ಡೆನ್ಮಾಕ್ ಓಪನ್ ಸೂಪರ್ ಸೀರೀಸ್ ಪ್ರೀಮಿಯರ್ ಬ್ಯಾಡ್ಮಿಂಟನ್ ಟೂರ್ನಿ | 8ರ ಘಟ್ಟಕ್ಕೆ ಶ್ರೀಕಾಂತ್, ಪ್ರಣೋಯ್
ಒಡೆನ್ಸ್ (ಡೆನ್ಮಾರ್ಕ್) : ವಿಶ್ವದ ಮಾಜಿ ನಂ.1 ಅಟಗಾರ್ತಿ ಸೈನಾ ನೆಹ್ವಾಲ್, ಇಲ್ಲಿ ನಡೆಯುತ್ತಿರುವ ಡೆನ್ಮಾಕ್ ಓಪನ್ ಸೂಪರ್ ಸೀರೀಸ್ ಪ್ರೀಮಿಯರ್ ಬ್ಯಾಡ್ಮಿಂಟನ್ ಟೂರ್ನಿಯ ಮಹಿಳಾ ಸಿಂಗಲ್ಸ್ನಲ್ಲಿ ಭಾರತದ ಏಕಮಾತ್ರ ಭರವಸೆಯಾಗಿ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ್ದಾರೆ.
ಇದೇ ವೇಳೆ ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ಮಿಂಚಿನ ಪ್ರದರ್ಶನ ನೀಡಿರುವ ಪ್ರತಿಭಾನ್ವಿತ ಆಟಗಾರ ಎಚ್.ಎಸ್ ಪ್ರಣೋಯ್, ಪ್ರಿ ಕ್ವಾರ್ಟರ್ನಲ್ಲಿ ವಿಶ್ವದ ಮಾಜಿ ನಂ.1 ಆಟಗಾರ ಮಲೇಷ್ಯಾದ ಲೀ ಚಾಂಗ್ ವೈಗೆ ಸೋಲುಣಿಸಿದ್ದು, ಭಾರತದ ಅಗ್ರಮಾನ್ಯ ಆಟಗಾರ ಕಿಡಂಬಿ ಶ್ರೀಕಾಂತ್ ಕೂಡ 8ರ ಘಟ್ಟಕ್ಕೆ ಮುನ್ನಡೆದಿದ್ದಾರೆ.
ಮಹಿಳಾ ಸಿಂಗಲ್ಸ್ನ ಮೊದಲ ಸುತ್ತಿನಲ್ಲೇ ಮಾಜಿ ವಿಶ್ವ ಚಾಂಪಿಯನ್ ಸ್ಪೇನ್ನ ಕ್ಯಾರೊಲೀನಾ ಮರಿನ್ಗೆ ಆಘಾತ ನೀಡಿದ 27 ವರ್ಷದ ಅನುಭವಿ ಆಟಗಾರ್ತಿ ಸೈನಾ ನೆಹ್ವಾಲ್, ಪ್ರಿ ಕ್ವಾರ್ಟರ್ ಪಂದ್ಯದಲ್ಲಿಯೂ ಸ್ಥರತೆ ಕಾಯ್ದುಕೊಳ್ಳುವ ಮೂಲಕ 22-20, 21-13 ಅಂತರದ ನೇರ ಗೇಮ್ಗಳಿಂದ ಥಾಯ್ಲೆಂಡ್ನ ಆಟಗಾರ್ತಿ ನಿಚಾವನ್ ಜಿಂದಾಪೊಲ್ ಅವರನ್ನು ಮಣಿಸಿ ಕ್ವಾರ್ಟರ್ ಫೈನಲ್ ಹಂತಕ್ಕೇರಿದ್ದಾರೆ.
ಮೊದಲ ಗೇಮ್ನಲ್ಲಿ ಪ್ರಬಲ ಪೈಪೋಟಿ ಎದುರಿಸಿದ ಸೈನಾ, ಒತ್ತಡದ ಸಂದರ್ಭಗಳಲ್ಲಿ ತಮ್ಮ ಅನುಭವದ ನೆರವಿನಿಂದ 22-20 ಅಂಕಗಳ ಗೇಮ್ನಿಂದ ಮೇಲುಗೈ ಸಾಧಿಸಿದರು. ಬಳಿಕ ಆಕ್ರಮಣಕಾರಿ ಆಟ ಮತ್ತು ಬಿರುಸಿನ ಸ್ಮ್ಯಾಷ್ಗಳೊಂದಿಗೆ ಎದುರಾಳಿಯ ಮೇಲೆ ಒತ್ತಡ ಹೇರುವ ಮೂಲಕ 21-13 ಅಂಕಗಳಿಂದ ಪ್ರಾಬಲ್ಯ ಮೆರೆದರು. ಇದೀಗ ಸೆಮಿಫೈನಲ್ ಅರ್ಹತೆಗಾಗಿ ನಾಲ್ಕನೇ ಶ್ರೇಯಾಂಕಿತ ಆಟಗಾರ್ತಿ ಜಪಾನ್ನ ಅಕಾನೆ ಯಮಾಗುಚಿ ಅವರ ಕಠಿಣ ಸವಾಲು ಎದುರಿಸಲಿದ್ದಾರೆ.
