ಮನ್‌ದೀಪ್ ಹ್ಯಾಟ್ರಿಕ್; ಜಪಾನ್ ಮಣಿಸಿದ ಭಾರತ

ಹೊಸದಿಲ್ಲಿ: ಮಲೇಷ್ಯಾದ ಐಪೊದಲ್ಲಿ ನಡೆಯುತ್ತಿರುವ ಸುಲ್ತಾನ್ ಅಜ್ಲಾನ್‌ ಶಾ ಹಾಕಿ ಚಾಂಪಿಯನ್‌ಷಿಪ್‌‌ನಲ್ಲಿ ಬುಧವಾರ ನಡೆದ ಮಹತ್ವದ ಪಂದ್ಯದಲ್ಲಿ ಜಪಾನ್ ವಿರುದ್ಧ 4-3 ಗೋಲುಗಳ ಅಂತರದ ಗೆಲುವು ಸಾಧಿಸಿರುವ ಭಾರತದ ಫೈನಲ್ ಕನಸು ಜೀವಂತವಾಗಿದೆ.

ಹಾಗಿದ್ದರೂ ಭಾರತದ ಫೈನಲ್ ಪ್ರವೇಶ ಅದೃಷ್ಟವು ಗ್ರೇಟ್ ಬ್ರಿಟನ್ ಹಾಗೂ ಆಸ್ಟ್ರೇಲಿಯಾ ಪಂದ್ಯಗಳ ನಡುವಣ ಫಲಿತಾಂಶವನ್ನು ಅವಲಂಬಿಸಲಿದೆ.

ಪುರುಷ ತಂಡ ರ‍್ಯಾಂಕಿಂಗ್‌ನಲ್ಲಿ 16ನೇ ಸ್ಥಾನದಲ್ಲಿರುವ ಜಪಾನ್, ವಿಶ್ವ ನಂ.6 ತಂಡವಾದ ಭಾರತಕ್ಕೆ ಕಠಿಣ ಪೈಪೋಟಿಯನ್ನು ಒಡಿತ್ತು. ಆದರೆ ಹ್ಯಾಟ್ರಿಕ್ ಗೋಲು ದಾಖಲಿಸಿದ ಮನ್‌ದೀಪ್ ಸಿಂಗ್ ಭಾರತಕ್ಕೆ ರೋಚಕ ಗೆಲುವು ಒದಗಿಸಿ ಕೊಡುವಲ್ಲಿ ನೆರವಾದರು.

ಪಂದ್ಯದ 45, 51 ಹಾಗೂ 58ನೇ ನಿಮಿಷಗಳಲ್ಲಿ ಗೋಲು ಬಾರಿಸುವ ಮೂಲಕ ಮನ್‌ದೀಪ್ ಹ್ಯಾಟ್ರಿಕ್ ಗೋಲುಗಳ ಸಾಧನೆ ಮಾಡಿದರು. ಜಪಾನ್ ಪರ ಹೀಟಾ ಯೋಶಿಹರ ಹಾಗೂ ಜೆನ್ಕಿ ಮಿಟಾನಿ ಗೋಲುಗಳನ್ನು ಬಾರಿಸಿ ಸೋಲಿನ ಅಂತರವನ್ನು ತಗ್ಗಿಸಿದರು.