ಫೆಡರರ್‌ ಮುಡಿಗೆ 101ನೇ ಗರಿ

ಮಿಯಾಮಿ: ಸಾರ್ವಕಾಲಿಕ ಶ್ರೇಷ್ಠ ಟೆನಿಸ್‌ ಆಟಗಾರ ಸ್ವಿಸ್‌ ಮಾಸ್ಟರ್‌ ರೋಜರ್‌ ಫೆಡರರ್‌ ಇಲ್ಲಿ ನಡೆದ ಎಟಿಪಿ ಮಿಯಾಮಿ ಮಾಸ್ಟರ್ಸ್‌ ಟೂರ್ನಿಯಲ್ಲಿ ವೃತ್ತಿ ಬದುಕಿನ 101ನೇ ಸಿಂಗಲ್ಸ್‌ ಪ್ರಶಸ್ತಿ ಮುಡಿಗೇರಿಸಿದ್ದಾರೆ.

ಕಳೆದ ತಿಂಗಳು ದುಬೈ ಚಾಂಪಿಯನ್‌ಷಿಪ್‌ನಲ್ಲಿ ಪ್ರಶಸ್ತಿ ಗೆದ್ದು 100ನೇ ಕಿರೀಟ ತೊಟ್ಟ 37 ವರ್ಷದ ಅನುಭವಿ ಆಟಗಾರ ಫೆಡರರ್‌, ಭಾನುವಾರ ತಡರಾತ್ರಿ ನಡೆದ ಮಿಯಾಮಿ ಮಾಸ್ಟರ್ಸ್‌ ಫೈನಲ್‌ನಲ್ಲಿ ಕಳೆದ ವರ್ಷದ ಚಾಂಪಿಯನ್‌ ಅಮೆರಿಕದ ಜಾನ್‌ ಇಸ್ನರ್‌ ಅವರನ್ನು 6-1, 6-4 ಅಂತರದ ನೇರ ಸೆಟ್‌ಗಳಿಂದ ಮಣಿಸಿ ಟ್ರೋಫಿ ಎತ್ತಿ ಹಿಡಿದರು. ಮಿಯಾಮಿ ಅಂಗಣದಲ್ಲಿ ಫೆಡರರ್‌ ಗೆದ್ದ 4ನೇ ಟ್ರೋಫಿ ಇದಾಗಿದೆ.

ಕೇವಲ 63 ನಿಮಿಷಗಳಲ್ಲಿ ಇಸ್ನರ್‌ ಸವಾಲನ್ನು ಗೆದ್ದ ರೋಜರ್‌, ಈ ವರ್ಷ ಮತ್ತಷ್ಟು ಪ್ರಶಸ್ತಿಗಳನ್ನು ಗೆದ್ದುಕೊಳ್ಳುವ ಪ್ರಬಲ ಸಂದೇಶ ರವಾನಿಸಿದ್ದಾರೆ. ಕಳೆದ ಎರಡು ವರ್ಷಗಳಿಂದ ಕ್ಲೇ ಕೋರ್ಟ್‌ ಟೂರ್ನಿಗಳಿಂದ ದೂರ ಉಳಿದಿರುವ ಫೆಡರರ್‌ ಈ ಬಾರಿ ಮ್ಯಾಡ್ರಿಡ್‌ ಓಪನ್‌ನಲ್ಲಿ ಆಡಲಿದ್ದಾರೆ.

''ಕ್ಲೇ ಕೋರ್ಟ್‌ನಲ್ಲಿನ ಮತ್ತೆ ಅಂಬೆಗಾಲಿಡಲಿದ್ದೇನೆ. ಕಳೆದ ಕೆಲ ವರ್ಷಗಳಲ್ಲಿ ಕೆಲವೇ ಕೆಲವು ಬಾರಿಯಷ್ಟೇ ಕ್ಲೇ ಕೋರ್ಟ್‌ನಲ್ಲಿ ಆಡಿದ್ದೇನೆ. ಏನಾಗುತ್ತದೆ ಎಂಬುದನ್ನು ನಿರೀಕ್ಷಿಸಲು ಸಾಧ್ಯವಿಲ್ಲ. ಈ ಗೆಲುವು ನನ್ನ ಮೇಲಿನ ಒತ್ತಡವನ್ನು ಕೊಂಚ ತಗ್ಗಿಸಿದೆ. ಮುಂಬರುವ ಸವಾಲುಗಳನ್ನು ಎದುರಿಸಲು ಉತ್ಸುಕನಾಗಿದ್ದೇನೆ,'' ಎಂದು ಫೆಡರರ್‌ ಜಯದ ಬಳಿಕ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.

