂಟ (ಬಿಎಫ್‌ಐ) 2018ರ ಏಷ್ಯನ್‌ ಗೇಮ್ಸ್‌ ಚಾಂಪಿಯನ್‌ ಅಮಿತ್‌ ಪಂಘಾಲ್‌ ಅವರನ್ನು ಅರ್ಜುನ ಪ್ರಶಸ್ತಿಗೆ ಶಿಫಾರಸು ಮಾಡಿದೆ. ಬ್ಯಾಂಕಾಕ್‌ ಏಷ್ಯಾ ಬಾಕ್ಸಿಂಗ್‌ ಚಾಂಪಿಯನ್‌ಷಿಪ್‌ನಲ್ಲಿ ಅಮಿತ್‌ ಪಂಘಾಲ್‌ ದಕ್ಷಿಣ ಕೊರಿಯಾ ಬಾಕ್ಸರ್‌ ವಿರುದ್ಧ (52 ಕೆಜಿ ವಿಭಾಗ) ಮೇಲುಗೈ ಸಾಧಿಸಿ ಚಿನ್ನದ ಪದಕಕ್ಕೆ ಕೊರಳೊಡ್ಡಿದ್ದರು.