ನಾಕೌಟ್‌ ಹಂತಕ್ಕೆ ಪಂಕಜ್‌

ಹೊಸದಿಲ್ಲಿ : ಹಲವು ಬಾರಿ ವಿಶ್ವ ಚಾಂಪಿಯನ್‌ ಪಟ್ಟ ಜಯಿಸಿರುವ ಬೆಂಗಳೂರಿನ ಪಂಕಜ್‌ ಆಡ್ವಾನಿ ಚೀನಾದ ಜಿನಾನ್‌ನಲ್ಲಿ ನಡೆಯುತ್ತಿರುವ ಏಷ್ಯನ್‌ ಸ್ನೂಕರ್‌ ಟೂರ್‌ನ ದ್ವಿತೀಯ ಲೆಗ್‌ನಲ್ಲಿ ನಾಕೌಟ್‌ ಹಂತ ತಲುಪಿದ್ದಾರೆ.

ಭಾನುವಾರ ನಡೆದ ಮೊದಲ ಪಂದ್ಯದಲ್ಲಿ ಸ್ಥಳೀಯ ಪ್ರತಿಭೆ ಪಾಂಗ್‌ ಜುನ್‌ಕ್ಸು ವಿರುದ್ಧ 4-2 ಫ್ರೇಮ್‌ಗಳಿಂದ ಜಯ ಗಳಿಸಿದ ಹಾಲಿ ವಿಶ್ವ ಬಿಲಿಯರ್ಡ್ಸ್ ಮತ್ತು ಸ್ನೂಕರ್‌ ಚಾಂಪಿಯನ್‌ ಪಂಕಜ್‌, ದ್ವಿತೀಯ ಪಂದ್ಯದಲ್ಲಿ ಕತಾರ್‌ನ ಅಹ್ಮದ್‌ ಸೈಫ್‌ ವಿರುದ್ಧ 4-0 ಫ್ರೇಮ್‌ಗಳಿಂದ ವೈಟ್‌ವಾಷ್‌ ಮಾಡಿದ್ದಾರೆ. ಅಹ್ಮದ್‌ ಎದುರಿನ ಪಂದ್ಯದಲ್ಲಿ ಪಂಕಜ್‌ ಆರಂಭದಲ್ಲೇ ಎಡವಿದರಾದರೂ ನಂತರ ಒಂದೂ ಫ್ರೇಮ್‌ ಬಿಟ್ಟುಕೊಡದೆ ಸಂಪೂರ್ಣ ಪ್ರಭುತ್ವ ಸಾಧಿಸಿದರು.

ಈ ಮಧ್ಯೆ, ಭಾರತದ ಇತರ ಆಟಗಾರರಾದ ಮನನ್‌ ಚಂದ್ರ ಮತ್ತು ವರುಣ್‌ ಮದನ್‌ ಮೊದಲ ಪಂದ್ಯಗಳಲ್ಲಿ ಕ್ರಮವಾಗಿ 1-4 ಮತ್ತು 0-4 ಫ್ರೇಮ್‌ಗಳಿಂದ ತಮ್ಮ ಪ್ರತ್ಯೇಕ ಎದುರಾಳಿಗಳ ವಿರುದ್ಧ ಸೋಲನುಭವಿಸಿದ್ದಾರೆ. ಈ ನಡುವೆ ಕಮಲ್‌ ಚಾವ್ಲಾ 4-3 ಅಂತರದಲ್ಲಿ ರೋಚಕ ಜಯ ಗಳಿಸಿದ್ದು, 2ನೇ ಪಂದ್ಯಕ್ಕೆ ಮುನ್ನಡೆದಿದ್ದಾರೆ.