ಮಹಾರಾಷ್ಟ್ರ 245ಕ್ಕೆ ಆಲ್ಔಟ್, ಕರ್ನಾಟಕ 117/0 | ಮೊದಲ ದಿನವೇ ರಾಜ್ಯ ಪಡೆಗೆ ಮೇಲುಗೈ
ಪುಣೆ: ನಾಯಕ ವಿನಯ್ ಕುಮಾರ್(59ಕ್ಕೆ6) ಅವರ ಬೌಲಿಂಗ್ ಆರ್ಭಟ ಒಂದೆಡೆಯಾದರೆ, ಮತ್ತೊಂದೆಡೆ ಸಮರ್ಥ್(47*) ಮತ್ತು ಮಯಾಂಕ್ ಅಗರ್ವಾಲ್(50*) ಜೋಡಿಯ ಅಜೇಯ ಶತಕದ ಜತೆಯಾಟ. ಇದರ ಪರಿಣಾಮ ಆತಿಥೇಯ ಮಹಾರಾಷ್ಟ್ರ ವಿರುದ್ಧದ ರಣಜಿ ಪಂದ್ಯದ ಮೊದಲ ದಿನವೇ ಪ್ರವಾಸಿ ಕರ್ನಾಟಕ ತಂಡದ ಮೆರೆದಾಟ.
ಇಲ್ಲಿನ ಮಹಾರಾಷ್ಟ್ರ ಕ್ರಿಕೆಟ್ ಸಂಸ್ಥೆ(ಎಂಸಿಎ) ಕ್ರೀಡಾಂಗಣದಲ್ಲಿ ಬುಧವಾರ ಆರಂಭಗೊಂಡ 'ಎ' ಗುಂಪಿನ ತನ್ನ 3ನೇ ಪಂದ್ಯದ ಪ್ರಥಮ ದಿನವೇ ಕರ್ನಾಟಕ ಮೇಲುಗೈ ಸಾಧಿಸಿತು. ಟಾಸ್ ಸೋತು ಮೊದಲು ಬ್ಯಾಟ್ ಮಾಡಿದ ಮಹಾರಾಷ್ಟ್ರ ತಂಡ, ವಿನಯ್ ಕುಮಾರ್ ದಾಳಿಗೆ ಕಂಗೆಟ್ಟು ತನ್ನ ಪ್ರಥಮ ಇನಿಂಗ್ಸ್ನಲ್ಲಿ 55 ಓವರ್ಗಳಲ್ಲಿ ಕೇವಲ 245 ರನ್ಗಳಿಗೆ ಆಲ್ಔಟಾಯಿತು.
ಆತಿಥೇಯರನ್ನು ಸಾಧಾರಣ ಮೊತ್ತಕ್ಕೆ ಕಟ್ಟಿ ಹಾಕಿದ ನಂತರ ತನ್ನ ಮೊದಲ ಇನಿಂಗ್ಸ್ ಆರಂಭಿಸಿದ ಕರ್ನಾಟಕ ತಂಡ, ದಿನದಂತ್ಯಕ್ಕೆ 31 ಓವರ್ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 117 ರನ್ ಗಳಿಸಿತು.
ಆರಂಭಿಕರ ಅಜೇಯ ಆಟ
ಹ್ಯಾಟ್ರಿಕ್ ಜಯದ ನಿರೀಕ್ಷೆಯಲ್ಲಿರುವ ಕರ್ನಾಟಕ ತಂಡಕ್ಕೆ ಆರಂಭಿಕರಾದ ಆರ್.ಸಮರ್ಥ್ ಮತ್ತು ಮಯಾಂಕ್ ಅಗರ್ವಾಲ್ ಅಜೇಯ ಶತಕದ ಜತೆಯಾಟದೊಂದಿಗೆ ಭದ್ರ ಅಡಿಪಾಯ ಹಾಕಿಕೊಟ್ಟರು. ಭಾರತ 'ಎ' ಪರ ಆಡಿದ ಅನುಭವ ಹೊಂದಿರುವ ಉಭಯ ಆಟಗಾರರು, ಆತಿಥೇಯರ ದಾಳಿಯನ್ನು ಸಮರ್ಥವಾಗಿ ಎದುರಿಸಿ ಮುರಿಯದ ಮೊದಲ ವಿಕೆಟ್ಗೆ 117 ರನ್ ಸೇರಿಸಿದರು. ಕಳೆದ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ 3ನೇ ಕ್ರಮಾಂಕದಲ್ಲಿ ಆಡಿ ಎರಡೂ ಇನಿಂಗ್ಸ್ಗಳಲ್ಲಿ ಸೊನ್ನೆ ಸುತ್ತಿದ್ದ ಮಯಾಂಕ್, ಈ ಬಾರಿ ಎಚ್ಚರಿಕೆಯ ಆಟ ಪ್ರದರ್ಶಿಸಿ ಅಜೇಯ ಅರ್ಧಶತಕ ಗಳಿಸಿದರು. 94 ಎಸೆತಗಳನ್ನೆದುರಿಸಿದ ಮಯಾಂಕ್ 6 ಬೌಂಡರಿಗಳೊಂದಿಗೆ ಔಟಾಗದೆ 50 ರನ್ ಕಲೆ ಹಾಕಿದರೆ, ಸಮರ್ಥ ಸಾಥ್ ನೀಡಿದ ಸಮರ್ಥ್ 93 ಎಸೆತಗಳಲ್ಲಿ 6 ಬೌಂಡರಿಗಳ ಸಹಿತ ಅಜೇಯ 47 ರನ್ ಗಳಿಸಿ 2ನೇ ದಿನಕ್ಕೆ ಕ್ರೀಸ್ ಕಾಯ್ದುಕೊಂಡರು.
