ಇಬ್ಬರು ಮಕ್ಕಳ ಕರುಣಿಸಿ ಗೆಳತಿ ಕೈ ಹಿಡಿಯುತ್ತಿರುವ ಮೆಸ್ಸಿ

ಹೊಸದಿಲ್ಲಿ: ಜಗತ್ತಿನ ಅತ್ಯಂತ ಬೇಡಿಕೆಯ ಫುಟ್ಬಾಲ್ ಆಟಗಾರ ಅರ್ಜೆಂಟೀನಾದ ಲಿಯೊನೆಲ್ ಮೆಸ್ಸಿ ಅವರು ತಮ್ಮ ಬಾಲ್ಯದ ಗೆಳತಿ ಹಾಗೂ ದೀರ್ಘ ಕಾಲದ ಜೊತೆಗಾರ್ತಿ ಆಂಟೋನೆಲ್ಲಾ ರೊಕ್ಕಝೊ (Antonella Roccuzzo) ಮದುವೆಯಾಗುತ್ತಿದ್ದಾರೆ.

ಶುಕ್ರವಾರ ತವರೂರು ರೋಸರಿಯೊದಲ್ಲಿ ನಡೆಯಲಿರುವ ವಿವಾಹ ಸಮಾರಂಭದಲ್ಲಿ ಮೆಸ್ಸಿ-ಆಂಟೋನೆಲ್ಲಾ ಜೋಡಿಯ ಇಬ್ಬರು ಮಕ್ಕಳು ಹಾಜರಾಗುತ್ತಿರುವುದು ವಿಶೇಷವೆನಿಸಿದೆ.

ಕಾಲ್ಚೆಂಡಿನ ಆಟದಲ್ಲಿ ಇಡೀ ವಿಶ್ವವನ್ನೇ ಬೆರಗುಗೊಳಿಸಿರುವ ಮೆಸ್ಸಿ, ಮದುವೆ ವಿಚಾರದಲ್ಲಿ ಮಾತ್ರ ನಾಚಿಕೆಪಟ್ಟುಕೊಳ್ಳುತ್ತಿದ್ದರು. ಆದರೂ ತಮ್ಮ ಕುಟುಂಬದ ಮೇಲೆ ಅಪಾರ ಪ್ರೀತಿಯನ್ನಿಟ್ಟುಕೊಂಡಿರುವ 30ರ ಹರೆಯದ ಮೆಸ್ಸಿ ಬಾಲ್ಯದ ಗೆಳತಿಗೆ ಕಂಕಣ ಭಾಗ್ಯವನ್ನು ನೀಡಲಿದ್ದಾರೆ.

29ರ ಹರೆಯದ ಆಂಟೋನೆಲ್ಲಾ ಸಂಬಂಧದಲ್ಲಿ ಮೆಸ್ಸಿಗೆ ಟಿಯಾಗೊ ಹಾಗೂ ಮ್ಯಾಟೆಯೊ ಎಂಬ ಹೆಸರಿನ ಇಬ್ಬರು ಗಂಡು ಮಕ್ಕಳಿದ್ದಾರೆ. ಇವರಿಬ್ಬರಿಗೆ ಆಂಟೋನೆಲ್ಲಾಅನುಕ್ರಮವಾಗಿ 2012 ಮತ್ತು 2015ರಲ್ಲಿ ಜನ್ಮವಿತ್ತಿದ್ದರು.

ಸಿಟಿ ಸೆಂಟರ್ ರೋಸರಿಯೊದಲ್ಲಿನ ಪಂಚ ತಾರಾ ಹೋಟೆಲ್‌ನಲ್ಲಿ ಮೆಸ್ಸಿ ಮದುವೆ ನೆರವೇರಲಿದೆ. ಹಾಗೆಯೇ ಮಾಜಿ ಹಾಗೂ ಸಹ ಆಟಗಾರರು ಸೇರಿದಂತೆ 250ರಷ್ಟು ಆಪ್ತ ಆತಿಥಿಗಳು ಭಾಗವಹಿಸುವ ನಿರೀಕ್ಷೆಯಿದೆ.

ಮೆಸ್ಸಿ ಹಾಗೂ ಆಂಟೋನೆಲ್ಲಾ ನಡುವಣ ಸಂಬಂಧ 5ರ ಹರೆಯದಿಂದಲೇ ಆರಂಭಿಸಿತ್ತು. ಹಾಗೆಯೇ ಆಪ್ತ ಸಂಬಂಧವನ್ನು ಕಾಪಾಡಿಕೊಂಡು ಬಂದಿದ್ದರು. ಇದೀಗ ಮದುವೆ ಉಡುಗೊರೆಯನ್ನು ಲಿಯೊ ಮೆಸ್ಸಿ ಫೌಂಡೇಷನ್‌ಗೆ ನೀಡುವಂತೆ ವಿನಂತಿಸಲಾಗಿದೆ.