ಶೂಟಿಂಗ್‌: ಭಾರತಕ್ಕೆ ಎರಡು ಸ್ವರ್ಣ

ಹೊಸದಿಲ್ಲಿ : ಜರ್ಮನಿಯ ಸುಹ್ಲ್‌ನಲ್ಲಿ ಶನಿವಾರ ಆರಂಭಗೊಂಡ ಜೂನಿಯರ್‌ ಶೂಟಿಂಗ್‌ ವಿಶ್ವಕಪ್‌ನಲ್ಲಿ ಭಾರತ ಎರಡು ಸ್ವರ್ಣ ಸೇರಿ 5 ಪದಕ ಗೆಲ್ಲುವುದರೊಂದಿಗೆ ಫಲಪ್ರದ ಅಭಿಯಾನ ಶುರುವಿಟ್ಟುಕೊಂಡಿದೆ.

ಇಲ್ಲಿನ ಇಂಟರ್‌ನ್ಯಾಷನಲ್‌ ಶೂಟಿಂಗ್‌ ಸ್ಪೋರ್ಟ್‌ ಫೆಡರೇಷನ್‌ನಲ್ಲಿ ಮೊದಲ ದಿನ ನಡೆದ ಜೂನಿಯರ್‌ ಪುರುಷರ 25 ಮೀ. ಸ್ಟ್ಯಾಂಡರ್ಡ್‌ ಪಿಸ್ತೂಲ್‌ ಸ್ಪರ್ಧೆಯಲ್ಲಿ ಉಧಯ್‌ವೀರ್‌ 575 ಅಂಕ ಕಲೆಹಾಕಿ ಸ್ವರ್ಣ ಪದಕ ಜಯಿಸಿದ್ದಾರೆ. ಆದರ್ಶ್‌ ಸಿಂಗ್‌ (568 ಅಂಕ) ಮತ್ತು ಅನಿಶ್‌ ಭನ್ವಾಲಾ (566 ಅಂಕ) ಕ್ರಮವಾಗಿ ಬೆಳ್ಳಿ ಮತ್ತು ಕಂಚಿನ ಸಾಧನೆ ಮಾಡಿದ್ದಾರೆ.

ಇದೇ ಸ್ಪರ್ಧೆಯ ತಂಡ ವಿಭಾಗದಲ್ಲಿ ಆದರ್ಶ್‌ ಮತ್ತು ಸಹೋದರ ವಿಜಯ್‌ವೀರ್‌ ಸಿಧು ಜತೆ ಉಧಯ್‌ವೀರ್‌ 1707 ಅಂಕ ಸಂಪಾದಿಸಿ ಜೂನಿಯರ್‌ ವಿಶ್ವ ದಾಖಲೆಯೊಂದಿಗೆ ಚಿನ್ನ ಗೆದ್ದ ಸಾಧನೆ ಮಾಡಿದ್ದಾರೆ. ಇದರೊಂದಿಗೆ ಉಧಯ್‌ವೀರ್‌ ಎರಡು ಬಂಗಾರದ ಪದಕಗಳಿಗೆ ಕೊರಳೊಡ್ಡಿದ್ದಾರೆ. ಅನಿಶ್‌, ರಾಜ್‌ಕನ್ವಾರ್‌ ಸಂಧು ಮತ್ತು ದಿಲ್ಶಾನ್‌ ಕೆಲಿ ಒಳಗೊಂಡ ಭಾರತ ತಂಡ, 1676 ಅಂಕ ಗಳಿಸಿ ಎರಡನೇ ಸ್ಥಾನಿಯಾಗಿ ಬೆಳ್ಳಿ ಪದಕ ತನ್ನದಾಗಿಸಿಕೊಂಡಿದೆ. ದಿನದಂತ್ಯಕ್ಕೆ ಭಾರತ ತಲಾ ಎರಡು ಚಿನ್ನ, ಬೆಳ್ಳಿ ಮತ್ತು ಒಂದು ಕಂಚಿನೊಂದಿಗೆ ಒಟ್ಟು ಐದು ಪದಕ ಗೆದ್ದು ಪದಕ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿದೆ.