ಕೊಹ್ಲಿ-ಫೆಡರರ್‌ ಪರಸ್ಪರ ಭೇಟಿ

ಮೆಲ್ಬೋರ್ನ್‌ : ಆಸ್ಪ್ರೇಲಿಯಾದಲ್ಲಿ ಭಾರತ ತಂಡಕ್ಕೆ 2 ಸರಣಿ (ಟೆಸ್ಟ್‌ ಮತ್ತು ಏಕದಿನ) ಗೆಲುವು ಕೊಡಿಸಿದ ಬಳಿಕ ಟೀಮ್‌ ಇಂಡಿಯಾ ನಾಯಕ ವಿರಾಟ್‌ ಕೊಹ್ಲಿ ಅವರು ಆಸ್ಪ್ರೇಲಿಯಾ ಪ್ರವಾಸದ ಕೊನೆಯ ಚರಣವನ್ನು ಸ್ಮರಣೀಯವಾಗಿಸಿಕೊಳ್ಳುವ ದಿಸೆಯಲ್ಲಿ ಶನಿವಾರ ಇಲ್ಲಿನ ರಾಡ್‌ ಲೇವರ್‌ ಅರೆನಾದಲ್ಲಿ ಟೆನಿಸ್‌ ದಿಗ್ಗಜ ರೋಜರ್‌ ಫೆಡರರ್‌ ಅವರನ್ನು ಭೇಟಿ ಮಾಡಿ ಫೋಟೊ ಕ್ಲಿಕ್ಕಿಸಿಕೊಂಡರು.
ಈ ಸಂದರ್ಭದಲ್ಲಿ ಪತ್ನಿ ಅನುಷ್ಕಾ ಕೂಡ ಇದ್ದರು. ಆ ಬಳಿಕ ಕೊಹ್ಲಿ, ತಮ್ಮ ಟ್ವಿಟರ್‌ ಪೇಜ್‌ನಲ್ಲಿ 'ಮೂವರು ದಿಗ್ಗಜರು, ಒಂದು ಫೋಟೊ' ಎಂಬ ಶೀರ್ಷಿಕೆಯಡಿ ಫೋಟೊವನ್ನು ಅಪಲೋಡ್‌ ಮಾಡಿದ್ದಾರೆ. ರೋಜರ್‌ ಫೆಡರರ್‌ ಅವರು ಸಚಿನ್‌ ತೆಂಡೂಲ್ಕರ್‌ ಅವರ ನೆಚ್ಚಿನ ಆಟಗಾರ ಕೂಡ. ಸಚಿನ್‌ ಈ ಹಿಂದೆ ಅನೇಕ ಬಾರಿ ಕ್ರೀಡಾಂಗಣಕ್ಕೆ ತೆರಳಿ ಫೆಡರರ್‌ ಅವರನ್ನು ಭೇಟಿ ಮಾಡಿದ್ದಾರೆ.
ಫೆಡರರ್‌ಗೂ ಐಡಿ ಕೇಳಿದ ಭದ್ರತಾ ಸಿಬ್ಬಂದಿ!
ನೀವು ಯಾರೇ ಆಗಿರಿ, ಎಷ್ಟು ದೊಡ್ಡ ವ್ಯಕ್ತಿಯೇ ಆಗಿರಿ, ಆಸ್ಪ್ರೇಲಿಯನ್‌ ಓಪನ್‌ ನಡೆಯುವ ವಠಾರಕ್ಕೆ ಕಾಲಿಡಬೇಕಿದ್ದರೆ ನಿಮ್ಮಲ್ಲಿ ಗುರುತು ಚೀಟಿ (ಐಡಿ) ಇರಲೇ ಬೇಕು. ಇಂಥದ್ದೊಂದು ಪರಿಸ್ಥಿತಿಯನ್ನು ಸ್ವತಃ ಟೆನಿಸ್‌ ದಿಗ್ಗಜ ರೋಜರ್‌ ಫೆಡರರ್‌ ಕೂಡ ಎದುರಿಸಬೇಕಾಯಿತು.
20 ಗ್ರ್ಯಾನ್‌ ಸ್ಪ್ಯಾಮ್‌ ಪ್ರಶಸ್ತಿಗಳ ಒಡೆಯ ಫೆಡರರ್‌ ಹೆಚ್ಚೂ ಕಡಿಮೆ 20 ವರ್ಷಗಳಿಂದ ರಾಡ್‌ ಲೇವರ್‌ ಅರೆನಾಗೆ ಕಾಣಿಸಿಕೊಳ್ಳುತ್ತಿದ್ದಾರೆ. ಅಂತೆಯೇ ಶನಿವಾರ ಅರೆನಾಗೆ ಆಗಮಿಸಿದ ಸ್ವಿಸ್‌ ಟೆನಿಸ್‌ ಕಣ್ಮಣಿಯನ್ನು ಭದ್ರತಾ ಸಿಬ್ಬಂದಿ ತಡೆದಿದ್ದಾರೆ.
ಕಾರಣವೇನೆಂದರೆ ಅವರ ಬಳಿ ಪಾಸ್‌ ಇರಲಿಲ್ಲ. 'ಪಾಸ್‌ ಇಲ್ಲದಿದ್ದರೆ, ಪ್ರವೇಶವಿಲ್ಲ' ಎಂದು ಬಿಗಿ ಪಟ್ಟು ಹಿಡಿದಿದ್ದಾರೆ ಸಿಬ್ಬಂದಿ. ಹಾಗಂತ, 'ತಾಳ್ಮೆಯ ಸಾಕಾರಮೂರ್ತಿ' ಫೆಡರರ್‌ ಕೋಪಿಸಿಕೊಳ್ಳಲಿಲ್ಲ. ಕೋಚ್‌ ಇವಾನ್‌ ಲುಬಿಚಿಚ್‌ ಅಲ್ಲಿಗೆ ಬಂದು ಐಡಿ ನೀಡುವ ತನಕ ಸುಮ್ಮನೆ ಬದಿಯಲ್ಲಿ ನಿಂತಿದ್ದರು. ಲುಬಿಚಿಚ್‌ ಐಡಿ ನೀಡಿದ ಬಳಿಕ ಸಿಬ್ಬಂದಿ ಫೆಡರರ್‌ರನ್ನು ಒಳಗೆ ಬಿಟ್ಟಿದ್ದಾರೆ.