ಟೀ ಮಾರಾಟಗಾರ ಈಗ ಏಷ್ಯನ್‌ ಗೇಮ್ಸ್‌ ಕಂಚು ವಿಜೇತ

ಹೊಸದಿಲ್ಲಿ: ಇಂಡೊನೇಷ್ಯಾ ಏಷ್ಯಾಡ್‌ನಲ್ಲಿ ಕಂಚಿನ ಪದಕ ಗೆದ್ದ ಭಾರತದ ಸೆಪಕ್‌ಟಕ್ರಾ ತಂಡದ ಸದಸ್ಯ ಹರೀಶ್‌ ಕುಮಾರ್‌ ಟೀ ಮಾರಾಟ ಮಾಡುವ ಕುಟುಂಬದ ಕುಡಿ ಎಂಬ ಸಂಗತಿ ಇದೀಗ ಬೆಳಕಿಗೆ ಬಂದಿದೆ. ಕುಟುಂಬದ ಪಾಲನೆಗಾಗಿ ತಂದೆಯ ಟೀ ಅಂಗಡಿಯಲ್ಲಿ ಕಾಯಕ ಅರಸಿಕೊಂಡಿದ್ದಾರೆ ಹರೀಶ್‌ ಕುಮಾರ್‌. ತಂದೆ ಆಟೊ ಡ್ರೈವರ್‌ ಕೂಡ ಆಗಿರುವ ಕಾರಣ ಟೀ ಅಂಗಡಿಯಲ್ಲಿ ಹರೀಶ್‌ ಇರುವುದೇ ಹೆಚ್ಚು. ಹಾಗಂತ ಹರೀಶ್‌ ತಾನು ಮುಂದುವರಿಯಲು ಬಯಸಿರುವ ಕ್ರೀಡೆಗೆ ನ್ಯಾಯ ಒದಗಿಸುವಲ್ಲಿ ಹಿಂದೆಬಿದ್ದಿಲ್ಲ. ಸೆಪಕ್‌ಟಕ್ರಾ ಅಭ್ಯಾಸ ಆತನ ದಿನಚರಿಯ ಒಂದು ಭಾಗವೇ ಆಗಿಹೋಗಿದೆ.

''ನಮ್ಮ ಕುಟುಂಬದಲ್ಲಿ ತುಂಬ ಸದಸ್ಯರಿದ್ದಾರೆ. ಆದರೆ ಆದಾಯ ತೀರಾ ಕಡಿಮೆ. ಕುಟುಂಬದ ಪಾಲನೆಗಾಗಿ ಟೀ ಅಂಗಡಿಯಲ್ಲಿ ತಂದೆಗೆ ನೆರವಾಗುತ್ತಿದ್ದೇನೆ. ಪ್ರತಿ ದಿನ ಮಧ್ಯಾಹ್ನ 2ರಿಂದ ಸಂಜೆ 6 ಗಂಟೆ ತನಕ ಅಭ್ಯಾಸಕ್ಕೆ (ಸ್ಪೋರ್ಟ್ಸ್) ಮೀಸಲಿಟ್ಟಿದ್ದೇನೆ. 2011ರಿಂದ ಸೆಪಕ್‌ಟಕ್ರಾದಲ್ಲಿ ತೊಡಗಿಸಿಕೊಂಡಿದ್ದೇನೆ. ನನ್ನ ಕೋಚ್‌ ಹೇಮರಾಜ್‌ ನನ್ನನ್ನು ಭಾರತೀಯ ಕ್ರೀಡಾ ಪ್ರಾಧಿಕಾರಕ್ಕೆ ಸೇರಿಸಿದರು. ಅದಾದ ಬಳಿಕ ಸ್ಪೋರ್ಟ್ಸ್ ಕಿಟ್‌ ಮತ್ತು ಪ್ರತಿ ತಿಂಗಳು ಹಣ ಸಿಗುತ್ತಿದೆ,'' ಎಂದು ಹರೀಶ್‌ ಕುಮಾರ್‌ ಹೇಳಿದ್ದಾರೆ.