ಸಯ್ಯದ್ ಮೋದಿ ಇಂಟರ್‌ನ್ಯಾಷನಲ್: ಕ್ವಾರ್ಟರ್‌ಗೆ ಲಗ್ಗೆಯಿಟ್ಟ ಸೈನಾ, ವರ್ಮಾ, ಕಶ್ಯಪ್

ಲಖನೌ: ಪ್ರತಿಷ್ಠಿತ ಸಯ್ಯದ್ ಮೋದಿ ಇಂಟರ್‌ನ್ಯಾಷನಲ್ ವರ್ಲ್ಡ್ ಸೂಪರ್ ಟೂರ್ 300 ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಭಾರತದ ಹಿರಿಯ ಅನುಭವಿ ಆಟಗಾರ್ತಿ ಸೈನಾ ನೆಹ್ವಾಲ್, ಹಾಲಿ ಚಾಂಪಿಯನ್ ಸಮೀರ್ ವರ್ಮಾ ಹಾಗೂ ಪರುಪ್ಪಳ್ಳಿ ಕಶ್ಯಪ್ ಕ್ವಾರ್ಟರ್ ಫೈನಲ್‌ಗೆ ಪ್ರವೇಶಿಸಿದ್ದಾರೆ.

ಗುರುವಾರ ನಡೆದ ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ದ್ವಿತೀಯ ಶ್ರೇಯಾಂತಿಕ ಸೈನಾ ಅವರು ಅಮೋಲಿಕಾ ಸಿಂಗ್ ಸಿಸೋಡಿಯಾ ವಿರುದ್ಧ 21-14, 21-9ರ ಅಂತರದ ಸುಲಭ ಗೆಲುವು ದಾಖಲಿಸಿದರು.

ಅತ್ತ ಪುರುಷ ಸಿಂಗಲ್ಸ್ ವಿಭಾಗದಲ್ಲಿ 2012 ಹಾಗೂ 2015ರ ಚಾಂಪಿಯನ್ ಕಶ್ಯಪ್ ಅವರು ಇಂಡೋನೇಷ್ಯಾದ ಅಬ್ದುಲ್ ಖೋಲಿಕ್ ವಿರುದ್ಧ 9-21, 22-20, 21-8ರ ಅಂತರದ ಕಠಿಣ ಗೆಲುವು ದಾಖಲಿಸಿ ಮುನ್ನಡೆದರು.

ಇನ್ನು ಟೂರ್ನಿಯಲ್ಲಿ ಮೂರನೇ ಶ್ರೇಯಾಂಕಿತರಾಗಿರುವ ಸಮೀರ್ ಅವರು ಚೀನಾದ ಜಾವೋ ಜುನ್‌ಪೆಂಗ್ ವಿರುದ್ಧ 22-20, 21-17ರ ಅಂತರದಲ್ಲಿ ಗೆಲುವು ದಾಖಲಿಸಿ ಅಂತಿಮ ಎಂಟರ ಘಟ್ಟಕ್ಕೆ ಮುನ್ನಡೆದರು.

ಕ್ವಾರ್ಟರ್ ಮುಖಾಮುಖಿಯಲ್ಲಿ ಹಾಲಿ ಒಲಿಂಪಿಕ್ ಕಂಚಿನ ಪದಕಧಾರಿಯಾಗಿರುವ ಸೈನಾ ಅವರು ಎಂಟನೇ ಶ್ರೇಯಾಂಕಿತೆ ರಿತುಪರ್ಣ ದಾಸ್ ಅವರ ಸವಾಲನ್ನು ಎದುರಿಸಲಿದ್ದಾರೆ.

ಕರ್ನಾಟಕದ ಅಶ್ವಿನಿ ಪೊನ್ನಪ್ಪ ಹಾಗೂ ಸಾತ್ವಿಕ್‌ಸಾಯ್‌ರಾಜ್ ರಾಂಕಿರೆಡ್ಡಿ ಜೋಡಿ ಕೂಡಾ ಅಂತಿಮ ಎಂಟರ ಘಟ್ಟವನ್ನು ಪ್ರವೇಶಿಸಿದ್ದಾರೆ. ಅತ್ತ ಬಿ ಸಾಯ್ ಪ್ರಣೀತ್ ಸಹ ಮುನ್ನಡೆದಿದ್ದು, ಪದಕ ನಿರೀಕ್ಷೆಯಾಗಿದ್ದಾರೆ.