ಪ್ರಣೋಯ್ಗೆ ಬೆಚ್ಚಿದ ಲೀ
ವೃತ್ತಿ ಬದುಕಿನ ಶ್ರೇಷ್ಠ ಲಯದಲ್ಲಿರುವ ಭಾರತದ ಪ್ರತಿಭಾನ್ವಿತ ಆಟಗಾರ ಎಚ್.ಎಸ್ ಪ್ರಣೋಯ್, ಡೆನ್ಮಾರ್ಕ್ ಅಂಗಣದಲ್ಲಿ ಮಲೇಷ್ಯಾದ ಗಿಗ್ಗಜ ಲೀ ಚಾಂಗ್ ವೈಗೆ ಸೋಲುಣಿಸಿದ್ದಾರೆ. ನಾಲ್ಕು ತಿಂಗಳ ಹಿಂದಷ್ಟೇ ಇಂಡೋನೇಷ್ಯಾ ಸೂಪರ್ ಸೀರೀಸ್ ಟೂರ್ನಿಯಲ್ಲಿ ಲೀಗೆ ನೇರ ಗೇಮ್ಗಳ ಆಘಾತ ನೀಡಿದ್ದ 25 ವರ್ಷದ ಆಟಗಾರ ಪ್ರಣೋಯ್, ಇದೀಗ ಮತ್ತೊಮ್ಮೆ ಅಂಥದ್ದೇ ಪ್ರದರ್ಶನ ಹೊರತಂದು 21-17, 11-21, 21-19 ಅಂತರದಲ್ಲಿ ಮಲೇಷ್ಯಾದ ತಾರೆಗೆ ಮತ್ತೊಂದು ಸೋಲುಣಿಸಿದರು.
ಸಮಬಲದ ಹೋರಾಟದಿಂದ ಕೂಡಿದ್ದ ಪಂದ್ಯದ ಮೊದಲ ಗೇಮ್ನ ಅಂತ್ಯಕ್ಕೆ ಚುರುಕಿನ ಅಂಕ ಕಲೆಹಾಕಿ ಎದುರಾಳಿ ಹೆಚ್ಚು ತಪ್ಪುಗಳನ್ನು ಮಾಡುವಂತೆ ಮಾಡಿದ ಪ್ರಣೋಯ್, 21-17 ಅಂಕಗಳಿಂದ ಮುನ್ನಡೆ ಪಡೆಯುವಲ್ಲಿ ಯಶಸ್ವಿಯಾದರು. ಬಳಿಕ ಆಕ್ರಮಣಕಾರಿ ಆಟಕ್ಕೆ ಮೊರೆಹೋದ ಲೀ ಚಾಂಗ್ ವೈ, 21-11 ಅಂತರದಲ್ಲಿ ಭಾರತೀಯ ಆಟಗಾರನನ್ನು ಹಿಮ್ಮೆಟ್ಟಿಸಿದರು. ಆದರೆ, ಒಂದು ಗಂಟೆ 3 ನಿಮಿಷಗಳ ಕಾಲ ಸಾಗಿದ ಮ್ಯಾರಥಾನ್ ಪಂದ್ಯದ 3ನೇ ಹಾಗೂ ನಿರ್ಣಾಯಕ ಗೇಮ್ನಲ್ಲಿ 21-19 ಅಂಕಗಳಿಂದ ಗೆಲುವು ದಕ್ಕಿಸಿಕೊಂಡ ಕೇರಳ ಮೂಲದ ಆಟಗಾರ ಗೆಲುವಿನ ನಿಟ್ಟುಸಿರು ಬಿಟ್ಟರು.
ಯು.ಎಸ್ ಓಪನ್ ಚಾಂಪಿಯನ್ ಪ್ರಣೋಯ್, ಇದೀಗ ಕ್ವಾರ್ಟರ್ ಪೈನಲ್ ಕದನದಲ್ಲಿ ವಿಶ್ವದ ನಂ.1 ಆಟಗಾರ ದಕ್ಷಿಣ ಕೊರಿಯಾದ ಸನ್ ವ್ಯಾನ್ ಹೊ ಎದುರು ಸೆಣಸಲಿದ್ದಾರೆ. ಸನ್, 2ನೇ ಸುತ್ತಿನಲ್ಲಿ ಆತಿಥೇಯರ ಫೇವರಿಟ್ ಆಟಗಾರ ಆ್ಯಂಡ್ರೆಯಸ್ ಆ್ಯಂಟೊನ್ಸೆನ್ಗೆ 20-22, 21-14, 21-18 ಅಂತರದ ಗೇಮ್ಗಳಿಂದ ಸೋಲುಣಿಸಿ ಕ್ವಾರ್ಟರ್ ಫೈನಲ್ ತಲುಪಿದ್ದಾರೆ.
