ಕ್ವಾರ್ಟರ್‌ಫೈನಲ್‌ಗೆ ಪ್ರಣಯ್‌

ನ್ಯೂಜಿಲೆಂಡ್‌ ಓಪನ್‌ ಬ್ಯಾಡ್ಮಿಂಟನ್‌

Vijaya Karnataka Web

ಆಕ್ಲೆಂಡ್‌ : ಭಾರತದ ಎಚ್‌.ಎಸ್‌.ಪ್ರಣಯ್‌ ನ್ಯೂಜಿಲೆಂಡ್‌ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಕ್ವಾರ್ಟರ್‌ಫೈನಲ್‌ ಪ್ರವೇಶಿಸಿದ್ದಾರೆ. ಶ್ರೇಯಾಂಕರಹಿತರಾಗಿ ಟೂರ್ನಿ ಪ್ರವೇಶಿಸಿದ್ದ ಪ್ರಣಯ್‌ ಗುರುವಾರ ನಡೆದ ಪುರುಷರ ಸಿಂಗಲ್ಸ್‌ 2ನೇ ಸುತ್ತಿನ ಪಂದ್ಯದಲ್ಲಿ ಇಂಡೊನೇಷ್ಯಾ ಆಟಗಾರ 2ನೇ ಶ್ರೇಯಾಂಕದ ಟಾಮಿ ಸುಗಿಯಾರ್ಟೊ ವಿರುದ್ಧ 21-14, 21-12 ನೇರ ಗೇಮ್‌ಗಳಿಂದ ಗೆದ್ದು ಅಂತಿಮ 8ರ ಘಟ್ಟಕ್ಕೆ ಜಿಗಿದರು. ವಿಶ್ವದ 26ನೇ ಶ್ರೇಯಾಂಕದ ಆಟಗಾರ ಪ್ರಣಯ್‌ ವಿಶ್ವದ 13ನೇ ಶ್ರೇಯಾಂಕದ ಆಟಗಾರ ಸುಗಿಯಾರ್ಟೊರನ್ನು ಮುಖಾಮುಖಿಯಾಗಿದ್ದು ಇದೇ ಮೊದಲು.
ಪ್ರಣೀತ್‌ಗೆ ಸೋಲು
ಪುರುಷರ ಸಿಂಗಲ್ಸ್‌ನಲ್ಲಿ ಭಾರತದ ಪಾಲಿಗೆ ಪದಕ ಭರವಸೆ ಎನಿಸಿಕೊಂಡಿದ್ದ ಬಿ.ಸಾಯ್‌ ಪ್ರಣೀತ್‌ 2ನೇ ಸುತ್ತಿನಲ್ಲೇ ಸೋತು ಸ್ಪರ್ಧೆಯಿಂದ ಹೊರಬಿದ್ದಿದ್ದಾರೆ. ಬುಧವಾರ ಸೈನಾ ನೆಹ್ವಾಲ್‌ ಮೊದಲ ಸುತ್ತಿನಲ್ಲಿ ಸೋತ ಬಳಿಕ ಭಾರತೀಯ ಬ್ಯಾಡ್ಮಿಂಟನ್‌ ಅಭಿಮಾನಿಗಳಿಗೆ ಎದುರಾದ 2ನೇ ದೊಡ್ಡ ನಿರಾಸೆ ಇದು.
ಸಾಯ್‌ ಪ್ರಣೀತ್‌ ಚೀನಾದ ದಿಗ್ಗಜ ಆಟಗಾರ ಲಿನ್‌ ಡ್ಯಾನ್‌ ಎದುರು 12-21, 12-21 ನೇರ ಗೇಮ್‌ಗಳಿಂದ ಸೋತರು.
ಪುರುಷರ ಡಬಲ್ಸ್‌ನಲ್ಲೂ ನಿರಾಸೆ
ಭಾರತಕ್ಕೆ ಪುರುಷರ ಡಬಲ್ಸ್‌ನಲ್ಲೂ ನಿರೀಕ್ಷಿತ ಫಲ ಸಿಗಲಿಲ್ಲ. ಬುಧವಾರ ಮೊದಲ ಸುತ್ತಿನಲ್ಲಿ ಉತ್ತಮ ಪ್ರದರ್ಶನ ಸಂಘಟಿಸಿದ್ದ ಮನು ಅತ್ರಿ ಮತ್ತು ಸುಮೀತ್‌ ರೆಡ್ಡಿ ಜೋಡಿ ಗುರುವಾರ 2ನೇ ಸುತ್ತಿನಲ್ಲಿ ಮಲೇಷ್ಯಾದ ಗೊ ವಿ ಶೆಮ್‌ ಮತ್ತು ಟ್ಯಾನ್‌ ವೀ ಕಿಯಾಂಗ್‌ ಜೋಡಿಗೆ ಶರಣಾಯಿತು.