ಹೊಸದಿಲ್ಲಿ: ಡಬ್ಲ್ಯುಬಿಒ ಏಷ್ಯಾ ಪೆಸಿಫಿಕ್‌ ಕಿರೀಟ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾದ ಭಾರತೀಯ ಬಾಕ್ಸರ್‌ ವಿಜೇಂದರ್‌ ಸಿಂಗ್‌ ಇದೀಗ ದ್ವಿತೀಯ ಸುತ್ತಿನಲ್ಲಿ ಚೀನಾದ ಡಬ್ಲ್ಯುಬಿಒ ಒರಿಯೆಂಟಲ್‌ ಸೂಪರ್‌ ಮಿಡಲ್‌ವೇಟ್‌ ಚಾಂಪಿಯನ್‌ ಜುಲ್ಫಿಕರ್‌ ಮೈಮೈತೈಲಿ ಅವರನ್ನು ಏಪ್ರಿಲ್‌ 1ರಂದು ಮುಂಬಯಿನಲ್ಲಿ ಎದುರಿಸಲಿದ್ದಾರೆ.
ಜುಲ್ಫಿಕರ್‌ ಅಲ್ಲದೆ ಮಾಜಿ ಕಾಮನ್‌ ವೆಲ್ತ್‌ ಗೇಮ್ಸ್‌ನ ಚಿನ್ನದ ಪದಕ ವಿಜೇತ ಅಖಿಲ್‌ ಕುಮಾರ್‌ ಮತ್ತು ಏಷ್ಯನ್‌ ಚಾಂಪಿಯನ್‌ಷಿಪ್‌ ಕಂಚಿನ ಪದಕ ವಿಜೇತ ಜಿತೇಂದರ್‌ ಕುಮಾರ್‌ ವಿಜೇಂದರ್‌ ಅವರ ಎದುರಾಳಿಯಾಗುವ ಸಾಧ್ಯತೆ ಇದೆ. ಆದರೆ ಇನ್ನು ನಿರ್ಧಾರವಾಗಿಲ್ಲ. ಕಳೆದ ಡಿಸೆಂಬರ್‌ನಲ್ಲಿ ತಾಂಜೇನಿಯಾದ ಫ್ರಾನ್ಸಿಸ್‌ ಚೆಕಾ ವಿರುದ್ಧ ಗೆದ್ದು ಕಿರೀಟ ಉಳಿಸಿಕೊಂಡ 31 ವರ್ಷದ ವಿಜೇಂದರ್‌, ವೃತ್ತಿಪರ ಬಾಕ್ಸಿಂಗ್‌ನಲ್ಲಿ ಈವರೆಗೂ ಜಯದ ನಾಗಾಲೋಟ ಮುಂದುವರಿಸಿದ್ದಾರೆ. ಏಪ್ರಿಲ್‌ 1ರಂದು ಮೈಮೈತೈಲಿ ಎದುರಿಸಲಿರುವ ವಿಜೇಂದರ್‌ಗೆ ಭಾರತದಲ್ಲಿ ನಡೆಯುತ್ತಿರುವ ಮೂರನೇ ಪಂದ್ಯವಾಗಿದೆ. ವಿಜೇಂದರ್‌ ಅವರ ಹಿಂದಿನ ಎರಡು ಪಂದ್ಯಗಳು ಹೊಸದಿಲ್ಲಿಯಲ್ಲಿ ನಡೆದಿವೆ.