ಪ್ರಶಸ್ತಿ ಸುತ್ತಿಗೆ ಜೊಕೊವಿಕ್‌

ನಂ.1 ಆಟಗಾರನಿಗೆ ಸಾಟಿಯಾಗದ ರಾಬೆರ್ಟೊ ಬಟಿಸ್ಟಾ

Vijaya Karnataka Web

ಲಂಡನ್‌: ವಿಶ್ವದ ನಂ.1 ಆಟಗಾರ ಸರ್ಬಿಯಾದ ನೊವಾಕ್‌ ಜೊಕೊವಿಕ್‌ ವಿಂಬಲ್ಡನ್‌ ಗ್ರ್ಯಾನ್‌ ಸ್ಲಾಮ್‌ ಟೆನಿಸ್‌ ಟೂರ್ನಿಯ ಪುರುಷರ ಸಿಂಗಲ್ಸ್‌ ವಿಭಾಗದಲ್ಲಿ ನಿರೀಕ್ಷೆಯಂತೆ ಫೈನಲ್‌ ಪ್ರವೇಶಿಸಿದ್ದಾರೆ. ಜುಲೈ 14ರಂದು ಫೈನಲ್‌ ನಡೆಯಲಿದೆ.

ಆಲ್‌ ಇಂಗ್ಲೆಂಡ್‌ ಕ್ಲಬ್‌ನ ಸೆಂಟರ್‌ ಕೋರ್ಟ್‌ನಲ್ಲಿ ಶುಕ್ರವಾರ ನಡೆದ ಮೊದಲ ಸೆಮಿಫೈನಲ್‌ನಲ್ಲಿ ಕಳೆದ ಬಾರಿಯ ಚಾಂಪಿಯನ್‌ ಜೊಕೊವಿಕ್‌ 6-2, 4-6, 6-3, 6-2 ಸೆಟ್‌ಗಳಿಂದ 23ನೇ ಶ್ರೇಯಾಂಕದ ಆಟಗಾರ ಸ್ಪೇನ್‌ನ ರಾಬೆರ್ಟೊ ಬಟಿಸ್ಟಾ ವಿರುದ್ಧ ಪ್ರಯಾಸದ ಜಯ ಗಳಿಸಿದರು.

ಎರಡು ಗಂಟೆ 49 ನಿಮಿಷಗಳ ಕಾಲ ನಡೆದ ನಾಲ್ಕು ಸೆಟ್‌ಗಳ ಕದನದಲ್ಲಿ ಜೊಕೊವಿಕ್‌ ಆರಂಭಿಕ ಸೆಟ್‌ ಗೆದ್ದು ಶುಭಾರಂಭ ಮಾಡಿದರು. ಆದರೆ, ದ್ವಿತೀಯ ಸೆಟ್‌ನಲ್ಲಿ ಬಟಿಸ್ಟಾ ತಿರುಗೇಟು ನೀಡಿದರು. ಆದರೆ, ಮುಂದಿನ ಎರಡೂ ಸೆಟ್‌ಗಳಲ್ಲಿ ಭರ್ಜರಿ ಮುಂಗೈ ಮತ್ತು ಹಿಂಗೈ ಹೊಡೆತಗಳ ಮೂಲಕ ಗಮನ ಸೆಳೆದ ಜೊಕೊವಿಕ್‌ ಎದುರಾಳಿಯ ಎಲ್ಲ ಸವಾಲುಗಳನ್ನು ಮೆಟ್ಟಿ ನಿಂತರು.

ಇತಿಹಾಸ ಸೃಷ್ಟಿಸುವತ್ತ ಹ್ಯಾಲೆಪ್‌, ಸೆರೆನಾ

ಇಂದು ರೊಮೇನಿಯಾದ ಸಿಮೊನಾ ಹ್ಯಾಲೆಪ್‌ ಮತ್ತು ಅಮೆರಿಕದ ಸೆರೆನಾ ವಿಲಿಯಮ್ಸ್‌ ನಡುವೆ ಮಹಿಳೆಯರ ಸಿಂಗಲ್ಸ್‌ ಫೈನಲ್‌ ನಡೆಯಲಿದ್ದು, ಹೊಸ ಚರಿತ್ರೆಯೊಂದು ನಿರ್ಮಾಣವಾಗಲಿದೆ. ಒಂದು ವೇಳೆ, ಸೆರೆನಾ ಗೆದ್ದರೆ 8ನೇ ವಿಂಬಲ್ಡನ್‌ ಹಾಗೂ ಒಟ್ಟಾರೆ 24ನೇ ಗ್ರ್ಯಾನ್‌ ಸ್ಲಾಮ್‌ ಗೆದ್ದ ಅಪೂರ್ವ ಸಾಧನೆಗೆ ಭಾಜನರಾಗಲಿದ್ದಾರೆ. ಅಕಸ್ಮಾತ್‌ ಹ್ಯಾಲೆಪ್‌ ಗೆದ್ದರೆ ಅದು ಅವರ ಪಾಲಿಗೆ ಚೊಚ್ಚಲ ವಿಂಬಲ್ಡನ್‌ ಪ್ರಶಸ್ತಿ ಎನಿಸಿಕೊಳ್ಳಲಿದೆ. ಜತೆಗೆ ವೃತ್ತಿ ಬದುಕಿನ 2ನೇ ಗ್ರ್ಯಾಮ್‌ ಸ್ಲಾಮ್‌ ಪ್ರಶಸ್ತಿಯೂ ಆಗಲಿದೆ.