ಫ್ರೆಂಚ್ ಓಪನ್: ಸಿಂಧೂ ಶುಭಾರಂಭ

ಭಾರತದ ಅಗ್ರಮಾನ್ಯ ಆಟಗಾರ್ತಿ ಪಿ.ವಿ. ಸಿಂಧೂ ಪ್ಯಾರಿಸ್‌ನಲ್ಲಿ ಆರಂಭವಾಗಿರುವ ಫ್ರೆಂಚ್‌ ಓಪನ್‌ ಬಿಡಬ್ಲ್ಯುಎಫ್ ಟೂರ್ ಸೂಪರ್ 750 ಬ್ಯಾಡ್ಮಿಂಟನ್‌ ಟೂರ್ನಮೆಂಟ್‌ನಲ್ಲಿ ಶುಭಾರಂಭ ಮಾಡಿಕೊಂಡಿದ್ದಾರೆ.

ಮಹಿಳಾ ಸಿಂಗಲ್ಸ್‌ ವಿಭಾಗದ ಮೊದಲ ಸುತ್ತಿನಲ್ಲಿ ಪರಿಚಿತ ಎದುರಾಳಿ ಅಮೆರಿಕದ ಬಿವೆನ್‌ ಝಾಂಗ್‌ ವಿರುದ್ಧ 21-17, 21-8ರ ಅಂತರದ ಸುಲಭ ಗೆಲುವು ದಾಖಲಿಸಿ ದ್ವಿತೀಯ ಸುತ್ತಿಗೆ ಮುನ್ನಡೆದಿದ್ದಾರೆ.

ಇತ್ತೀಚೆಗೆ ಮುಕ್ತಾಯಗೊಂಡ ಡೆನ್ಮಾರ್ಕ್‌ ಓಪನ್‌ ಟೂರ್ನಿಯ ಮೊದಲ ಸುತ್ತಿನಲ್ಲಿ ಅಮೆರಿಕದ ಬಿವೆನ್‌ ಝಾಂಗ್‌ ವಿರುದ್ಧ ಸಿಂಧೂ ಆಘಾತ ಅನುಭವಿಸಿದ್ದರು. ಇದಕ್ಕೂ ಮೊದಲು 2017 ಇಂಡೋನೇಷ್ಯಾ ಓಪನ್ ಹಾಗೂ ಕಳೆದ ಫೆಬ್ರವರಿಯಲ್ಲಿ ನಡೆದ ಇಂಡಿಯಾ ಓಪನ್‌ನಲ್ಲೂ ಮುಗ್ಗರಿಸಿದ್ದರು.

ಇವೆಲ್ಲದಕ್ಕೂ ಫ್ರೆಂಚ್ ಓಪನ್ ಗೆಲುವಿನ ಮೂಲಕ ಸಿಂಧೂ ಸೇಡು ತೀರಿಸಿಕೊಂಡಿದ್ದಾರೆ.