ಚೆನ್ನೈನ ಪ್ರಜ್ಞಾನಂದಗೆ ವಿಶ್ವದ ಎರಡನೇ ಅತಿ ಕಿರಿಯ ಗ್ರ್ಯಾಂಡ್ ಮಾಸ್ಟರ್ ಪಟ್ಟ

ಚೆನ್ನೈ: ತಮಿಳುನಾಡು ಮೂಲದ ಬಾಲಕ ಆರ್. ಪ್ರಜ್ಞಾನಂದ ಇತಿಹಾಸ ನಿರ್ಮಿಸಿದ್ದು, ವಿಶ್ವದ ಎರಡನೇ ಅತಿ ಕಿರಿಯ ಗ್ರ್ಯಾಂಡ್ ಮಾಸ್ಟರ್ ಎನಿಸಿಕೊಂಡಿದ್ದಾನೆ. ಕೇವಲ 12 ವರ್ಷ 10 ತಿಂಗಳು ಹಾಗೂ 13 ದಿನಗಳಲ್ಲಿ ಚೆಸ್ ಗ್ರ್ಯಾಂಡ್ ಮಾಸ್ಟರ್‌ ಆಗುವ ಮೂಲಕ ಇತಿಹಾಸ ಸೃಷ್ಟಿಸಿದ್ದಾನೆ.

ಸದ್ಯ, ಇಟಲಿಯ ಆರ್ಟಿಸೆಯ್‌ನಲ್ಲಿ ನಡೆಯುತ್ತಿರುವ ಗ್ರೆಡೈನ್ ಓಪನ್‌ನಲ್ಲಿ ಚೆನ್ನೈ ಮೂಲದ ಪ್ರಜ್ಞಾನಂದ ಉತ್ತಮ ಆಟವಾಡುತ್ತಿದ್ದಾನೆ. ಇರಾನ್‌ನ ಆರ್ಯನ್‌ನ ಘೋಲಾಮಿ ಎಂಬ ಯುವಕನನ್ನು ಸೋಲಿಸಿದ್ದಾನೆ. ಜತೆಗೆ, ಶನಿವಾರವಷ್ಟೇ ಚೆನ್ನೈ ಮೂಲದ ಬಾಲಕ ಇಟಾಲಿಯನ್ ಗ್ರ್ಯಾಂಡ್ ಮಾಸ್ಟರ್‌ ಲ್ಯೂಕಾ ಮೊರೋನಿ ಜೂನಿಯರ್‌ ವಿರುದ್ಧ 8ನೇ ಸುತ್ತಿನಲ್ಲೇ ಗೆಲುವು ಸಾಧಿಸಿದ್ದಾನೆ.

ಆದರೆ, ಗ್ರ್ಯಾಂಡ್ ಮಾಸ್ಟರ್ ಆಗಲು ಪ್ರಜ್ಞಾನಂದ 2482 ರೇಟಿಂಗ್‌ಗೂ ಅಧಿಕ ಅಂಕಗಳನ್ನು ಹೊಂದಿರುವ ಆಟಗಾರನ ವಿರುದ್ಧ 9ನೇ ಸುತ್ತಿನಲ್ಲಿ ಆಡಬೇಕಿತ್ತು. ಬಳಿಕ, 2514 ಅಂಕಗಳನ್ನು ಹೊಂದಿರುವ ನೆದರ್‌ಲೆಂಡ್ಸ್‌ನ ರೋಲ್ಯಾಂಡ್ ವಿರುದ್ಧ ಪಂದ್ಯ ಡ್ರಾನಲ್ಲಿ ಅಂತ್ಯಗೊಳಿಸಿದ ಪ್ರಜ್ಞಾನಂದ 13 ವರ್ಷಕ್ಕೂ ಮೊದಲೇ ವಿಶ್ವದ ಎರಡನೇ ಅತಿ ಕಿರಿಯ ಚೆಸ್ ಗ್ರ್ಯಾಂಡ್ ಮಾಸ್ಟರ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದಾನೆ.

ಸದ್ಯ, ಇಟಲಿಯ ಆರ್ಟಿಸೆಯ್‌ನಲ್ಲಿ ನಡೆಯುತ್ತಿರುವ ಗ್ರೆಡೈನ್ ಓಪನ್‌ನಲ್ಲಿ ಕ್ರೊಯೇಷಿಯಾದ ಗ್ರ್ಯಾಂಡ್ ಮಾಸ್ಟರ್ ಸಾರಿಕ್ ಇವಾನ್ ಅಂಕ ಪಟ್ಟಿಯಲ್ಲಿ ಅಗ್ರ ಸ್ಥಾನ ಕಾಯ್ದುಕೊಂಡಿದ್ದಾನೆ. ಇನ್ನು, ಎರಡನೇ ಅತಿ ಕಿರಿಯ ಗ್ರ್ಯಾಂಡ್ ಮಾಸ್ಟರ್ ಪ್ರಜ್ಞಾನಂದ ಎರಡನೇ ಸ್ಥಾನದಲ್ಲಿದ್ದಾನೆ. ಜತೆಗೆ ಪ್ರಜ್ಞಾನಂದ ಈಗಾಗಲೇ 2500ಕ್ಕೂ ಅಧಿಕ ಎಲೋ ರೇಟಿಂಗ್ ಪಾಯಿಂಟ್ಸ್‌ಗಳನ್ನು ದಾಟಿಯೂ ಸಾಧನೆ ಮಾಡಿದ್ದಾನೆ.

ಆದರೆ, 1990ರಲ್ಲೇ ಗ್ರ್ಯಾಂಡ್ ಮಾಸ್ಟರ್‌ ಆಗುವ ಮೂಲಕ ಉಕ್ರೇನ್‌ನ ಸೆರ್ಜಿ ಕರ್ಜಾಕಿನ್ ವಿಶ್ವದ ಅತಿ ಕಿರಿಯ ಚೆಸ್ ಗ್ರ್ಯಾಂಡ್ ಮಾಸ್ಟರ್ ದಾಖಲೆ ಹೊಂದಿದ್ದಾನೆ. 12 ವರ್ಷ 7 ತಿಂಗಳಿಗೆ ಚೆಸ್ ಗ್ರ್ಯಾಂಡ್ ಮಾಸ್ಟರ್ ಆಗಿದ್ದು, ಅವರ ದಾಖಲೆಯನ್ನು ಮುರಿಯಲು ಇದುವರೆಗೆ ಯಾರಿಂದಲೂ ಸಾಧ್ಯವಾಗಿಲ್ಲ.