ಪಲ್ಟನ್‌ ಎದುರು ಪ್ಯಾಂಥರ್ಸ್‌ ಪರಾಕ್ರಮ

ಪಂಚಕುಲ : ಸುನಿಲ್‌ ಎಸ್‌. ಮತ್ತು ದೀಪಕ್‌ ಹೂಡಾ ಅವರ ಮಿಂಚಿನ ದಾಳಿಯ ನೆರವಿನಿಂದ ಜೈಪುರ ಪಿಂಕ್‌ ಪ್ಯಾಂಥರ್ಸ್‌ ತಂಡ ಪ್ರೊ ಕಬಡ್ಡಿ ಲೀಗ್‌ನ 6ನೇ ಆವೃತ್ತಿಯ 111ನೇ ಹಣಾಹಣಿಯಲ್ಲಿ ಪುಣೇರಿ ಪಲ್ಟನ್‌ ತಂಡದ ವಿರುದ್ಧ ಸುಲಭ ಜಯ ದಾಖಲಿಸಿದೆ.

ಇಲ್ಲಿನ ತಾವ್‌ ದೇವಿಲಾಲ್‌ ಕ್ರೀಡಾ ಸಂಕೀರ್ಣದಲ್ಲಿ ಶುಕ್ರವಾರ ನಡೆದ 'ಎ' ಗುಂಪಿನ ಪಂದ್ಯದಲ್ಲಿ ಮಾಜಿ ಚಾಂಪಿಯನ್‌ ಜೈಪುರ 36-23 ಅಂಕಗಳಿಂದ ಪಲ್ಟನ್‌ ತಂಡವನ್ನು ಮಣಿಸಿ ಸತತ 2ನೇ ಜಯ ತನ್ನದಾಗಿಸಿಕೊಂಡಿತು. ಪ್ಯಾಂಥರ್ಸ್‌ ಪರ ದೀಪಕ್‌ ಮತ್ತು ಸುನಿಲ್‌ ತಲಾ 8 ಅಂಕ ಕಲೆಹಾಕಿದರೆ, ಅಮಿತ್‌ ಕುಮಾರ್‌ 5 ಅಂಕಗಳ ಕೊಡುಗೆ ನೀಡಿದರು. ಈಗಾಗಲೇ ಪ್ಲೇಆಫ್‌ ಹಾದಿಯಿಂದ ನಿರ್ಗಮಿಸಿರುವ ಜೈಪುರ ಗೆದ್ದರೂ ಗುಂಪಿನಲ್ಲಿ ಕೊನೆಯ ಸ್ಥಾನದಲ್ಲೇ ಸ್ಥಿರಗೊಂಡಿತು.

ಅತ್ತ ಜಿ.ಬಿ. ಮೋರ್‌ ಮತ್ತು ಸಂದೀಪ್‌ ನರ್ವಾಲ್‌ ಪಲ್ಟನ್‌ ಪರ ತಲಾ 5 ಅಂಕ ಗಳಿಸಿದ್ದನ್ನು ಹೊರತುಪಡಿಸಿದರೆ ಉಳಿದ ಆಟಗಾರರಿಂದ ನಿರೀಕ್ಷಿತ ಪ್ರದರ್ಶನ ಮೂಡಿಬರಲಿಲ್ಲ. ಈ ಸೋಲಿನೊಂದಿಗೆ ಮುಂದಿನ ಹಂತಕ್ಕೇರುವ ಪುಣೇರಿ ಪಲ್ಟನ್‌ ತಂಡದ ಅವಕಾಶ ಸಂಪೂರ್ಣ ಕಮರಿಹೋಯಿತು.