ರಷ್ಯಾ ಓಪನ್: ಸೌರಭ್ ವರ್ಮಾ ಚಾಂಪಿಯನ್

ವ್ಲಾಡಿವೊಸ್ಟಾಕ್‌: ಭಾರತದ ಯುವ ಭರವಸೆಯ ಬ್ಯಾಡ್ಮಿಂಟನ್‌ ಪಟು ಸೌರಭ್‌ ವರ್ಮಾ, ಇಲ್ಲಿ ನಡೆದ ಒಟ್ಟು 52 ಲಕ್ಷ ರೂ. ಬಹುಮಾನ ಮೊತ್ತದ ರಷ್ಯಾ ಓಪನ್‌ ಟೂರ್‌ ಸೂಪರ್‌ 100 ಬ್ಯಾಡ್ಮಿಂಟನ್‌ ಟೂರ್ನಮೆಂಟ್‌ನಲ್ಲಿ ಪ್ರಶಸ್ತಿ ಮುಡಿಗೇರಿಸಿದ್ದಾರೆ.

ಭಾನುವಾರ ನಡೆದ ಪುರುಷರ ಸಿಂಗಲ್ಸ್‌ ಫೈನಲ್ ಮುಖಾಮುಖಿಯಲ್ಲಿ ಜಪಾನ್‌ನ ಕೊಕಿ ವಾಟನೆಬಲ್‌ ವಿರುದ್ಧ 18-21, 21-12, 21-17ರ ಕಠಿಣ ಅಂತರದಲ್ಲಿ ಗೆಲುವು ದಾಖಲಿಸಿದರು.

ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ವಿಶ್ವ ನಂ.37ನೇ ರ‍್ಯಾಂಕ್‌ನ ಸೌರಭ್‌ಗೆ ವಿಶ್ವ ನಂ.119ನೇ ರ‍್ಯಾಂಕ್‌ನ ಕೊಕಿ ಕಠಿಣ ಪೈಪೋಟಿಯನ್ನೇ ಒಡ್ಡಿದ್ದರು. ಕೊನೆಗೂ ಒಂದು ತಾಸು ವರೆಗೂ ಸಾಗಿದ ಜಿದ್ದಾಜಿದ್ದಿನ ಹೋರಾಟದಲ್ಲಿ ವರ್ಮಾ ಚಾಂಪಿಯನ್ ಪಟ್ಟಕ್ಕೇರಲು ಯಶಸ್ವಿಯಾದರು.

ರಾಷ್ಟ್ರೀಯ ಚಾಂಪಿಯನ್‌ 25 ವರ್ಷದ ಸೌರಭ್‌ ಶನಿವಾರ ನಡೆದ ಸೆಮಿಫೈನಲ್‌ ಹಣಾಹಣಿಯಲ್ಲಿ ಸೌರಭ್‌ ಅವರು ಭಾರತದವರೇ ಆದ ಮಿಥುನ್‌ ಮಂಜುನಾಥ್‌ ಅವರನ್ನು ಸೋಲಿಸಿದ್ದರು.

ಈ ನಡುವೆ ಭಾರತದ ಮಿಶ್ರ ಡಬಲ್ಸ್‌ ಜೋಡಿ ಕುಹೂ ಗರ್ಗ್‌ ಮತ್ತು ರೋಹನ್‌ ಕಪೂರ್‌ ಫೈನಲ್‌ನಲ್ಲಿ ಮುಗ್ಗರಿಸಿ ರನ್ನರ್-ಅಪ್ ಪ್ರಶಸ್ತಿಗೆ ತೃಪ್ತಿಪಟ್ಟುಕೊಂಡರು.

ವ್ಲಾಡಿವೊಸ್ಟಾಕ್‌ನಲ್ಲಿ ನಡೆದ ಫೈನಲ್ ಪಂದ್ಯದಲ್ಲಿ ಫೈನಲ್‌ನಲ್ಲಿ ರಷ್ಯಾದ ವ್ಲಾಡಿಮಿರ್‌ ಇವಾನೊವ್‌ ಹಾಗೂ ಕೊರಿಯಾ ಮಿನ್‌ ಕುಂಗ್‌ ಕಿಮ್‌ ವಿರುದ್ಧ ಭಾರತೀಯ ಜೋಡಿಯು 19-21, 17-21ರ ಅಂತರದಲ್ಲಿ ಸೋಲನುಭವಿಸಿತು.

ಈ ಮೊದಲು ಚೈನೀಸ್ ತೈಪೆ ಮಾಸ್ಟರ್ಸ್ ಟೂರ್ನಿ ಗೆದ್ದಿರುವ ಸೌರಭ್, 2016ರ ಬಿಟ್‌ಬರ್ಗರ್ ಓಪನ್‌ನಲ್ಲಿ ರನ್ನರ್-ಅಪ್ ಪ್ರಶಸ್ತಿ ಗೆದ್ದಿದ್ದರು.