ಜೊಕೊವಿಚ್‌ಗೆ ಸಾಟಿಯಾಗದ ಮಿಲ್ಮನ್

ನ್ಯೂಯಾರ್ಕ್: ಪ್ರತಿಷ್ಠಿತ ಅಮೆರಿಕನ್ ಓಪನ್ 2018 ಗ್ರ್ಯಾನ್‌ಸ್ಲಾಮ್ ಟೆನಿಸ್ ಟೂರ್ನಮೆಂಟ್‌ನಲ್ಲಿ ಸೆರ್ಬಿಯಾದ ನೊವಾಕ್ ಜೊಕೊವಿಚ್ ಸೆಮಿಫೈನಲ್‌ಗೆ ಪ್ರವೇಶಿಸಿದ್ದಾರೆ.

ಈ ಮೂಲಕ ಸತತ 11ನೇ ಬಾರಿಗೆ ಯುಎಸ್ ಓಪನ್ ಸೆಮಿಫೈನಲ್‌ಗೇರಿದ ಸಾಧನೆ ಮಾಡಿದ್ದಾರೆ.

ಗುರುವಾರ ನಡೆದ ಪುರುಷ ಸಿಂಗಲ್ಸ್ ವಿಭಾಗದ ಕ್ವಾರ್ಟರ್ ಫೈನಲ್ ಮುಖಾಮುಖಿಯಲ್ಲಿ ಆರನೇ ಶ್ರೇಯಾಂಕಿತರಾಗಿರುವ ಜೊಕೊವಿಚ್, ಆಸ್ಪ್ರೇಲಿಯಾದ ಜಾನ್‌ ಮಿಲ್ಮನ್‌ ವಿರುದ್ಧ 6-3, 6-4 ಹಾಗೂ 6-4ರ ಅಂತರದ ಸುಲಭ ಗೆಲುವು ದಾಖಲಿಸಿ ಅಂತಿಮ ನಾಲ್ಕರ ಘಟ್ಟಕ್ಕೆ ಮುನ್ನಡೆದರು.

ಈ ಮುನ್ನ 16ರ ಘಟ್ಟದಲ್ಲಿ ಐದು ಬಾರಿಯ ಚಾಂಪಿಯನ್ ರೋಜರ್ ಫೆಡರರ್ ಅವರನ್ನು ಬಗ್ಗುಬಡಿರುವ ಮಿಲ್ಮನ್ ಅವರಿಂದ ಇದೇ ರೀತಿಯ ಹೋರಾಟ ನಿರೀಕ್ಷಿಸಲಾಗಿತ್ತು. ಆದರೆ ಜೊಕೊವಿಕ್ ವಿರುದ್ಧ ಆಟ ಸಾಗಲಿಲ್ಲ.

ಇದೀಗ ನಡೆಯಲಿರುವ ಫೈನಲ್‌ಗಾಗಿನ ಹೋರಾಟದಲ್ಲಿ 21ನೇ ಶ್ರೇಯಾಂಕಿತ ಜಪಾನ್‌ನ ಕೀ ನಿಶಿಕೋರಿ ಸವಾಲನ್ನು ಜೊಕೊವಿಚ್ ಎದುರಿಸಲಿದ್ದಾರೆ.

ಮಗದೊಂದು ಸೆಮಿಫೈನಲ್ ಮುಖಾಮುಖಿಯಲ್ಲಿ ಪ್ರಶಸ್ತಿ ಫೇವರಿಟ್ ಅಗ್ರ ಶ್ರೇಯಾಂಕಿತ ಸ್ಪೇನ್‌ನ ರಾಫೆಲ್ ನಡಾಲ್ ಅವರು ಮೂರನೇ ಶ್ರೇಯಾಂಕಿತ ಅರ್ಜೆಂಟೀನಾದ ಜುವಾನ್ ಮಾರ್ಟಿನ್ ಡೆಲ್ ಪೊಟ್ರೊ ಸವಾಲನ್ನು ಎದುರಿಸಲಿದ್ದಾರೆ.

ಇನ್ನೊಂದೆಡೆ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ಅಮೆರಿಕದ ಸೆರೆನಾ ವಿಲಿಯಮ್ಸ್ ಹಾಗೂ ಲಾತ್ವಿಯಾದ ಅನಾಸ್ತಾಸಿಜ ಸೆವಾಸ್ತೋವಾ ಮುಖಾಮುಖಿಯಾಗಲಿದ್ದಾರೆ. ಮಗದೊಂದು ಸೆಮೀಸ್ ಹೋರಾಟದಲ್ಲಿ ಅಮೆರಿಕದವರೇ ಆದ ಮಡಿಸನ್ ಕೇಯ್ಸ್ ಅವರು ಜಪಾನ್‌ನ ನವೊಮಿ ಒಸಾಕಾ ಸವಾಲನ್ನು ಎದುರಿಸಲಿದ್ದಾರೆ.