ಶ್ರೀಹರಿ ಮತ್ತೊಂದು ದಾಖಲೆ

ವಿಕ ಸುದ್ದಿಲೋಕ ಬೆಂಗಳೂರು : ಗಮನಾರ್ಹ ಪ್ರದರ್ಶನ ಮುಂದುವರಿಸಿರುವ ಕರ್ನಾಟಕದ ಶ್ರೀಹರಿ ನಟರಾಜ್‌ ಭೋಪಾಲ್‌ನಲ್ಲಿ ನಡೆಯುತ್ತಿರುವ 73ನೇ ಹಿರಿಯರ ರಾಷ್ಟ್ರೀಯ ಈಜು ಚಾಂಪಿಯನ್‌ಷಿಪ್‌ನ ಪುರುಷರ 50 ಮೀ. ಬ್ಯಾಕ್‌ಸ್ಟ್ರೋಕ್‌ ವಿಭಾಗದ ಸ್ಪರ್ಧೆಯಲ್ಲಿ ಕೂಟ ದಾಖಲೆಯೊಂದಿಗೆ ಸ್ವರ್ಣ ಪದಕ ಗೆದ್ದಿದ್ದಾರೆ. ಇದರೊಂದಿಗೆ ಕರ್ನಾಟಕ ಈಜು ತಂಡ 11 ಚಿನ್ನ, ತಲಾ 8 ಬೆಳ್ಳಿ ಮತ್ತು ಕಂಚು ಸೇರಿದಂತೆ ಒಟ್ಟು 27 ಪದಕಗಳೊಂದಿಗೆ ಸದ್ಯ ಪದಕ ಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿದೆ.
ಮಂಗಳವಾರ ನಡೆದ ಸ್ಪರ್ಧೆಯಲ್ಲಿ ಆಕರ್ಷಣೆಯ ಕೇಂದ್ರಬಿಂದುವಾಗಿದ್ದ ಶ್ರೀಹರಿ 25.58 ಸೆಕೆಂಡ್‌ಗಳಲ್ಲಿ ಅಗ್ರಸ್ಥಾನಿಯಾಗಿ ಗುರಿ ತಲುಪಿ ಇದೇ ಟೂರ್ನಿಯಲ್ಲಿ ತಾವೇ ನಿರ್ಮಿಸಿದ್ದ 26.01 ಸೆ. ದಾಖಲೆಯನ್ನು ತಿದ್ದಿ ಬರೆದರು. ಕರ್ನಾಟಕದವರೇ ಆದ ರಕ್ಷಿತ್‌ ಯು ಶೆಟ್ಟಿ (26.73 ಸೆ.) 2ನೇ ಸ್ಥಾನದೊಂದಿಗೆ ಬೆಳ್ಳಿ ಜಯಿಸಿದರು. ಮಿಂಚಿನ ಪ್ರದರ್ಶನ ಕಾಯ್ದುಕೊಂಡ ಶ್ರೀಹರಿ, ಪುರುಷರ 100 ಮೀ. ಫ್ರೀಸ್ಟೈಲ್‌ ಸ್ಪರ್ಧೆಯಲ್ಲೂ 50.59 ಸೆ.ಗಳಲ್ಲಿ ಗುರಿ ಮುಟ್ಟಿ ಬಂಗಾರಕ್ಕೆ ಕೊರಳೊಡ್ಡಿದರು.
ಮಹಿಳೆಯರ 4*200 ಮೀ. ಫ್ರೀಸ್ಟೈಲ್‌ ಸ್ಪರ್ಧೆಯಲ್ಲಿ ದಾಮಿನಿ ಕೆ.ಗೌಡ, ಸುವನಾ ಸಿ ಭಾಸ್ಕರ್‌, ಸ್ಮೃತಿ ಮಹಾಲಿಂಗಮ್‌ ಮತ್ತು ಖುಷಿ ದಿನೇಶ್‌ ಒಳಗೊಂಡ ಕರ್ನಾಟಕ ತಂಡ 9:04.86 ಸೆಕೆಂಡ್‌ಗಳಲ್ಲಿ ಪ್ರಥಮ ಸ್ಥಾನ ಗಳಿಸಿ ಚಿನ್ನಕ್ಕೆ ಕೊರಳೊಡ್ಡಿದರೆ, ಮಹಾರಾಷ್ಟ್ರ ಮತ್ತು ತಮಿಳುನಾಡು ತಂಡಗಳು ಕ್ರಮವಾಗಿ ಬೆಳ್ಳಿ ಮತ್ತು ಕಂಚಿನ ಪದಕ ತಮ್ಮದಾಗಿಸಿಕೊಂಡವು.