ಪ್ರೋ ಕಬಡ್ಡಿ: ಬುಲ್ಸ್‌ ಚಾಂಪಿಯನ್ಸ್‌

6ನೇ ಪ್ರೊ ಕಬಡ್ಡಿ: ಫೈನಲ್‌ನಲ್ಲಿ ಗುಜರಾತ್‌ ತಂಡಕ್ಕೆ ಸತತ ನಿರಾಸೆ| ಮಿಂಚಿದ ಪವನ್‌

ಮುಂಬಯಿ: ಯುವ ರೇಡರ್‌ ಪವನ್‌ ಸೆಹ್ರಾವತ್‌ (22 ಅಂಕ) ಅವರ ಅದ್ಭುತ ಪ್ರದರ್ಶನದಿಂದ ಸೋಲಿನ ಸುಳಿಯಿಂದ ಹೊರಬಂದು ಅಬ್ಬರಿಸಿದ ಬೆಂಗಳೂರು ಬುಲ್ಸ್‌ ತಂಡ, 6ನೇ ಆವೃತ್ತಿಯ ಪ್ರೋ ಕಬಡ್ಡಿ ಲೀಗ್‌ ಫೈನಲ್‌ ಪಂದ್ಯದಲ್ಲಿ ಬಲಿಷ್ಠ ಗುಜರಾತ್‌ ಫಾರ್ಚೂನ್‌ ಜಯಂಟ್ಸ್‌ ತಂಡನ್ನು ಮಣಿಸಿ ಚೊಚ್ಚಲ ಪ್ರಶಸ್ತಿಗೆ ಮುತ್ತಿಟ್ಟಿದೆ.

ಶನಿವಾರ ನಡೆದ ಹೈ ವೋಲ್ಟೇ ಫೈನಲ್‌ ಪಂದ್ಯದಲ್ಲಿ ಪ್ರಥಮಾರ್ಧದ ಹಿನ್ನಡೆಯನ್ನು ಬದಿಗೊತ್ತಿ ಫೀನಿಕ್ಸ್‌ ಪಕ್ಷಿಯಂತೆ ಪುಟಿದೆದ್ದ ಬುಲ್ಸ್‌ ಪಡೆ, 38-33 ಅಂಕಗಳಿಂದ ಫಾರ್ಚೂನ್‌ ಜಯಂಟ್ಸ್‌ ತಂಡದ ಕಠಿಣ ಸವಾಲನ್ನು ಮೆಟ್ಟಿನಿಂತು ಟ್ರೋಫಿ ಎತ್ತಿ ಹಿಡಿಯಿತು.

ಪಂದ್ಯದ ಮೊದಲಾರ್ಧದ ಅಂತ್ಯಕ್ಕೆ ಬೆಂಗಳೂರು ತಂಡ 9-16 ಅಂಕಗಳಿಂದ ಭಾರಿ ಹಿನ್ನಡೆ ಅನುಭವಿಸಿತ್ತು. ಸ್ಟಾರ್‌ ರೇಡರ್‌ಗಳಾದ ಸಚಿನ್‌ (10) ಮತ್ತು ರೋಹಿತ್‌ ಗುಲಿಯಾ (5) ಮಿಂಚಿನ ಆಟದೊಂದಿಗೆ ಜಯಂಟ್ಸ್‌ ತಂಡ ಅಧಿಕಾರಯುತ ಜಯ ದಾಖಲಿಸುವ ಸೂಚನೆ ನೀಡಿತ್ತು. ಆದರೆ, ದ್ವಿತೀಯಾರ್ಧದಲ್ಲಿ ಅಬ್ಬರಿಸಿದ ಪವನ್‌ ಕುಮಾರ್‌ ಒಟ್ಟಾರೆ 22 ಅಂಕಗಳನ್ನು ಗಳಿಸಿ ಬುಲ್ಸ್‌ ಜಯದ ರೂವಾರಿಯಾದರು.

