ಅಜಯ್ ಮಿಂಚು; ಬೆಂಗಾಲ್ ಸದೆಬಡಿದ ಬುಲ್ಸ್

ನಾಗ್ಪುರ: ಪ್ರೊ ಕಬಡ್ಡಿ ಲೀಗ್‌ನಲ್ಲಿ ಬುಧವಾರ ನಡೆದ ಮಹತ್ವದ ಪಂದ್ಯದಲ್ಲಿ ಬೆಂಗಾಲ್‌ ವಾರಿಯರ್ಸ್‌ ವಿರುದ್ಧ ಬೆಂಗಳೂರು ಬುಲ್ಸ್ ಅಧಿಕಾರಿಯುತ ಗೆಲುವು ದಾಖಲಿಸಿದೆ. ಇದರೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ.

ನಾಗ್ಪುರದ ಮಂಕಾಪುರ ಇಂಧೋರ್ ಸ್ಟೇಡಿಯಂನಲ್ಲಿ ನಡೆದ ಪಂದ್ಯದಲ್ಲಿ ಬೆಂಗಳೂರು ಬುಲ್ಸ್ ತಂಡವು 31-25ರ ಅಂತರದಲ್ಲಿ ಬೆಂಗಾಲ್‌ ವಾರಿಯರ್ಸ್‌ ಮೇಲೆ ಸವಾರಿ ಮಾಡಿತ್ತು.

ಅಜಯ್ ಮಿಂಚು...

ಪಂದ್ಯದ ದ್ವಿತಿಯಾರ್ಧದಲ್ಲಿ ಸೂಪರ್ ರೈಡ್‌ನಲ್ಲಿ ನಾಲ್ಕು ಅಂಕ ಸೇರಿದಂತೆ ಒಟ್ಟು ಎಂಟು ಅಂಕ ಕಲೆ ಹಾಕಿದ ಅಜಯ್ ಕುಮಾರ್ ಬೆಂಗಳೂರು ತಂಡದ ಗೆಲುವಿನ ರುವಾರಿ ಎನಿಸಿದರು. ನಾಯಕ ರೋಹಿತ್ ಕುಮಾರ್ ಆರು ಅಂಕಗಳನ್ನು ಸಂಪಾದಿಸಿದರು.

ಅತ್ತ ಅದ್ಭುತ ರಕ್ಷಣೆಯನ್ನು ತೋರುವ ಮೂಲಕ 5 ಟ್ಯಾಕಲ್ ಅಂಕ ಸಂಪಾದಿಸಿದ ಅಶಿಶ್ ಕುಮಾರ್ ಅಮೋಘ ಆಟದ ಪ್ರದರ್ಶನ ನೀಡಿದರು. ಬೆಂಗಾಲ್ ತಂಡದ ಪರ ಜಾಂಗ್ ಕುನ್ ಲೀ 8 ರೈಡ್ ಅಂಕಗಳನ್ನು ಸಂಪಾದಿಸಿದರೂ ಗೆಲುವು ಒದಗಿಸಿಕೊಡಲು ಸಾಧ್ಯವಾಗಲಿಲ್ಲ.

ಪಂದ್ಯದ ಮೊದಲಾರ್ಧದಲ್ಲಿ 12-10ರ ಅಂತರದ ಮುನ್ನಡೆ ದಾಖಲಿಸಿದ್ದ ಬೆಂಗಳೂರು ಒಂದು ಹಂತದಲ್ಲಿ ಹಿನ್ನಡೆ ಅನುಭವಿಸಿದರೂ ಬಳಿಕ ಪುಟಿದೆದ್ದು ಅಮೋಘ ಪ್ರದರ್ಶನದ ಮೂಲಕ ಗೆಲುವನ್ನು ದಾಖಲಿಸಿದೆ.

ಈ ಗೆಲುವಿನೊಂದಿಗೆ ಬಿ ವಲಯದಲ್ಲಿ ಆಡಿರುವ ಆರು ಪಂದ್ಯಗಳಲ್ಲಿ ಮೂರು ಗೆಲುವು ಹಾಗೂ ಒಂದು ಡ್ರಾ ಫಲಿತಾಂಶದೊಂದಿಗೆ 19 ಅಂಕ ಸಂಪಾದಿಸಿರುವ ಬೆಂಗಳೂರು ಬುಲ್ಸ್ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನಕ್ಕೇರಿದೆ.