ಬಾಕ್ಸಿಂಗ್‌: ಫೈನಲ್‌ಗೆ 5 ಭಾರತೀಯರು

ಹೊಸದಿಲ್ಲಿ : ಶಿವ ಥಾಪ, ಮೊಹಮ್ಮದ್‌ ಹುಸಾಮುದ್ದೀನ್‌ ಸೇರಿದಂತೆ ಭಾರತದ 5 ಬಾಕ್ಸರ್‌ಗಳು ಫಿನ್ಲೆಂಡ್‌ನ ಹೆಲ್ಸಿಂಕಿಯಲ್ಲಿ ನಡೆಯುತ್ತಿರುವ 38ನೇ ಗೀಬೀ ಬಾಕ್ಸಿಂಗ್‌ ಟೂರ್ನಿಯಲ್ಲಿ ಫೈನಲ್‌ ಪ್ರವೇಶಿಸಿದ್ದಾರೆ.

ಭಾನುವಾರ ನಡೆದ ಪುರುಷರ 60 ಕೆಜಿ ವಿಭಾಗದ ಸೆಮಿಫೈನಲ್‌ ಹಣಾಹಣಿಯಲ್ಲಿ ಮೂರು ಬಾರಿಯ ಏಷ್ಯನ್‌ ಚಾಂಪಿಯನ್‌ಷಿಪ್‌ ಪದಕ ವಿಜೇತ ಶಿವ ಥಾಪ 5-0 ಅಂಕಗಳ ಅಂತರದಿಂದ ರಷ್ಯಾದ ಮಿಖೈಲ್‌ ವಾರ್ಲಾಮೊವ್‌ ವಿರುದ್ಧ ಏಕಪಕ್ಷೀಯ ಜಯ ಗಳಿಸಿ ಅಂತಿಮ ಸುತ್ತಿಗೆ ದಾಪುಗಾಲಿಟ್ಟಿದ್ದಾರೆ. ಅಸ್ಸಾಮ್‌ನ ಥಾಪ ಪ್ರಶಸ್ತಿಗಾಗಿ ಸ್ಥಳೀಯ ಫೇವರಿಟ್‌ ಅಸ್ರ್ಲಾನ್‌ ಖತಾವ್‌ ವಿರುದ್ಧ ಸೆಣಸಲಿದ್ದಾರೆ.

ಇನ್ನು, 56 ಕೆಜಿ ವಿಭಾಗದ ಸೆಮಿಫೈನಲ್‌ನಲ್ಲಿ ಹೊಸಾಮುದ್ದೀನ್‌ 3-2 ಅಂಕಗಳ ಅಂತರದಿಂದ ಕಜಕಸ್ತಾನದ ಝಾನ್‌ಬೊಲೇಟ್‌ ಕೈದಿರ್‌ಬಯೆವ್‌ ವಿರುದ್ಧ ಹಾಗೂ ಕವೀಂದರ್‌ ಸಿಂಗ್‌ ಬಿಷ್ಟ್‌ ಫ್ರಾನ್ಸ್‌ನ ಜೋರ್ಡನ್‌ ರೋಡ್ರಿಗಸ್‌ ವಿರುದ್ಧ ಗೆದ್ದು ಫೈನಲ್‌ ತಲುಪಿದ್ದಾರೆ. ಫೈನಲ್‌ನಲ್ಲಿ ಹೊಸಾಮುದ್ದೀನ್‌ ಮತ್ತು ಬಿಷ್ಟ್‌ ಮುಖಾಮುಖಿಯಾಗುತ್ತಿರುವುದು ವಿಶೇಷ ಎನಿಸಿದೆ.

ಇನ್ನಿತರ ಸೆಮಿಫೈನಲ್‌ ಹಣಾಹಣಿಗಳಲ್ಲಿ ದಿನೇಶ್‌ ಡಾಗರ್‌ (69 ಕೆಜಿ), ನವೀನ್‌ ಕುಮಾರ್‌ (91+ಕೆಜಿ) ಮತ್ತು ಗೋವಿಂದ್‌ ಸಹಾನಿ (49 ಕೆಜಿ) ಕೂಡ ಫೈನಲ್‌ಗೆ ಮುನ್ನಡೆದಿದ್ದಾರೆ.

ಭಾನುವಾರದ ಸೆಮಿಫೈನಲ್‌ ಪಂದ್ಯಗಳಲ್ಲಿ ಸೋಲನುಭವಿಸಿದ ಸುಮಿತ್‌ ಸಂಗ್ವಾನ್‌ (91 ಕೆಜಿ) ಮತ್ತು ಮಾಜಿ ಯೂತ್‌ ವಿಶ್ವ ಚಾಂಪಿಯನ್‌ ಸಚಿನ್‌ ಸಿವಾಚ್‌ (52 ಕೆಜಿ) ಕಂಚಿನ ಪದಕದೊಂದಿಗೆ ಹೋರಾಟ ಪೂರ್ಣಗೊಳಿಸಿದ್ದಾರೆ.