ಸೆಮೀಸ್‌ಗೆ ಲಗ್ಗೆಯಿಟ್ಟ ಸಿಂಧೂ, ಸಮೀರ್

ಬಿಡಬ್ಲ್ಯುಎಫ್‌ ವಿಶ್ವ ಟೂರ್‌ ಫೈನಲ್ಸ್‌ನಲ್ಲಿ ಸಿಂಧೂ, ಸಮೀರ್‌ ಭರ್ಜರಿ ಪ್ರದರ್ಶನ

ಗುವಾಂಗ್‌ಜೌ: ಒಲಿಂಪಿಕ್‌ ಬೆಳ್ಳಿ ಪದಕ ವಿಜೇತೆ ಪಿ.ವಿ.ಸಿಂಧೂ 2018ನೇ ಸಾಲಿನ ಬಿಡಬ್ಲ್ಯುಎಫ್‌ ವಿಶ್ವ ಟೂರ್‌ ಫೈನಲ್ಸ್‌ನಲ್ಲಿ ಅಜೇಯ ಓಟ ಮುಂದುವರಿಸಿ ಸೆಮಿಫೈನಲ್ಸ್‌ ಪ್ರವೇಶಿಸಿದ್ದಾರೆ. ಅಂತೆಯೇ ಪುರುಷರ ಸಿಂಗಲ್ಸ್‌ನಲ್ಲಿ ಸಮೀರ್‌ ವರ್ಮಾ ಕೂಡ ನಾಕ್‌ಔಟ್‌ ಹಂತಕ್ಕೆ ಲಗ್ಗೆ ಹಾಕಿದ್ದಾರೆ.

ಸತತ 3ನೇ ಬಾರಿ ವರ್ಷಾಂತ್ಯದ ಫೈನಲ್ಸ್‌ನಲ್ಲಿ ಆಡುತ್ತಿರುವ ಸಿಂಧೂ ಶುಕ್ರವಾರ ವಿಶ್ವದ 12ನೇ ಶ್ರೇಯಾಂಕದ ಆಟಗಾರ್ತಿ ಅಮೆರಿಕದ ಬೈವೆನ್‌ ಝಾಂಗ್‌ ಅವರನ್ನು 21-9, 21-15 ಗೇಮ್‌ಗಳಿಂದ ಮಣಿಸಿ ಸತತ 3 ಜಯಗಳೊಂದಿಗೆ ಎ ಗುಂಪಿನ ಅಗ್ರ ಸ್ಥಾನಿಯಾಗಿ 4ರ ಘಟ್ಟ ಪ್ರವೇಶಿಸಿದರು.

ಸಮೀರ್‌ಗೆ ಸತತ 2ನೇ ಜಯ

ಬಿ ಗುಂಪಿನ ಆರಂಭಿಕ ಪಂದ್ಯದಲ್ಲಿ ವಿಶ್ವದ ಅಗ್ರ ಶ್ರೇಯಾಂಕದ ಆಟಗಾರ ಜಪಾನ್‌ನ ಕೆಂಟೊ ಮೊಮೊಟೊ ವಿರುದ್ಧ ಸೋತಿದ್ದ ಸಮೀರ್‌ ವರ್ಮಾ ಆ ಬಳಿಕ ಆಡಿದ ಎರಡೂ ಪಂದ್ಯ ಗೆದ್ದು ಸೆಮಿಫೈನಲ್ಸ್‌ ಪ್ರವೇಶಿಸಿದರು. ಭಾರತೀಯ ಆಟಗಾರ ಶುಕ್ರವಾರ ಗುಂಪಿನ 3ನೇ ಹಾಗೂ ಕೊನೆಯ ಪಂದ್ಯದಲ್ಲಿ ಥಾಯ್ಲೆಂಡ್‌ನ ಕಾಂತಾಫನ್‌ ವಾಂಗ್‌ಚರೋನ್‌ ಅವರನ್ನು 21-9, 21-18 ಗೇಮ್‌ಗಳಿಂದ ಸೋಲಿಸಿದರು.