ರಾಮ್‌ಕುಮಾರ್‌-ವಿಜಯ್‌ ಚಾಂಪಿಯನ್ಸ್‌

ಪುಣೆ : ಭಾರತದ ರಾಮ್‌ಕುಮಾರ್‌ ರಾಮನಾಥನ್‌ ವೈಯಕ್ತಿಕವಾಗಿ ಅತ್ಯುತ್ತಮ ಪ್ರದರ್ಶನ ಸಂಘಟಿಸುವುದರೊಂದಿಗೆ ವಿಜಯ್‌ ಸುಂದರ್‌ ಪ್ರಶಾಂತ್‌ ಜತೆ ಪುಣೆ ಎಟಿಪಿ ಚಾಲೆಂಜರ್‌ ಟ್ರೋಫಿ ಟೆನಿಸ್‌ ಟೂರ್ನಿಯಲ್ಲಿ ಡಬಲ್ಸ್‌ ಪ್ರಶಸ್ತಿಗೆ ಭಾಜನರಾಗಿದ್ದಾರೆ. ಎಟಿಪಿ ಚಾಲೆಂಜರ್‌ ಸರ್ಕಿಟ್‌ನಲ್ಲಿ ರಾಮ್‌ಕುಮಾರ್‌ ಗೆದ್ದ ಚೊಚ್ಚಲ ಡಬಲ್ಸ್‌ ಪ್ರಶಸ್ತಿ ಇದು.

ಇಲ್ಲಿ ಶನಿವಾರ ನಡೆದ ಪ್ರಶಸ್ತಿ ಸುತ್ತಿನ ಸಮರದಲ್ಲಿ ಶ್ರೇಯಾಂಕರಹಿತ ರಾಮ್‌ಕುಮಾರ್‌ ಮತ್ತು ವಿಜಯ್‌ ಸುಂದರ್‌ ಜೋಡಿ ಚೈನಾ ತೈಪೆಯ ಸಂಗ್‌-ಹುವಾ ಯಾಂಗ್‌ ಮತ್ತು ಚೆಂಗ್‌-ಪೆಂಗ್‌ ಜೋಡಿಯನ್ನು 7-6(3), 6-7(5), 10-7 ಸೆಟ್‌ಗಳಿಂದ ಸೋಲಿಸಿತು.

ಸಹಆಟಗಾರ ವಿಜಯ್‌ ಸುಂದರ್‌ ಸ್ವಲ್ಪ ಮಟ್ಟಿಗೆ ಕಳೆಗುಂದಿದ್ದ ಕಾರಣ ಪಂದ್ಯದ ಸಂಪೂರ್ಣ ಜವಾಬ್ದಾರಿಯನ್ನು ಹೆಗಲಿಗೇರಿಸಿಕೊಂಡ ರಾಮ್‌ಕುಮಾರ್‌ ಬೇಸ್‌ಲೈನ್‌ನಲ್ಲಿ ಅದ್ಭುತ ಕೈಚಳಕ ತೋರಿ ಎದುರಾಳಿಗಳ ಮೇಲೆ ಪಾರಮ್ಯ ಮೆರೆದರು.

ಇದೇ 19ರಂದು ಆರಂಭಗೊಂಡಿದ್ದ ಟೂರ್ನಿ ಶನಿವಾರ ಮುಕ್ತಾಯಗೊಂಡಿತು.