ಎಟಿಪಿ ರ‍್ಯಾಂಕಿಂಗ್‌: ನಡಾಲ್‌ ನಂ.1

ಪ್ಯಾರಿಸ್‌: ಸ್ಪೇನ್‌ನ ಅನುಭವಿ ಆಟಗಾರ ರಾಫೆಲ್‌ ನಡಾಲ್‌, ಟೆನಿಸ್‌ ವೃತ್ತಿಪರರ ಸಂಸ್ಥೆ ಸೋಮವಾರ ಪ್ರಕಟಿಸಿದ ನೂತನ ರ‍್ಯಾಂಕಿಂಗ್‌ ಪಟ್ಟಿಯಲ್ಲಿ 2 ಸಾವಿರಕ್ಕೂ ಅಧಿಕ ಅಂಕಗಳ ಮುನ್ನಡೆಯಲ್ಲಿ ನಂ.1 ಸ್ಥಾನವನ್ನು ಮತ್ತಷ್ಟು ಭದ್ರ ಪಡಿಸಿಕೊಂಡಿದ್ದಾರೆ.

ಇತ್ತೀಚೆಗಷ್ಟೇ ಅಂತ್ಯಗೊಂಡ ವಿಂಬಲ್ಡನ್‌ ಗ್ರ್ಯಾನ್‌ ಸ್ಪ್ಯಾಮ್‌ ಟೂರ್ನಿಯಲ್ಲಿ ಸೆಮಿಫೈನಲ್‌ನಲ್ಲಿ ಸೋಲುಂಡ ನಡಾಲ್‌, ಇದಕ್ಕೂ ಮುನ್ನ ಫ್ರೆಂಚ್‌ ಓಪನ್‌ ಟೂರ್ನಿಯಲ್ಲಿ ವಿಶ್ವ ದಾಖಲೆಯ 11ನೇ ಪ್ರಶಸ್ತಿ ಮುಡಿಗೇರಿದಿದ್ದರು. ಈ ಮೂಲಕ 17ನೇ ಗ್ರ್ಯಾನ್‌ ಸ್ಪ್ಯಾಮ್‌ ಸಿಂಗಲ್ಸ್‌ ಪ್ರಶಸ್ತಿ ಗೆದ್ದ ನಡಾಲ್‌, ಎಟಿಪಿ ರ‍್ಯಾಂಕಿಂಗ್‌ನಲ್ಲಿ 9,310 ಅಂಕಗಳೊಂದಿಗೆ ನಂ.1 ಸ್ಥಾನದಲ್ಲಿ ಮುಂದುವರಿದಿದ್ದಾರೆ.

ಸ್ವಿಸ್‌ ಮಾಸ್ಟರ್‌ ರೋಜರ್‌ ಫೆಡರರ್‌, ಒಟ್ಟಾರೆ 7,080 ಅಂಕಗಳೊಂದಿಗೆ ದ್ವಿತೀಯ ಸ್ಥಾನದಲ್ಲಿದ್ದಾರೆ. ಯುವ ಪ್ರತಿಭೆ ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೆವ್‌ (5,665), ಅರ್ಜೆಂಟೀನಾದ ಜುವಾನ್‌ ಮಾರ್ಟಿನ್‌ ಡೆಲ್‌'ಪೋಟ್ರೊ (5,395) ಮತ್ತು ವಿಂಬಲ್ಡನ್‌ ರನ್ನರ್‌ಅಪ್‌ ದಕ್ಷಿಣ ಆಫ್ರಿಕಾದ ಕೆವಿನ್‌ ಆ್ಯಂಡರ್ಸನ್‌ (4,655) ಅಗ್ರ 5ರಲ್ಲಿರುವ ಆಟಗಾರರಾಗಿದ್ದಾರೆ. ಮತ್ತೊಂದೆಡೆ ವಿಂಬಲ್ಡನ್‌ ಗೆಲುವಿನೊಂದಿಗೆ ಸರ್ಬಿಯಾದ ತಾರೆ ನೊವಾಕ್‌ ಜೊಕೊವಿಕ್‌ 10ನೇ ರ‍್ಯಾಂಕ್ ಪಡೆದುಕೊಂಡಿದ್ದಾರೆ.

ರಾಮ್‌ ಕುಮಾರ್‌ಗೆ ನಿರಾಸೆ: ಅಮೆರಿಕದಲ್ಲಿ ನಡೆದ ಹಾಲ್‌ ಆಫ್‌ ಫೇಮ್‌ ಟೆನಿಸ್‌ ಚಾಂಪಿಯನ್‌ಷಿಪ್‌ನ ಫೈನಲ್‌ ಪಂದ್ಯದಲ್ಲಿ ಭಾರತದ ರಾಮ್‌ಕುಮಾರ್‌ ರಾಮನಾಥನ್‌ ಫೈನಲ್‌ನಲ್ಲಿ ನಿರಾಸೆ ಅನುಭವಿಸಿದ್ದಾರೆ. 23 ವರ್ಷದ ಯುವ ಪ್ರತಿಭೆ ರಾಮ್‌ಕುಮಾರ್‌, ಫೈನಲ್‌ ಪಂದ್ಯದಲ್ಲಿ 5-7, 6-3, 2-6ರ ಅಂತರದಲ್ಲಿ ಅಮೆರಿಕದ ಸ್ಟೀವ್‌ ಜಾನ್ಸನ್‌ ವಿರುದ್ಧ ಸೋಲುಂಡರು.