ಕೇರಳದಲ್ಲಿ ಉಷಾ ವಿರುದ್ಧ ಸಿಡಿದೆದ್ದ ವಿದ್ಯಾರ್ಥಿಗಳು
ಬೆಂಗಳೂರು: ಏಷ್ಯನ್‌ ಚಾಂಪಿಯನ್‌ಷಿಪ್‌ನಲ್ಲಿ ತಮ್ಮದೇ ರಾಜ್ಯದ ಕ್ರೀಡಾಪಟು ಪಿ.ಯು. ಚಿತ್ರಾ ಅಗ್ರ ಸ್ಥಾನ ಗಳಿಸಿದರೂ ಆಕೆಯನ್ನು ವಿಶ್ವ ಅಥ್ಲೆಟಿಕ್ಸ್‌ ಚಾಂಪಿಯನ್‌ಷಿಪ್‌ಗೆ ಆಯ್ಕೆ ಮಾಡದ ಮಾಜಿ ಒಲಿಂಪಿಯನ್‌ ಪಿ.ಟಿ. ಉಷಾ ವಿರುದ್ಧ ಕೇರಳದ ಕ್ರೀಡಾಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಚಿತ್ರಾ ಅವರ ಆಯ್ಕೆಯನ್ನು ನಿರಾಕರಿಸಿರುವುದರ ಬಗ್ಗೆ ಸ್ಪಷ್ಟೀಕರಣ ನೀಡುವಾಗ ಪಿಟಿ ಉಷಾ, ''ಚಿತ್ರಾ ಅವರು ಅಂತಾರಾಷ್ಟ್ರೀಯ ಅಥ್ಲೆಟಿಕ್ಶ್‌ ಫೆಡರೇಷನ್‌ನ ಮಾನದಂಡವನ್ನು ತಲುಪಿಲ್ಲ,'' ಎಂದು ಹೇಳಿದ್ದರು. ಇದು ಕೇರಳದ ಕ್ರೀಡಾಭಿಮಾನಿಗಳಲ್ಲಿ ಆಕ್ರೋಶವನ್ನುಂಟು ಮಾಡಿತ್ತು.
ಇತ್ತೀಚಿಗೆ ಭುವನೇಶ್ವರದಲ್ಲಿ ನಡೆದ ಏಷ್ಯನ್‌ ಅಥ್ಲೆಟಿಕ್ಸ್‌ ಚಾಂಪಿಯನ್‌ಷಿಪ್‌ನ 1500 ಮೀ. ಓಟದಲ್ಲಿ ಪಿಯು ಚಿತ್ರಾ ಅಗ್ರ ಸ್ಥಾನ ಪಡೆದು ವಿಶ್ವ ಚಾಂಪಿಯನ್‌ಷಿಪ್‌ಗೆ ಅರ್ಹತೆ ಪಡೆದಿದ್ದರು. ಆದರೆ ವಿಶ್ವ ಅಥ್ಲೆಟಿಕ್ಸ್‌ ಚಾಂಪಿಯನ್‌ಷಿಪ್‌ನಿಂದ ವಂಚಿತರಾಗಿದ್ದರು.
ಪಿಟಿ ಉಷಾ ಅವರ ಹೇಳಿಕೆಯನ್ನು ವಿರೋಧಿಸಿ ಕೇರಳ ವಿದ್ಯಾರ್ಥಿ ಸಂಘಟನೆಯು ಪ್ರತಿಭಟನೆ ನಡೆಸಿದೆ.ಕೊಚ್ಚಿಯಲ್ಲಿರುವ ಪಿಟಿ ಉಷಾ ಅವರ ಹೆಸರಿನಲ್ಲಿದ್ದ ರಸ್ತೆಗೆ ಪಿಯು ಚಿತ್ರಾ ಎಂದು ಹೆಸರಿಟ್ಟು ಪ್ರತಿಭಟಿಸಲಾಗಿದೆ. ಪ್ರತಿಭಟನೆಯಲ್ಲಿ ಎರ್ಣಾಕುಲಂನ ಮಹಾರಾಜ ಕಾಲೇಜಿನ ವಿದ್ಯಾರ್ಥಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಂಡರು.
ಮೂಲ ಲೇಖನ: samayam malayalam