ಡೆನ್ಮಾರ್ಕ್ ಓಪನ್: ಸೈನಾ, ಕಿಡಂಬಿ ಸೆಮೀಸ್‌ಗೆ ಲಗ್ಗೆ

ಹೊಸದಿಲ್ಲಿ: ಭಾರತದ ಅಗ್ರಮಾನ್ಯ ಬ್ಯಾಡ್ಮಿಂಟನ್ ತಾರೆಗಳಾದ ಸೈನಾ ನೆಹ್ವಾಲ್ ಹಾಗೂ ಕಿಡಂಬಿ ಶ್ರೀಕಾಂತ್, ಪ್ರತಿಷ್ಠಿತ ಡೆನ್ಮಾರ್ಕ್ ಓಪನ್ ಸೂಪರ್ 750 ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಅನುಕ್ರಮವಾಗಿ ಮಹಿಳಾ ಹಾಗೂ ಪುರುಷ ಸಿಂಗಲ್ಸ್ ವಿಭಾಗದಲ್ಲಿ ಸೆಮಿಫೈನಲ್ ಹಂತಕ್ಕೆ ಪ್ರವೇಶಿಸಿದ್ದಾರೆ.

ಶುಕ್ರವಾರ ನಡೆದ ಮಹಿಳಾ ಸಿಂಗಲ್ಸ್ ಕ್ವಾರ್ಟರ್ ಫೈನಲ್ ಮುಖಾಮುಖಿಯಲ್ಲಿ ಜಪಾನ್‌ನ ಓಕುಹಾರಾ ಅವರನ್ನು 17-21, 21-16, 21-12ರ ಕಠಿಣ ಅಂತರದಲ್ಲಿ ಮಣಿಸಿದ ಸೈನಾ ಅಂತಿಮ ನಾಲ್ಕರ ಘಟ್ಟಕ್ಕೆ ಮುನ್ನಡೆದರು.

ಸೈನಾ ಹಾಗೂ ಓಕುಹಾರಾ ನಡುವಣ ಮ್ಯಾರಥನ್ ಹೋರಾಟ 58 ನಿಮಿಷಗಳ ವರೆಗೂ ಸಾಗಿತ್ತು. ಮೊದಲ ಸೆಟ್ ಕಳೆದುಕೊಂಡರೂ ಎದೆಗುಂದದ ಸೈನಾ, ನಂತರದ ಎರಡು ಸೆಟ್ ವಶಪಡಿಸಿಕೊಳ್ಳುವ ಮೂಲಕ ಪಂದ್ಯ ವಶಪಡಿಸಿಕೊಂಡರು.

ಅತ್ತ ಪುರುಷ ಸಿಂಗಲ್ಸ್ ವಿಭಾಗ ಎಂಟರ ಘಟ್ಟದ ಹೋರಾಟದಲ್ಲಿ ಭಾರತೀಯರೇ ಆದ ಸಮೀರ್ ವರ್ಮಾ ಅವರನ್ನು ಮಣಿಸಿರುವ ಕಿಡಂಬಿ ಶ್ರೀಕಾಂತ್, ಸಹ ಸೆಮಿಫೈನಲ್‌ಗೆ ಲಗ್ಗೆಯಿಟ್ಟರು.

ಮಗದೊಂದು ನಿಕಟ ಹಣಾಹಣಿಯಲ್ಲಿ ವರ್ಮಾ ವಿರುದ್ಧ 22-20, 19-21, 23-21ರ ಕಠಿಣ ಅಂತರದಲ್ಲಿ ಶ್ರೀಕಾಂತ್ ಗೆಲುವು ದಾಖಲಿಸಿದರು. ಇವರಿಬ್ಬರ ನಡುವಣ ಹೋರಾಟವು ಒಂದು ತಾಸು 18 ನಿಮಿಷಗಳ ವರೆಗೂ ಮುಂದುವರಿದಿತ್ತು.

ಸೈನಾ ಇದೀಗ ಸೆಮಿಫೈನಲ್‌ನಲ್ಲಿ ಇಂಡೋನೇಷ್ಯಾದ ಜಾರ್ಜಿಯಾ ಮರಿಸ್ಕ ತಂಜುಂಗ್ ಸವಾಲನ್ನು ಎದುರಿಸಲಿದ್ದಾರೆ. ಹಾಗೆಯೇ ಶ್ರೀಕಾಂತ್ ಅವರು ವಿಶ್ವ ನಂ.1 ಆಟಗಾರ ಜಪಾನ್‌ನ ಕೆಂಟೊ ಮೊಮೊಟ ವಿರುದ್ಧ ಸ್ಪರ್ಧಿಸಲಿದ್ದಾರೆ.