ಬೆಂಗಾಲ್ ಹುಲಿಯ ಘರ್ಜನೆಗೆ ಸದ್ದಡಗಿದ ಯುಪಿ ಯೋಧಾ

ಹೈದರಾಬಾದ್: ಇಲ್ಲಿ ಸಾಗುತ್ತಿರುವ ಪ್ರೊ ಕಬಡ್ಡಿ ಲೀಗ್‌ (ಪಿಕೆಎಲ್‌) ಏಳನೇ ಆವೃತ್ತಿಯಲ್ಲಿ ಬುಧವಾರ ನಡೆದ ಮೊದಲ ಪಂದ್ಯದಲ್ಲಿ ಯುಪಿ ಯೋಧಾ ವಿರುದ್ಧ ಬೆಂಗಾಲ್ ವಾರಿಯರ್ಸ್ ಭರ್ಜರಿ ಗೆಲುವು ದಾಖಲಿಸಿದೆ.

ಪಂದ್ಯದುದ್ಧಕ್ಕೂ ಅಮೋಘ ಪ್ರದರ್ಶನ ಮುಂದುವರಿಸಿದ ಬೆಂಗಾಲ್ ವಾರಿಯರ್ಸ್ 48-17ರ ಅಂತರದಲ್ಲಿ ಯುಪಿ ಯೋಧಾ ವಿರುದ್ಧ ಗೆಲುವು ದಾಖಲಿಸಿತು.

ಸೂರಜ್ ಹೋರಾಟ ವ್ಯರ್ಥ; ಡೆಲ್ಲಿ ವಿರುದ್ಧ ಟೈಟಾನ್ಸ್‌ಗೆ ವಿರೋಚಿತ ಸೋಲು!

ಬೆಂಗಾಲ್ ಪರ ಟಾಪ್ ರೈಡರ್ಸ್ ಎನಿಸಿಕೊಂಡಿರುವ ಮೊಹಮ್ಮದ್ ನಬಿಭಕ್ಷ್ 10 ಅಂಕಗಳನ್ನು ಬಾಚಿಕೊಂಡು ಮಿಂಚಿದರು. ಇವರಿಗೆ ಉತ್ತಮ ಸಾಥ್ ನೀಡಿದ ಮಣಿಂದರ್ ಸಿಂಗ್ ಸಹ ಒಂಬತ್ತು ಅಂಕಗಳನ್ನು ಸಂಪಾದಿಸಿದರು.

ರಕ್ಷಣೆಯಲ್ಲೂ ಬಂಗಾಲ್ ವಾರಿಯರ್ಸ್ ಪರ ಮಿಂಚಿದ ಬಲ್‌ದೇವ್ ಸಿಂಗ್ ಎರಡು ಟ್ಯಾಕಲ್ ಪಾಯಿಂಟ್ ಸೇರಿದಂತೆ ಏಳು ಅಂಕಗಳನ್ನು ಕಲೆ ಹಾಕಿದರು. ಯುಪಿ ಯೋಧಾ ಪರ ಮೋನು ಗೋಯತ್ ಗರಿಷ್ಠ ಆರು ಅಂಕಗಳನ್ನು ಪಡೆದರು.

ಮೊದಲಾರ್ಧದಲ್ಲಿ 17-9ರ ಅಂತರದ ಮುನ್ನಡೆ ಕಾಯ್ದುಕೊಂಡಿದ್ದ ಬಂಗಾಲ್ ವಾರಿಯರ್ಸ್ ತದಾ ಬಳಿಕ ಹಿಂತಿರುಗಿ ನೋಡಿಯೇ ಇಲ್ಲ. ಪ್ರಸ್ತುತ ಗೆಲುವಿನೊಂದಿಗೆ ಬಂಗಾಲ್ ವಾರಿಯರ್ಸ್ ಖಾತೆ ತೆರೆದುಕೊಂಡಿದೆ.