ಡೆನ್ಮಾರ್ಕ್ ಓಪನ್; ಫೈನಲ್ ಪ್ರವೇಶಿಸಿದ ಶ್ರೀಕಾಂತ್

ಹೊಸದಿಲ್ಲಿ: ಡೆನ್ಮಾರ್ಕ್ ಓಪನ್ ಸೂಪರ್ ಸಿರೀಸ್ ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಭಾರತದ ಹೆಮ್ಮೆಯ ಕಿಡಂಬಿ ಶ್ರೀಕಾಂತ್ ಫೈನಲ್‌ಗೆ ಪ್ರವೇಶಿಸಿದ್ದಾರೆ.

ಶನಿವಾರ ರಾತ್ರಿ ನಡೆದ ಪುರುಷ ಸಿಂಗಲ್ಸ್ ವಿಭಾಗದ ಜಿದ್ದಾಜಿದ್ದಿನ ಸೆಮಿಫೈನಲ್ ಹೋರಾಟದಲ್ಲಿ ಹಾಂಕಾಂಗ್‌ನ ವಾಂಗ್ ವಿಂಗ್ ಕಿ ವೆನ್ಸೆಂಟ್ ಅವರನ್ನು ಮಣಿಸಿರುವ ಶ್ರೀಕಾಂತ್ ಪ್ರಶಸ್ತಿ ಸುತ್ತಿಗೆ ಮುನ್ನಡೆದರು.

ಟೂರ್ನಿಯುದ್ಧಕೂ ಅಮೋಘ ಪ್ರದರ್ಶನ ಮುಂದುವರಿಸಿದರುವ ಕಿಡಂಬಿಗೆ ಎದುರಾಳಿ ಸವಾಲಾಗಲೇ ಇಲ್ಲ. ಪರಿಣಾಮ ಕೇವಲ 39 ನಿಮಿಷಗಳ ಅಂತರದಲ್ಲಿ 21-18 21-17ರ ಅಂತರದಲ್ಲಿ ಮಣಿಸಿ ಮುನ್ನಡೆದರು.

ಪ್ರಸಕ್ತ ಸಾಲಿನಲ್ಲಿ ಇಂಡೋನೇಷ್ಯಾ ಓಪನ್ ಮತ್ತು ಆಸ್ಟ್ರೇಲಿಯನ್ ಓಪನ್ ಬಗಲಿಗೇರಿಸಿಕೊಂಡಿರುವ 25ರ ಹರೆಯದ ಶ್ರೀಕಾಂತ್, ಕ್ವಾರ್ಟರ್ ಫೈನಲ್ ಮುಖಾಮುಖಿಯಲ್ಲಿ ವಿಶ್ವ ಚಾಂಪಿಯನ್ ವಿಕ್ಟರ್ ಅಕ್ಸೆಲ್ಸನ್ ಅವರನ್ನು 14-21, 22-20, 21-7ರ ಕಠಿಣ ಅಂತರದಲ್ಲಿ ಮಣಿಸಿದ್ದರು.

ಅದ್ಭುತ ಅನುಭವ, ಇಲ್ಲಿ ಉತ್ತಮ ಪ್ರದರ್ಶನ ನೀಡಲು ಬಯಸಿದ್ದೆ ಎಂದು ಗೆಲುವಿನ ಬಳಿಕ ಶ್ರೀಕಾಂತ್ ಪ್ರತಿಕ್ರಿಯಿಸಿದ್ದಾರೆ.