ವಿನಯ್ ಅಮೋಘ ದಾಳಿ
ಕರ್ನಾಟಕ ಪರ ದಾಖಲೆಯ 50ನೇ ರಣಜಿ ಪಂದ್ಯದಲ್ಲಿ ಕರ್ನಾಟಕ ತಂಡವನ್ನು ಮುನ್ನಡೆಸುತ್ತಿರುವ ಆರ್.ವಿನಯ್ ಕುಮಾರ್ ಈ ಸಂಭ್ರಮವನ್ನು 6 ವಿಕೆಟ್ಗಳೊಂದಿಗೆ ಆಚರಿಸಿದರು. ಟಾಸ್ ಗೆದ್ದು ಬೌಲಿಂಗ್ ಆಯ್ದುಕೊಂಡ ತಮ್ಮ ನಿರ್ಧಾರವನ್ನು ಮುಂಚೂಣಿಯಲ್ಲಿ ನಿಂತು ಸಮರ್ಥಿಸಿಕೊಂಡ ವಿನಯ್, ಮಹಾರಾಷ್ಟ್ರ ಬ್ಯಾಟಿಂಗ್ ಕ್ರಮಾಂಕದ ಮೇಲೆ ಮಾರಕವಾಗಿ ಎರಗಿದರು. ದೇಶೀಯ ಕ್ರಿಕೆಟ್ನ ಶ್ರೇಷ್ಠ ಆಟಗಾರನೆನಿಸಿಕೊಂಡಿರುವ ವಿನಯ್ ಅವರ ಸ್ವಿಂಗ್ ದಾಳಿಗೆ ಆತಿಥೇಯ ತಂಡ ಅಕ್ಷ ರಶಃ ತತ್ತರಿಸಿ ಹೋಯಿತು. ವೇಗಿಗಳಿಗೆ ನೆರವು ನೀಡುತ್ತಿದ್ದ ಪಿಚ್ನಲ್ಲಿ ಅಬ್ಬರಿಸಿದ ವಿನಯ್, ತಮ್ಮ 3ನೇ ಓವರ್ನಿಂದಲೇ ವಿಕೆಟ್ ಬೇಟೆ ಆರಂಭಿಸಿ ಸ್ವಪ್ನಿಲ್ ಗುಗಾಲೆ(6), ಹರ್ಷದ್ ಖಡಿವಾಲೆ(10), ನಾಯಕ ಅಂಕಿತ್ ಬಾವ್ನೆ(1) ಮತ್ತು ರೋಹಿತ್ ಮೋಟ್ವಾನಿ(4) ಅವರನ್ನು ಬೆನ್ನು ಬೆನ್ನಿಗೆ ಪೆವಿಲಿಯನ್ಗಟ್ಟಿ ರಾಜ್ಯಕ್ಕೆ ಭರ್ಜರಿ ಆರಂಭ ಒದಗಿಸಿದರು.
ಆತಿಥೇಯರ ಬೆನ್ನು ಮುರಿದ ವಿನಯ್ ನಂತರ ಕೊನೆಯ ಸರದಿಯ ಇಬ್ಬರು ಆಟಗಾರರಾದ ಪ್ರದೀಪ್ ದಾಧೆ(1) ಮತ್ತು ಸಮದ್ ಫಲ್ಲಾ(12) ವಿಕೆಟ್ ಕಬಳಿಸಿ, ಇನಿಂಗ್ಸ್ನಲ್ಲಿ 6 ವಿಕೆಟ್ಗಳ ಅಮೋಘ ಸಾಧನೆ ಮಾಡಿದರು.
