ಮುಂದುವರಿದ ಸೈನಾ ನೆಹ್ವಾಲ್‌ ವೈಫಲ್ಯ, ಡೆನ್ಮಾರ್ಕ್‌ ಓಪನ್‌ನಲ್ಲೂ ಎದುರಾಯ್ತು ನಿರಾಸೆ!

ಒಡೆನ್ಸ್‌: ಪರುಪಳ್ಳಿ ಕಶ್ಯಪ್‌ ಅವರೊಟ್ಟಿಗೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟ ಬಳಿಕ ಬ್ಯಾಡ್ಮಿಂಟನ್‌ ಅಖಾಡದಲ್ಲಿ ಸೈನಾ ನೆಹ್ವಾಲ್‌ ನಿಧಾನವಾಗಿ ತಮ್ಮ ಛಾಪು ಕಳೆದುಕೊಳ್ಳುತ್ತಿದ್ದಾರೆ. ಇತ್ತೀಚೆಗಷ್ಟೇ ಗಾಯದ ಸಮಸ್ಯೆ ಎದುರಿಸಿ ಗುಣಮುಖರರಾಗಿರುವ ಸೈನಾ, ಅಂತಾರಾಷ್ಟ್ರೀಯ ಟೂರ್ನಿಗಳಲ್ಲಿ ಸಾಲು ಸಾಲು ವೈಫಲ್ಯ ಅನುಭವಿಸುತ್ತಿದ್ದಾರೆ.

ಇದೀಗ ಡೆನ್ಮಾರ್ಕ್‌ ಓಪನ್‌ ಬ್ಯಾಡ್ಮಿಂಟನ್‌ ಟೂರ್ನಿ ಎರಡನೇ ಸುತ್ತಿನ ಪಂದ್ಯದಲ್ಲಿ ಗೆಲ್ಲುವ ಉತ್ತಮ ಅವಕಾಶವನ್ನು ಕೈಚೆಲ್ಲಿರುವ 29 ವರ್ಷದ ಅನುಭವಿ ಆಟಗಾರ್ತಿ ಸೈನಾ, ಮೊದಲ ಸೆಟ್‌ನಲ್ಲಿ 15-21 ಮತ್ತು ಎರಡನೇ ಸೆಟ್‌ನಲ್ಲಿ 20-16ರ ಮುನ್ನಡೆ ಹೊರತಾಗಿಯೂ ಒಂದಂಕ ಗಳಿಸಲು ವಿಫಲಗೊಂಡು 21-23 ಅಂತರದಲ್ಲಿ ಜಪಾನ್‌ನ ಆಟಗಾರ್ತಿ ಸಕಾಯ ತಕಾಶಿ ವಿರುದ್ಧ ಅಚ್ಚರಿಯ ಸೋಲುಂಡಿದ್ದಾರೆ.

ಡೆನ್ಮಾರ್ಕ್ ಓಪನ್: ಪಿವಿ ಸಿಂಧೂ ಶುಭಾರಂಭ, ಕಶ್ಯಪ್‌ಗೆ ಸೋಲು

ಇದಕ್ಕೂ ಮುನ್ನ ಭಾರತದ ಎನ್‌. ಸಿಕ್ಕಿ ರೆಡ್ಡಿ ಮತ್ತು ಪ್ರಣವ್‌ ಜೆರೆ ಛೋಪ್ರಾ ಜೋಡಿ ಮಿಶ್ರ ಡಬಲ್ಸ್‌ ವಿಭಾಗದಲ್ಲಿ ಜರ್ಮನಿಯ ಜೋಡಿಗೆ ಸೋಲುಣಿಸಿ ಮುಂದಿನ ಸುತ್ತಿಗೆ ಮುನ್ನಡೆದಿದ್ದರು. ಈ ಮಧ್ಯೆ ಪಿವಿ ಸಿಂಧೂ ಮತ್ತು ಬಿ ಸಾಯ್‌ ಪ್ರಣೀತ್‌ ಕೂಡ ಮೊದಲ ಸುತ್ತಿನ ಗೆಲುವಿನೊಂದಿಗೆ ಶುಭಾರಂಭ ಮಾಡಿದ್ದರು.

ಆದರೆ, ಸೈನಾ ನೆಹ್ವಾಲ್‌ ಅವರ ಪತಿ ಪರುಪಳ್ಳಿ ಕಶ್ಯಪ್‌ ಮತ್ತು ಮಾಜಿ ರಾಷ್ಟ್ರೀಯ ಚಾಂಪಿಯನ್‌ ಸೌರಭ್‌ ವರ್ಮಾ ಪ್ರತ್ಯೇಕ ಮೊದಲ ಸುತ್ತಿನ ಪಂದ್ಯಗಳಲ್ಲೇ ಸೋಲುಂಡು ಸ್ಪರ್ಧೆಯಿಂದ ಹೊರಬಿದ್ದಿದ್ದರು.

ಸೈನಾ ಐಕಾನಿಕ್‌ ಲುಕ್‌ನಲ್ಲಿ ಪರಿಣೀತಿ ಚೋಪ್ರ

ವಿಶ್ವ ಚಾಂಪಿಯನ್‌ಷಿಪ್‌ನಲ್ಲಿ ಚಿನ್ನ ಗೆದ್ದ ಬಳಿಕ ಸಾಲು ಸಾಲು ಸೋಲುಂಡಿರುವ ಪಿಸಿ ಸಿಂಧೂ, ಪ್ರಶಸ್ತಿಗಳ ಬರ ಎದುರಿಸಿದ್ದಾರೆ. ಇದೀಗ ಡೆನ್ಮಾರ್ಕ್‌ ಅಂಗಣದಲ್ಲಿ ಯಶಸ್ಸಿನ ಹಾದಿ ಕಂಡುಕೊಳ್ಳುವುದನ್ನು ಎದುರು ನೋಡುತ್ತಿದ್ದು, ಮೊದಲ ಸುತ್ತಿನ ಪಂದ್ಯದಲ್ಲಿ ಇಂಡೊನೇಷ್ಯಾದ ಆಟಗಾರ್ತಿ ಮರಿಸ್ಕಾ ತುನ್ಜುಂಗ್‌ ವಿರುದ್ಧ 38 ನಿಮಿಷಗಳಲ್ಲಿ 22-20, 21-18 ಅಂತರದ ನೇರ ಗೇಮ್‌ಗಳ ಜಯ ದಾಖಲಿಸಿದರು.