ರಾಂಕಿ-ಚಿರಾಗ್‌ ಜೋಡಿಯ ಮುಡಿಗೆ ಥಾಯ್ಲೆಂಡ್‌ ಮುಕುಟ

ಬ್ಯಾಂಕಾಕ್‌ :ಭಾರತದ ಮುಂಚೂಣಿ ಬ್ಯಾಡ್ಮಿಂಟನ್‌ ಜೋಡಿಯಾದ ಸಾತ್ವಿಕ್‌ಸಾಯಿರಾಜ್‌ ರಾಂಕಿ ರೆಡ್ಡಿ ಮತ್ತು ಚಿರಾಗ್‌ ಶೆಟ್ಟಿ ದೂರದ ಥಾಯ್ಲೆಂಡ್‌ನಲ್ಲಿ ಸದ್ದಿಲ್ಲದೆ ಸುದ್ದಿ ಮಾಡಿದ್ದಾರೆ. ಥಾಯ್ಲೆಂಡ್‌ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಪುರುಷರ ಡಬಲ್ಸ್‌ ವಿಭಾಗದಲ್ಲಿ ಚಾಂಪಿಯನ್‌ ಪಟ್ಟಕ್ಕೇರುವ ಮೂಲಕ ಹೊಸ ಇತಿಹಾಸ ನಿರ್ಮಿಸಿದ್ದಾರೆ.

ಟೂರ್ನಿಯ ಆರಂಭದಿಂದಲೂ ಅಪ್ರತಿಮ ಪ್ರದರ್ಶನ ಸಂಘಟಿಸಿದ ರೆಡ್ಡಿ-ಶೆಟ್ಟಿ ಜೋಡಿ ಭಾನುವಾರ ನಡೆದ ಫೈನಲ್‌ನಲ್ಲಿ ಚೀನಾದ ಲಿ ಜನ್‌ ಹುಯಿ ಮತ್ತು ಲಿಯು ಯು ಚೆನ್‌ ವಿರುದ್ಧ ಗೆದ್ದು ಚಾರಿತ್ರಿಕ ಸಾಧನೆಗೈಯಿತು. ಬಿಡಬ್ಲ್ಯುಎಫ್‌ ಸೂಪರ್‌ 500 ಬ್ಯಾಡ್ಮಿಂಟನ್‌ ಟೂರ್ನಿಯಲ್ಲಿ ಭಾರತದ ಪುರುಷರ ಜೋಡಿಯೊಂದು ಚಾಂಪಿಯನ್‌ ಆಗಿದ್ದು ಇದೇ ಮೊದಲು.

ಶ್ರೇಯಾಂಕರಹಿತರಾಗಿ ಟೂರ್ನಿಗೆ ಎಂಟ್ರಿ ಕೊಟ್ಟಿದ್ದ ರಾಂಕಿ ರೆಡ್ಡಿ-ಚಿರಾಗ್‌ ಶೆಟ್ಟಿ ಜೋಡಿ 62 ನಿಮಿಷಗಳಲ್ಲಿ ಟೂರ್ನಿಯ 3ನೇ ಶ್ರೇಯಾಂಕದ ಜೋಡಿಯನ್ನು 21-19, 18-21, 21-18 ಗೇಮ್‌ಗಳಿಂದ ಸೋಲಿಸಿತು. 2018ರ ಕಾಮನ್ವೆಲ್ತ್‌ ಗೇಮ್ಸ್‌ ಬೆಳ್ಳಿ ಪದಕ ವಿಜೇತ ಭಾರತದ ಜೋಡಿಗೆ 2019ರ ಋುತುವಿನಲ್ಲಿ ದಕ್ಕಿದ ಮೊದಲ ಪ್ರಶಸ್ತಿ ಇದು. ಇದರೊಂದಿಗೆ ಭಾರತದ ವಿಶ್ವ ಬ್ಯಾಡ್ಮಿಂಟನ್‌ ಡಬಲ್ಸ್‌ ಪ್ರಶಸ್ತಿ ಬರವೂ ನೀಗಿದಂತಾಗಿದೆ.

ವಿಶ್ವದ 16ನೇ ಶ್ರೇಯಾಂಕದ ರಾಂಕಿ-ಚಿರಾಗ್‌ ಜೋಡಿ 21-19 ಅಂಕಗಳಿಂದ ಮೊದಲ ಗೇಮ್‌ ಜಯಿಸಿತು. ಆದರೆ, ಅಷ್ಟರಲ್ಲಿ ಎಚ್ಚೆತ್ತುಕೊಂಡ ಚೀನಾ ಜೋಡಿ 21-18 ಅಂಕಗಳಿಂದ 2ನೇ ಗೇಮ್‌ ಕಸಿದುಕೊಂಡಿತು. ಏನೇ ಆದರೂ, 3ನೇ ಗೇಮ್‌ನಲ್ಲಿ ಭಾರತೀಯ ವೀರೋಚಿತ ಹೋರಾಟದ ಮುಂದೆ ಚೀನೀಯರ ಆಟ ಸಾಗಲಿಲ್ಲ. 21-18 ಅಂಕಗಳಿಂದ ಗೇಮ್‌ ಭಾರತದ ಪಾಲಾಯಿತು. ಭಾರತೀಯರ ಸಂಭ್ರಮವೂ ಮುಗಿಲು ಮುಟ್ಟಿತು.

ಸಿಂಗಲ್ಸ್‌ನಲ್ಲಿ ಸೈನಾ ನೆಹ್ವಾಲ್‌, ಕಿಡಂಬಿ ಶ್ರೀಕಾಂತ್‌, ಸಾಯಿ ಪ್ರಣೀತ್‌ ಮುಂತಾದ ಘಟಾನುಘಟಿ ಆಟಗಾರರು ಗಂಟುಮೂಟೆ ಕಟ್ಟಿದ ಬಳಿಕ ರಾಂಕಿ-ಚಿರಾಗ್‌ ಜೋಡಿ ಭಾರತದ ಪಾಲಿನ ಏಕೈಕ ಆಶಾಕಿರಣವಾಗಿ ಸ್ಪರ್ಧೆಯಲ್ಲಿ ಉಳಿದುಕೊಂಡಿತ್ತು. ಕೊನೆಗೂ ಭಾರತೀಯರ ಕನಸು ನನಸು ಮಾಡಿದ ಹಿರಿಮೆಗೆ ಜೋಡಿ ಭಾಜನವಾಯಿತು.