ತ್ರಿಪಾಠಿ ಶತಕದ ಹೋರಾಟ
ದಾವಣಗೆರೆ ಎಕ್ಸ್ಪ್ರೆಸ್ ದಾಳಿಗೆ ಹಳಿ ತಪ್ಪಿ 28 ರನ್ಗಳಿಗೆ 5 ವಿಕೆಟ್ ಕಳೆದುಕೊಂಡಿದ್ದ ಮಹಾರಾಷ್ಟ್ರ ಅಲ್ಪ ಮೊತ್ತಕ್ಕೆ ಕುಸಿಯುವ ಭೀತಿಯಲ್ಲಿತ್ತು. ಈ ಸಂಕಷ್ಟದ ಸನ್ನಿವೇಶದಲ್ಲಿ ನೌಶದ್ ಶೇಖ್(69) ಮತ್ತು ರಾಹುಲ್ ತ್ರಿಪಾಠಿ(120) ಪ್ರತಿ ಹೋರಾಟ ಸಂಘಟಿಸಿ 6ನೇ ವಿಕೆಟ್ಗೆ 147 ರನ್ಗಳ ಜತೆಯಾಟದೊಂದಿಗೆ ಆಸರೆಯಾದರು. ಕಳೆದ ಐಪಿಎಲ್ನಲ್ಲಿ ರೈಸಿಂಗ್ ಪುಣೆ ಸೂಪರ್ಜಯಂಟ್ಸ್ ಪರ ಮಿಂಚಿದ್ದ ತ್ರಿಪಾಠಿ, ರಾಜ್ಯ ಪಡೆಯ ದಾಳಿಗೆ ಸಡ್ಡು ಹೊಡೆದು ಬಿರುಸಿನ ಶತಕ ಬಾರಿಸಿದರು. ಅಪಾಯಕಾರಿಯಾಗಿ ಬೆಳೆಯುತ್ತಿದ್ದ ಈ ಜೋಡಿಯನ್ನು ಕೊನೆಗೂ ಬೇರ್ಪಡಿಸುವಲ್ಲಿ ಆಲ್ರೌಂಡರ್ ಪವನ್ ದೇಶಪಾಂಡೆ ಯಶಸ್ವಿಯಾದರು. ಆಫ್ಸ್ಪಿನ್ ದಾಳಿಯಿಂದ ನೌಶದ್ರನ್ನು ಎಲ್ಬಿಡಬ್ಲ್ಯು ಬಲೆಗೆ ಬೀಳಿಸಿದ ದೇಶಪಾಂಡೆ, ಕರ್ನಾಟಕ ಮುಂದಿದ್ದ ಅಡ್ಡಿಯನ್ನು ನಿವಾರಿಸಿದರು. 114 ಎಸೆತಗಳಲ್ಲಿ 13 ಬೌಂಡರಿ, 3 ಸಿಕ್ಸರ್ಗಳ ಸಹಿತ 120 ರನ್ ಸಿಡಿಸಿದ ತ್ರಿಪಾಠಿಗೆ ಸ್ಟುವರ್ಟ್ ಬಿನ್ನಿ ಪೆವಿಲಿಯನ್ ಹಾದಿ ತೋರಿದರು. ಹೀಗೆ 70 ರನ್ಗಳ ಅಂತರದಲ್ಲಿ ಕೊನೆಯ 5 ವಿಕೆಟ್ ಕಳೆದುಕೊಂಡ ಮಹಾರಾಷ್ಟ್ರ ಸಾಧಾರಣ ಮೊತ್ತಕ್ಕೆ ಕುಸಿಯಿತು.
