ಇಂಡೊನೇಷ್ಯಾ ಮಾಸ್ಟರ್ಸ್‌: 2ನೇ ಸುತ್ತಿಗೆ ಸೈನಾ

ಜಕಾರ್ತ : ಭಾರತದ ವಿಶ್ವವಿಖ್ಯಾತ ಬ್ಯಾಡ್ಮಿಂಟನ್‌ ತಾರೆ ಸೈನಾ ನೆಹ್ವಾಲ್‌ ಇಲ್ಲಿ ನಡೆಯುತ್ತಿರುವ ಇಂಡೊನೇಷ್ಯಾ ಮಾಸ್ಟರ್ಸ್‌ ಬ್ಯಾಡ್ಮಿಂಟನ್‌ ಟೂರ್ನಿಯ ಮಹಿಳಾ ಸಿಂಗಲ್ಸ್‌ ವಿಭಾಗದಲ್ಲಿ 2ನೇ ಸುತ್ತು ತಲುಪಿದ್ದಾರೆ. ಆದರೆ ಬಿ.ಸಾಯಿ ಪ್ರಣೀತ್‌ ಮತ್ತು ಶುಭಾಂಕರ್‌ ಡೇ ಪುರುಷರ ಸಿಂಗಲ್ಸ್‌ ವಿಭಾಗದ ಮೊದಲ ಹರ್ಡಲ್ಸ್‌ ದಾಟುವಲ್ಲಿ ವಿಫಲಗೊಂಡಿದ್ದಾರೆ.

ಬುಧವಾರ ನಡೆದ ಮೊದಲ ಸುತ್ತಿನ ಪಂದ್ಯದಲ್ಲಿ 8ನೇ ಶ್ರೇಯಾಂಕಿತೆ ಸೈನಾ, ಆರಂಭಿಕ ಗೇಮ್‌ನಲ್ಲಿ ಹಿನ್ನಡೆ ಅನುಭವಿಸಿದ ಹೊರತಾಗಿಯೂ 7-21, 21-16, 21-11ರಲ್ಲಿ 50ನೇ ರಾರ‍ಯಂಕಿನ ಸ್ಥಳೀಯ ಪ್ರತಿಭೆ ಡಿನಾರ್‌ ಡೈಯಾ ಅಯುಸ್ಟೀನ್‌ ವಿರುದ್ಧ ಪ್ರಯಾಸದ ಜಯ ಗಳಿಸಿದ್ದಾರೆ. ಡಿನಾರ್‌ ವಿರುದ್ಧ ಸೈನಾಗೆ ಒಲಿದ 3ನೇ ಜಯ ಇದಾಗಿದೆ. 28 ವರ್ಷದ ಸೈನಾ ಮುಂದಿನ ಸುತ್ತಿನಲ್ಲಿ ಇಂಡೊನೇಷ್ಯಾದ ಫಿತ್ರಿಯಾನಿ ಫಿತ್ರಿಯಾನಿ ವಿರುದ್ಧ ಸೆಣಸಲಿದ್ದಾರೆ. ಫಿತ್ರಿಯಾನಿ ಎದುರು ಸೈನಾ 4-0 ಅಂತರದ ಮುಖಾಮುಖಿ ದಾಖಲೆ ಹೊಂದಿದ್ದಾರೆ.

ಪುರುಷರ ಡಬಲ್ಸ್‌ ವಿಭಾಗದ ಮೊದಲ ಪಂದ್ಯದಲ್ಲಿ ಮನು ಅತ್ರಿ ಮತ್ತು ಬಿ. ಸುಮಿತ್‌ ರೆಡ್ಡಿ 14-21, 21-19, 21-15ರಲ್ಲಿ ಡೆನ್ಮಾರ್ಕ್‌ನ ಮೇಡ್ಸ್‌ ಪೀಲೆರ್‌ ಕೋಲ್ಡಿಂಗ್‌ ಮತ್ತು ನಿಕ್ಲಾಸ್‌ ನೊಹ್ರ ಎದುರು ಗೆದ್ದು ಶುಭಾರಂಭ ಮಾಡಿದ್ದಾರೆ. ಆದರೆ, ಮಹಿಳಾ ಡಬಲ್ಸ್‌ನಲ್ಲಿ ಅಶ್ವಿನಿ ಪೊನ್ನಪ್ಪ ಮತ್ತು ಎನ್‌.ಸಿಕ್ಕಿ ರೆಡ್ಡಿ ಜೋಡಿ ಆರಂಭಿಕ ಸುತ್ತಿನಲ್ಲಿ ಸೋತು ನಿರ್ಗಮಿಸಿದೆ.