ಜಪಾನ್ ಓಪನ್; ಸೈನಾ, ಶ್ರೀಕಾಂತ್ ಮುನ್ನಡೆ

ಟೊಕಿಯೋ: ಇಲ್ಲಿ ಸಾಗುತ್ತಿರುವ ಜಪಾನ್ ಓಪನ್ ಸೂಪರ್ ಸಿರೀಸ್ ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ತಮ್ಮ ತಮ್ಮ ವಿಭಾಗಗಳಲ್ಲಿ ಭಾರತದ ಸೈನಾ ನೆಹ್ವಾಲ್, ಕಿಡಂಬಿ ಶ್ರೀಂಕಾಂತ್, ಎಚ್‌ಎಸ್ ಪ್ರಣೋಯ್ ಮತ್ತು ಸಮೀರ್ ವರ್ಮಾ ದ್ವಿತೀಯ ಸುತ್ತಿಗೆ ಪ್ರವೇಶಿಸಿದ್ದಾರೆ.

ಇತ್ತೀಚೆಗಷ್ಟೇ ಸಾಗಿದ ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿ ಕಂಚಿನ ಪದಕ ಗೆದ್ದುಕೊಂಡಿದ್ದ ಸೈನಾ, ಮಹಿಳಾ ಸಿಂಗಲ್ಸ್ ಮೊದಲ ಸುತ್ತಿನ ಹೋರಾಟದಲ್ಲಿ ಎದುರಾಳಿ ಥಾಯ್ಲೆಂಡ್‌ನ ಪಾರ್ನ್‌ಪಾವೇ ಚೊಚುವಾಂಗ್ ವಿರುದ್ಧ 21-17, 21-9ರ ಅಂತರದಲ್ಲಿ ಗೆದ್ದು ಮುನ್ನಡೆ ದಾಖಲಿಸಿದರು.

ಗಾಯದ ದಣಿವನ್ನು ತಪ್ಪಿಸಲು ಸೈನಾ ಕೊರಿಯಾ ಓಪನ್‌ನಿಂದ ದೂರವುಳಿದಿದ್ದರು. ಇದೀಗ 39 ನಿಮಿಷಗಳಲ್ಲೇ ಪಂದ್ಯ ವಶಪಡಿಸಿಕೊಳ್ಳುವ ಮೂಲಕ ತಮ್ಮ ಸಾಮರ್ಥ್ಯವನ್ನು ಸಾಬೀತುಪಡಿಸಿದರು.

ಸೈನಾ ಇದೀಗ ದ್ವಿತೀಯ ಸುತ್ತಿನಲ್ಲಿ ಒಲಿಂಪಿಕ್ ಚಾಂಪಿಯನ್ ಕರೊಲಿನಾ ಮರಿನ್ ಸವಾಲನ್ನು ಎದುರಿಸಲಿದ್ದಾರೆ.

ಅತ್ತ ಪುರುಷ ಸಿಂಗಲ್ಸ್ ವಿಭಾಗದಲ್ಲಿ ಇಂಡೋನೇಷ್ಯಾ ಹಾಗೂ ಆಸ್ಟ್ರೇಲಿಯನ್ ಓಪನ್ ಗೆದ್ದುಕೊಂಡಿರುವ ಶ್ರೀಕಾಂತ್ ತಮ್ಮ ಮೊದಲ ಸುತ್ತಿನ ಹೋರಾಟದಲ್ಲಿ ಚೀನಾದ ಟಿಯಾನ್ ಹುವಾಯ್ ವಿರುದ್ಧ 21-15, 12-21, 21-11ರ ಅಂತರದಲ್ಲಿ ಗೆಲುವು ದಾಖಲಿಸಿ ಮುನ್ನಡೆದರು.

ಎಂಟನೇ ಶ್ರೇಯಾಂಕಿತರಾಗಿರುವ ಶ್ರೀಕಾಂತ್ ಇದೀಗ ನಡೆಯಲಿರುವ ದ್ವಿತೀಯ ಸುತ್ತಿನ ಹೋರಾಟದಲ್ಲಿ ಹಾಂಕಾಂಗ್‌ನ ಹು ಯೂನ್ ಸವಾಲನ್ನು ಎದುರಿಸಲಿದ್ದಾರೆ.

ಹಾಗೆಯೇ ಡೆನ್ಮಾರ್ಕ್‌ನ ಆಂಡೆರ್ಸ್ ಆ್ಯಂಟನ್ಸೆನ್ ಅವರನ್ನು 21-12, 21-14ರ ಅಂತರದಲ್ಲಿ ಮಣಿಸಿರುವ ಪ್ರಣೋಯ್ ಸಹ ಮುನ್ನಡೆದಿದ್ದಾರೆ. ಇನ್ನೊಂದೆಡೆ ಥಾಯ್ಲೆಂಡ್‌ನ ಕೊಸಿಟ್ ಫೆಟ್‌ಪ್ರದಾಪ್ ವಿರುದ್ಧ 21-12, 21-19ರ ಅಂತರದ ಗೆಲುವು ದಾಖಲಿಸಿರುವ ಸಮೀರ್ ವರ್ಮಾ ದ್ವಿತೀಯ ಸುತ್ತಿಗೆ ತಲುಪಿದ್ದಾರೆ.