ನಿಶ್ಚಲ್ ಸ್ಮರಣೀಯ ಪದಾರ್ಪಣೆ
ಪ್ರತಿಭಾನ್ವಿತ ಯುವ ಬಲಗೈ ಬ್ಯಾಟ್ಸ್ಮನ್ ಡಿ.ನಿಶ್ಚಲ್ ಈ ಪಂದ್ಯದ ಮೂಲಕ ರಣಜಿ ಟ್ರೋಫಿಗೆ ಪದಾರ್ಪಣೆ ಮಾಡಿದರು. ಚೊಚ್ಚಲ ಪಂದ್ಯದಲ್ಲೇ ನಿಶ್ಚಲ್ 4 ಕ್ಯಾಚ್ಗಳೊಂದಿಗೆ ಮಿಂಚಿದ್ದು ವಿಶೇಷ. ಅದರಲ್ಲೂ ಮಿಥುನ್ ದಾಳಿಯಲ್ಲಿ ರುತುರಾಜ್ ಗಾಯಕ್ವಾಡ್ ಮತ್ತು ವಿನಯ್ ಬೌಲಿಂಗ್ನಲ್ಲಿ ರೋಹಿತ್ ಮೋಟ್ವಾನಿ ನೀಡಿದ ಕ್ಯಾಚನ್ನು ನಿಶ್ಚಲ್ ಶಾರ್ಟ್ ಲೆಗ್ನಲ್ಲಿ ಅದ್ಭುತವಾಗಿ ಹಿಡಿದರು.
ಸ್ಕೋರ್ ವಿವರ
ಮಹಾರಾಷ್ಟ್ರ: ಪ್ರಥಮ ಇನಿಂಗ್ಸ್ 245 (55)
ಸ್ವಪ್ನಿಲ್ ಗುಗಾಲೆ ಬಿ ವಿನಯ್ 06
ಹರ್ಷದ್ ಖಡಿವಾಲೆ ಸಿ ಗೌತಮ್ ಬಿ ವಿನಯ್ 10
ರುತುರಾಜ್ ಗಾಯಕ್ವಾಡ್ ಸಿ ನಿಶ್ಚಲ್ ಬಿ ಮಿಥುನ್ 05
ಅಂಕಿತ್ ಬಾವ್ನೆ ಸಿ ಪವನ್ ಬಿ ವಿನಯ್ 01
ನೌಶದ್ ಶೇಖ್ ಎಲ್ಬಿಡಬ್ಲ್ಯು ಬಿ ಪವನ್ 69
ರೋಹಿತ್ ಮೋಟ್ವಾನಿ ಸಿ ನಿಶ್ಚಲ್ ಬಿ ವಿನಯ್ 04
ರಾಹುಲ್ ತ್ರಿಪಾಠಿ ಸಿ ನಿಶ್ಚಲ್ ಬಿ ಬಿನ್ನಿ 120
ಚಿರಾಗ್ ಖುರಾನ ಸಿ ನಿಶ್ಚಲ್ ಬಿ ಪವನ್ 04
ನಿಕಿತ್ ಧುಮಾಲ್ ಔಟಾಗದೆ 06
ಪ್ರದೀಪ್ ದಾಧೆ ಎಲ್ಬಿಡಬ್ಲ್ಯು ಬಿ ವಿನಯ್ 01
ಸಮದ್ ಫಲ್ಲಾ ಸಿ ಗೌತಮ್ ಬಿ ವಿನಯ್ 12
ಇತರೆ: (ಬೈ-4, ನೋಬಾಲ್-1, ವೈಡ್-2) 07
ವಿಕೆಟ್ ಪತನ: 1-10, 2-21, 3-21, 4-24, 5-28, 6-175, 7-189, 8-226, 9-231, 10-245.
ಬೌಲಿಂಗ್ ವಿವರ
ಆರ್.ವಿನಯ್ ಕುಮಾರ್ 14 1 59 6
ಅಭಿಮನ್ಯು ಮಿಥುನ್ 12 2 34 1
ಸ್ಟುವರ್ಟ್ ಬಿನ್ನಿ 8.3 0 43 1
ರೋನಿತ್ ಮೋರೆ 8.3 0 34 0
ಕೆ.ಗೌತಮ್ 5 1 33 0
ಪವನ್ ದೇಶಪಾಂಡೆ 7 0 38 2
ಕರ್ನಾಟಕ: ಪ್ರಥಮ ಇನಿಂಗ್ಸ್ 117/0 (31)
ಆರ್.ಸಮರ್ಥ್ ಔಟಾಗದೆ 47
ಮಯಾಂಕ್ ಅಗರ್ವಾಲ್ ಔಟಾಗದೆ 50
ಇತರೆ: (ಬೈ-8, ವೈಡ್-11, ನೋಬಾಲ್-1) 20
ಬೌಲಿಂಗ್ ವಿವರ
ಸಮದ್ ಫಲ್ಲಾ 9 3 19 0
ನಿಕಿತ್ ಧುಮಾಲ್ 9 0 34 0
ಪ್ರದೀಪ್ ದಾಧೆ 5 0 32 0
ಚಿರಾಗ್ ಖುರಾನ 8 0 24 0