''ಲೀ ವಿರುದ್ಧ ಮತ್ತೊಮ್ಮೆ ಗೆಲುವು ದಾಖಲಿಸಿರುವುದು ಖುಷಿ ಕೊಟ್ಟಿದೆ. ಅವರು ಈ ವಯಸ್ಸಿನಲ್ಲಿಯೂ ಯಾವುದೇ ಪರಿಸ್ಥಿತಿಗಳಿಗೆ ಹೊಂದಿಕೊಂಡು ಶ್ರೇಷ್ಠ ಆಟವಾಡುವ ಸಾಮರ್ಥ್ಯ ಹೊಂದಿದ್ದಾರೆ. ಈ ಗೆಲುವಿನ ಕುರಿತಾಗಿ ಹೆಚ್ಚು ಆಲೋಚಿಸುವುದಿಲ್ಲ, ಏಕೆಂದರೆ ಈ ಹಿಂದೆಯೂ ಇದೇ ಫಲಿತಾಂಶ ಕಂಡು ಟ್ರೋಫಿ ಗೆಲ್ಲುವಲ್ಲಿ ವಿಫಲಗೊಂಡಿದ್ದೆ. ಹೀಗಾಗಿ ಮುಂದಿನ ಪಂದ್ಯದ ಕಡೆಗೆ ಹೆಚ್ಚಿನ ಗಮನ ಹರಿಸಿದ್ದೇನೆ,'' ಎಂದು ಪಂದ್ಯದ ಬಳಿಕ ಪ್ರಣೋಯ್ ತಮ್ಮ ಅನುಭವ ಹಂಚಿಕೊಂಡಿದ್ದಾರೆ.
ಶ್ರೀಕಾಂತ್ಗೆ ಪ್ರಯಾಸದ ಗೆಲುವು
ಪ್ರಸಕ್ತ ಸಾಲಿನಲ್ಲಿ ಇಂಡೋನೇಷ್ಯಾ ಮತ್ತು ಆಸ್ಪ್ರೇಲಿಯಾ ಅಂಗಣದಲ್ಲಿ ಎರಡು ಸೂಪರ್ ಸೀರೀಸ್ ಪ್ರಶಸ್ತಿಗಳನ್ನು ಗೆದ್ದು ಮಿಂಚಿರುವ ಭಾರತದ ತಾರೆ ಹಾಗೂ ವಿಶ್ವದ 8ನೇ ರಾರಯಂಕ್ನ ಆಟಗಾರ ಕಿಡಂಬಿ ಶ್ರೀಕಾಂತ್, ಪ್ರಯಾಸದ ಜಯದೊಂದಿಗೆಸ ಡೆನ್ಮಾರ್ಕ್ ಟೂರ್ನಿಯ ಕ್ವಾರ್ಟರ್ ಫೈನಲ್ ತಲುಪಿದ್ದಾರೆ.
ಗುರುವಾರ ತಡರಾತ್ರಿ ನಡೆದ ಜಿದ್ದಾಜಿದ್ದಿನ ಪಂದ್ಯದಲ್ಲಿ ಸ್ವಯಂಕೃತ ತಪ್ಪುಗಳಿಂದಾಗಿ ಜಯ ದಕ್ಕಿಸಿಕೊಳ್ಳಲು ಕೊಂಚ ಪ್ರಯಾಸ ಪಟ್ಟ ಶ್ರೀಕಾಂತ್, ಅಂತಿಮವಾಗಿ 21-13, 8-21, 21-18 ಅಂತರದ ಗೇಮ್ಗಳಿಂದ ವಿಶ್ವದ 52ನೇ ರಾರಯಂಕ್ನ ಆಟಗಾರ ದಕ್ಷಿಣ ಕೊರಿಯಾದ ಜೆಯಾನ್ ಹೆಯಾಂಕ್ ಜಿನ್ ಎದುರು ಜಯ ಸಾಧಿಸಿದರು.
ಶ್ರೀಕಾಂತ್, ಇದೀಗ ಮುಂದಿನ ಪಂದ್ಯದಲ್ಲಿ ಆತಿಥೇಯ ಡೆನ್ಮಾರ್ಕ್ನ ತಾರೆ ಹಾಗೂ ಹಾಲಿ ವಿಶ್ವ ಚಾಂಪಿಯನ್ ವಿಕ್ಟರ್ ಆ್ಯಕ್ಸೆಲ್ಸನ್ ಅವರ ಕಠಿಣ ಸವಾಲು ಎದುರಿಸಲಿದ್ದಾರೆ. ಆ್ಯಕ್ಸೆಲ್ಸನ್, 2ನೇ ಸುತ್ತಿನಲ್ಲಿ ಹಾಂಕಾಂಗ್ನ ಆಟಗಾರ ವೀ ನಾನ್ ಎದುರು 17-21, 21-10, 23-21 ಅಂತರದ ಗೇಮ್ಗಳಿಂದ ಪ್ರಯಾಸದ ಜಯ ದಾಖಲಿಸಿದ್ದಾರೆ.