ರಷ್ಯಾ ಓಪನ್: ಫೈನಲ್‌ಗೆ ಸೌರಭ್, ಕುಹೂ-ರೋಹನ್

ಹೊಸದಿಲ್ಲಿ: ಪ್ರತಿಷ್ಠಿತ ರಷ್ಯಾ ಓಪನ್ ಟೂರ್ ಸೂಪರ್ 100 ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಪ್ರಭಾವಿ ಪ್ರದರ್ಶನ ನೀಡಿರುವ ಭಾರತದ ಸೌರಭ್ ವರ್ಮಾ ಮತ್ತು ಕುಹೂ ಗಾರ್ಗ್ ಹಾಗೂ ರೋಹನ್ ಕಪೂರ್ ಜೋಡಿ ತಮ್ಮ ತಮ್ಮ ವಿಭಾಗಗಳಲ್ಲಿ ಫೈನಲ್ ಹಂತಕ್ಕೆ ಪ್ರವೇಶಿಸಿದ್ದಾರೆ.

ರಾಷ್ಟ್ರೀಯ ಚಾಂಪಿಯನ್ ಆಗಿರುವ ಸೌರಭ್, 75,000 ಅಮೆರಿಕನ್ ಡಾಲರ್ ಹೊಂದಿರುವ ಟೂರ್ನಿಯಲ್ಲಿ ಶನಿವಾರ ನಡೆದ ಪುರುಷ ಸಿಂಗಲ್ಸ್ ವಿಭಾಗದ ಸೆಮಿಫೈನಲ್‌‌ನಲ್ಲಿ ತಮ್ಮ ಎದುರಾಳಿ ಮಿಥುನ್ ಮಂಜುನಾಥ್ ಅವರನ್ನು 21-9, 21-15ರ ಅಂತರದಲ್ಲಿ ಮಣಿಸಿ ಪ್ರಶಸ್ತಿ ಸುತ್ತಿಗೆ ಮುನ್ನಡೆದರು.

ಗಾಯದ ಬಳಿಕ ಸ್ಪರ್ಧಾತ್ಮಕ ಕ್ರೀಡೆಗೆ ಮರಳಿರುವ 25ರ ಹರೆಯದ ಸೌರಭ್ ಕೇವಲ 31 ನಿಮಿಷಗಳ ಅಂತರದಲ್ಲಿ ಪಂದ್ಯ ವಶಪಡಿಸಿಕೊಂಡರು. ಇದೀಗ ಭಾನುವಾರ ನಡೆಯಲಿರುವ ಪ್ರಶಸ್ತಿ ಹಣಾಹಣಿಯಲ್ಲಿ ಜಪಾನ್‌ನ ಕೊಕಿ ವಾಟನಬೆ ಸವಾಲನ್ನು ಎದುರಿಸಲಿದ್ದಾರೆ.

ಚೈನೀಸ್ ತೈಪೆ ಮಾಸ್ಟರ್ಸ್ ಟೂರ್ನಿ ಗೆದ್ದಿರುವ ಸೌರಭ್, 2016ರ ಬಿಟ್‌ಬರ್ಗರ್ ಓಪನ್‌ನಲ್ಲಿ ರನ್ನರ್-ಅಪ್ ಪ್ರಶಸ್ತಿ ಗೆದ್ದಿದ್ದರು.

ಅತ್ತ ಮಿಶ್ರ ಡಬಲ್ಸ್ ವಿಭಾಗದಲ್ಲಿ ದ್ವಿತೀಯ ಶ್ರೇಯಾಂಕಿತರಾಗಿರುವ ಭಾರತದ ಕುಹೂ ಗಾರ್ಗ್ ಹಾಗೂ ರೋಹನ್ ಕಪೂರ್ ಫೈನಲ್‌ಗೆ ಮುನ್ನುಗ್ಗಿದರು. ಶನಿವಾರ ನಡೆದ ಜಿದ್ದಾಜಿದ್ದಿನ ಸೆಮಿಫೈನಲ್ ಮುಖಾಮುಖಿಯಲ್ಲಿ ಮಲೇಷ್ಯಾದ ಚೆನ್ ತಾಂಗ್ ಜಿ ಹಾಗೂ ಯೆನ್ ವೀ ಪೆಕ್ ಜೋಡಿಯನ್ನು 21-19, 11-21, 22-20ರ ಅಂತರದಲ್ಲಿ ಮಣಿಸಿ ಕುಹೂ-ರೋಹನ್ ಜೋಡಿಯು ಪ್ರಶಸ್ತಿ ಸುತ್ತಿಗೆ ಮುನ್ನಡೆದರು.

58 ನಿಮಿಷಗಳ ವರೆಗೆ ಈ ಹೋರಾಟ ಸಾಗಿತ್ತು. ಇದೀಗ ನಡೆಯಲಿರುವ ಫೈನಲ್ ಮುಖಾಮುಖಿಯಲ್ಲಿ ರಷ್ಯಾದ ವ್ಲಾದಿಮಿರ್ ಇವನೊವ್ ಹಾಗೂ ಕೊರಿಯಾದ ಮಿನಿ ಕ್ಯೂನ್ ಕಿಮ್ ಸವಾಲನ್ನು ಎದುರಿಸಲಿದ್ದಾರೆ.

ಈ ನಡುವೆ ಪುರುಷ ಡಬಲ್ಸ್ ವಿಭಾಗದಲ್ಲಿ ಸೆಮಿಫೈನಲ್‌ನಲ್ಲಿ ಮುಗ್ಗಿರಿಸಿದ ಭಾರತದ ಅರ್ಜುನ್ ಜಾರ್ಜ್ ಹಾಗೂ ಸನ್ಯಮ್ ಶುಕ್ಲಾ ಜೋಡಿ ಕೂಟದಿಂದಲೇ ನಿರ್ಗಮಿಸಿದರು.