ಏಷ್ಯಾ ಚಾಂಪಿಯನ್‌ಶಿಪ್: ಸಿಂಧೂ ಮುನ್ನಡೆ, ಸೈನಾ ಹಿನ್ನಡೆ

ಹೊಸದಿಲ್ಲಿ: ಭಾರತದ ತಾರೆ ಪಿ.ವಿ ಸಿಂಧೂ ಬ್ಯಾಡ್ಮಿಂಟನ್ ಏಷ್ಯಾ ಚಾಂಪಿಯನ್‌ಶಿಪ್‌ನಲ್ಲಿ ಎರಡನೇ ಸುತ್ತಿಗೆ ಪ್ರವೇಶಿಸಿದ್ದಾರೆ. ಇನ್ನೊಂದೆಡೆ ಸೈನಾ ನೆಹ್ವಾಲ್ ಸೋಲಿಗೆ ಶರಣಾಗಿದ್ದಾರೆ.

ಇಂಡೋನೇಷ್ಯಾದ ದಿನಾರ್ ದೈಯಾ ಆಸ್ಟಿನ್ ವಿರುದ್ಧದ ಹೋರಾಟದಲ್ಲಿ ಸಿಂಧೂ ಗೆಲುವು ದಾಖಲಿಸಿದರೆ ಸೈನಾ ಜಪಾನ್ ಮೂಲದ ಸಕಯ ಸ್ಯಾಟೋ ವಿರುದ್ಧ ಸೋಲೊಪ್ಪಿಕೊಂಡರು.

31 ನಿಮಿಷಗಳ ಹೋರಾಟದಲ್ಲಿ ಸಿಂಧೂ 21-8, 21-18ರ ಅಂತರದಲ್ಲಿ ಗೆಲುವು ದಾಖಲಿಸಿದರು. ಇನ್ನೊಂದೆಡೆ ಸೈನಾ 21-19, 16-21, 18-21ರ ಅಂತರದಲ್ಲಿ ಹಿನ್ನಡೆ ಅನುಭವಿಸಿದರು.

ಕಳೆದ ರಿಯೋ ಒಲಿಂಪಿಕ್ಸ್‌ನಲ್ಲಿ ಬೆಳ್ಳಿ ಪದಕ ವಿಜೇತೆ ಸಿಂಧೂ, ಟೂರ್ನಿಯಲ್ಲಿ ನಾಲ್ಕನೇ ಶ್ರೇಯಾಂಕ ಪಡೆದಿದ್ದು, ಅತ್ಯುತ್ತಮ ಪ್ರದರ್ಶನ ಮುಂದುವರಿಸುವ ವಿಶ್ವಾಸದಲ್ಲಿದ್ದಾರೆ.

ಅತ್ತ ಪುರುಷ ಸಿಂಗಲ್ಸ್ ವಿಭಾಗದಲ್ಲಿ ಭಾಗವಹಿಸುತ್ತಿರುವ ಭಾರತದ ಅಜಯ್ ಜಯರಾಂ 21-18, 18-21, 21-19ರ ಅಂತರದಲ್ಲಿ ಚೀನಾದ ಐದನೇ ಶ್ರೇಯಾಂಕಿತ ತೈಯನ್ ಹುವಾಯ್ ವಿರುದ್ದ ಗೆಲುವು ದಾಖಲಿಸಿದರು.