ಕ್ಲೇ ಕೋರ್ಟ್‌ನಲ್ಲಿ ನಡೆಯಲಿರುವ ಏಕಮಾತ್ರ ಗ್ರ್ಯಾನ್‌ ಸ್ಪ್ಯಾಮ್‌ ಟೂರ್ನಿ ಫ್ರೆಂಚ್‌ ಓಪನ್‌ ಮೇ 26ರಂದು ಆರಂಭವಾಗಲಿದೆ.

ಫೆಡರರ್‌ಗೆ ನಾಲ್ಕನೇ ರ‍್ಯಾಂಕ್
ಮಿಯಾಮಿ ಮಾಸ್ಟರ್ಸ್‌ ಗೆಲುವಿನೊಂದಿಗೆ 1000 ರ‍್ಯಾಂಕ್ ಅಂಕಳನ್ನು ತಮ್ಮದಾಗಿಸಿಕೊಂಡಿರುವ ರೋಜರ್‌ ಫೆಡರರ್‌, ಎಟಿಪಿ ಪ್ರಕಟಿಸಿದ ನೂತನ ರ‍್ಯಾಂಕಿಂಗ್ಸ್‌ನಲ್ಲಿ 1 ಸ್ಥಾನ ಮೇಲೇರಿ 4ನೇ ರ‍್ಯಾಂಕ್ ಪಡೆದಿದ್ದಾರೆ. ಇಂಡಿಯನ್‌ ವೆಲ್ಸ್‌ ಫೈನಲ್‌ನಲ್ಲಿ ಫೆಡರರ್‌ಗೆ ಸೋಲುಣಿಸಿದ ಆಸ್ಟ್ರಿಯಾದ ಆಟಗಾರ ಡಾಮಿನಿಕ್‌ ಥೀಮ್‌ 5ನೇ ರ‍್ಯಾಂಕ್ಗೆ ಜಾರಿದ್ದಾರೆ. ಎಂದಿನಂತೆ ಅಗ್ರಸ್ಥಾನದಲ್ಲಿ ಸರ್ಬಿಯಾದ ನೊವಾಕ್‌ ಜೊಕೊವಿಕ್‌ ಇದ್ದು, ಸ್ಪೇನ್‌ನ ರಾಫೆಲ್‌ ನಡಾಲ್‌ ಮತ್ತು ಜರ್ಮನಿಯ ಅಲೆಕ್ಸಾಂಡರ್‌ ಜ್ವೆರೆವ್‌ ಕ್ರಮವಾಗಿ 2ನೇ ಮತ್ತು 3ನೇ ಸ್ಥಾನದಲ್ಲಿದ್ದಾರೆ.

ಅತಿ ಹೆಚ್ಚು ಎಟಿಪಿ ಟ್ರೋಫಿಗಳನ್ನು ಗೆದ್ದವರು
ಜಿಮ್ಮಿ ಕಾನರ್ಸ್‌ 109
ರೋಜರ್‌ ಫೆಡರರ್‌ 101
ಇವಾನ್‌ ಲೆಂಡ್ಲ್‌ 94
ರಫೇಲ್‌ ನಡಾಲ್‌ 80
ಜಾನ್‌ ಮೆಕ್‌ಎನ್ರೊ 77

ಫೆಡರರ್‌ ಗೆದ್ದಿರುವ 101 ಪ್ರಶಸ್ತಿಗಳು
ವಿಂಬಲ್ಡನ್‌ 08
ಆಸ್ಪ್ರೇಲಿಯನ್‌ ಓಪನ್‌ 06
ಅಮೆರಿಕನ್‌ ಓಪನ್‌ 05
ಫ್ರೆಂಚ್‌ ಓಪನ್‌ 01
ಎಟಿಪಿ ವಿಶ್ವ ಟೂರ್‌ ಫೈನಲ್ಸ್‌ 06
ಎಟಿಪಿ 1000 ಮಾಸ್ಟರ್ಸ್‌ 28
ಎಟಿಪಿ ಟೂರ್‌ 500 22
ಎಟಿಪಿ ಟೂರ್‌ 250 25.