ಇದರೊಂದಿಗೆ ಸತತ ಎರಡನೇ ಬಾರಿ ಗುಜರಾತ್‌ ತಂಡ ರನ್ನರ್ಸ್‌ಅಪ್‌ಗೆ ತೃಪ್ತಿ ಪಡುವಂತಾಗಿದೆ. ಕಳೆದ ಆವೃತ್ತಿಯ ಫೈನಲ್‌ನಲ್ಲಿ ಪಟನಾ ಪೈರೇಟ್ಸ್‌ ವಿರುದ್ಧ ಮುಗ್ಗರಿಸಿತ್ತು.

ಪ್ರೋ ಕಬಡ್ಡಿ ಲೀಗ್‌ ಚಾಂಪಿಯನ್ಸ್‌
ಆವೃತ್ತಿ ಚಾಂಪಿಯನ್ಸ್‌ ರನ್ನರ್ಸ್‌ಅಪ್‌
2014 ಜೈಪುರ್‌ ಪಿಂಕ್‌ ಪ್ಯಾಂಥರ್ಸ್‌ ಯು ಮುಂಬಾ
2015 ಯು ಮುಂಬಾ ಬೆಂಗಳೂರು ಬುಲ್ಸ್‌
2016 (ಜ.) ಪಟನಾ ಪೈರೇಟ್ಸ್‌ ಯು ಮುಂಬಾ
2016 (ಜೂ.) ಪಟನಾ ಪೈರೇಟ್ಸ್‌ ಜೈಪುರ್‌ ಪಿಂಕ್‌ ಪ್ಯಾಂಥರ್ಸ್‌
2017 ಪಟನಾ ಪೈರೇಟ್ಸ್‌ ಗುಜರಾತ್‌ ಫಾರ್ಚೂನ್‌ ಜಯಂಟ್ಸ್‌
2018-2019 ಬೆಂಗಳೂರು ಬುಲ್ಸ್‌ ಗುಜರಾತ್‌ ಫಾರ್ಚೂನ್‌ ಜಯಂಟ್ಸ್‌

260
ಬೆಂಗಳೂರು ಬುಲ್ಸ್‌ ತಂಡದ ರೇಡರ್‌ ಪವನ್‌ ಕುಮಾರ್‌ ಸೆಹ್ರಾವತ್‌ ಪ್ರೊ ಕಬಡ್ಡಿ ಲೀಗ್‌ನ 6ನೇ ಆವೃತ್ತಿಯಲ್ಲಿ ಗಳಿಸಿದ ಒಟ್ಟು ಅಂಕಗಳು. ಇದು 6ನೇ ಆವೃತ್ತಿಯಲ್ಲಿ ರೇಡರ್‌ ಒಬ್ಬ ದಾಖಲಿಸಿದ ಗರಿಷ್ಠ ಅಂಕಗಳಾಗಿವೆ.

100
ಯು.ಪಿ ಯೋಧಾ ತಂಡದ ಡಿಫೆಂಡರ್‌ ನಿತೇಶ್‌ ಕುಮಾರ್‌ 6ನೇ ಪ್ರೊ ಕಬಡ್ಡಿ ಟೂರ್ನಿಯಲ್ಲಿ ಗರಿಷ್ಠ ಅಂಕ ಗಳಿಸಿದ ಡಿಫೆಂಡರ್‌.

ಬಹುಮಾನ ಮೊತ್ತ
ಚಾಂಪಿಯನ್ಸ್‌: ರೂ. 3 ಕೋಟಿ
ರನ್ನರ್ಸ್‌ಅಪ್‌: ರೂ. 1.8 ಕೋಟಿ
3ನೇ ಸ್ಥಾನ: ರೂ. 1.2 ಕೋಟಿ
4ನೇ ಸ್ಥಾನ: ರೂ. 80 ಲಕ್ಷ