ಬ್ಯಾಡ್ಮಿಂಟನ್‌ : ಶ್ರೇಯಾಂಕದಲ್ಲಿ ಶ್ರೀಕಾಂತ್‌ ಕುಸಿತ, ದಾನಿ ಜಿಗಿತ

ಹೊಸದಿಲ್ಲಿ: ವಿಶ್ವದ ಮಾಜಿ ನಂ.1 ಆಟಗಾರ ಭಾರತದ ಕಿಡಂಬಿ ಶ್ರೀಕಾಂತ್‌ ಮಂಗಳವಾರ ಬಿಡಬ್ಲ್ಯುಎಫ್‌ ಬಿಡುಗಡೆ ಮಾಡಿದ ನೂತನ ರಾರ‍ಯಂಕಿಂಗ್‌ನಲ್ಲಿ ಒಂದು ಮೆಟ್ಟಿಲು ಕೆಳಕ್ಕೆ ಜಾರಿ 8ನೇ ಸ್ಥಾನದಲ್ಲಿ ಆಸೀನರಾಗಿದ್ದಾರೆ. ಆದರೆ, ಭಾರತದ ಯುವ ಆಟಗಾರ ಹರ್ಷಿಲ್‌ ದಾನಿ 22 ಮೆಟ್ಟಿಲು ಮೇಲಕ್ಕೆ ಜಿಗಿದು 89ನೇ ಶ್ರೇಯಾಂಕ ಗಳಿಸಿದ್ದಾರೆ. ನೆದರ್ಲೆಂಡ್‌ ಓಪನ್‌ ಗೆದ್ದ ಹಿನ್ನೆಲೆಯಲ್ಲಿ ದಾನಿ ಅವರ ರಾರ‍ಯಂಕಿಂಗ್‌ನಲ್ಲಿ ಭಾರಿ ಏರಿಕೆಯಾಗಿದೆ.
ಕಳೆದ ವಾರ ಸಿಂಗಾಪುರ ಓಪನ್‌ನಲ್ಲಿ ಕ್ವಾರ್ಟರ್‌ಫೈನಲ್‌ ತಲುಪಿದ್ದ ಸಮೀರ್‌ ವರ್ಮಾ ಒಂದು ಸ್ಥಾನ ಏರಿಕೆ ಕಂಡು 15ನೇ ಸ್ಥಾನ ಅಲಂಕರಿಸಿದ್ದಾರೆ. ಜತೆಗೆ ಪರುಪಳ್ಳಿ ಕಶ್ಯಪ್‌ ಸಹ ಮೂರು ಸ್ಥಾನ ಜಿಗಿತದೊಂದಿಗೆ 39ನೇ ಸ್ಥಾನ ಪಡೆದಿದ್ದಾರೆ.
ಇನ್ನು, ಇತ್ತೀಚೆಗಷ್ಟೇ ಪೋಲೆಂಡ್‌ ಓಪನ್‌ನಲ್ಲಿ ಫೈನಲ್‌ ಪ್ರವೇಶಿಸಿದ್ದ ಜೂನಿಯರ್‌ ಆಟಗಾರ ಲಕ್ಷ್ಯ ಸೇನ್‌ ಕೂಡ 2 ಸ್ಥಾನ ಮೇಲೇರಿ 71ನೇ ಶ್ರೇಯಾಂಕ ಪಡೆದಿದ್ದಾರೆ.
ಬಿ.ಸಾಯ್‌ ಪ್ರಣೀತ್‌ ಮತ್ತು ಎಚ್‌.ಎಸ್‌.ಪ್ರಣಯ್‌ ಅನುಕ್ರಮವಾಗಿ 20 ಮತ್ತು 21ನೇ ಸ್ಥಾನದಲ್ಲಿ ಮುಂದುವರಿದಿದ್ದರೆ, ಮಹಿಳೆಯರ ಸಿಂಗಲ್ಸ್‌ನಲ್ಲಿ ಪಿ.ವಿ.ಸಿಂಧೂ (6) ಮತ್ತು ಸೈನಾ ನೆಹ್ವಾಲ್‌ (9) ರಾರ‍ಯಂಕಿಂಗ್‌ನಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ.