ಬೆಂಗಳೂರು : ನಾಲ್ಕು ಸೆಟ್‌ಗಳ ಹೋರಾಟದಲ್ಲಿ ದಿಟ್ಟ ಪ್ರತಿರೋಧ ಎದುರಿಸಿದ ಎಲ್‌ಐಸಿ ತಂಡ ರಾಜ್ಯ ಹಿರಿಯರ 'ಎ' ಡಿವಿಜನ್‌ ವಾಲಿಬಾಲ್‌ ಚಾಂಪಿಯನ್‌ಷಿಪ್‌ನಲ್ಲಿ ಎಚ್‌ವೈಎಸ್‌ಎ ತಂಡದ ವಿರುದ್ಧ ಪ್ರಯಾಸದ ಜಯ ಗಳಿಸಿತು.
ಜಯನಗರದ ರಾಣಿ ಕಿತ್ತೂರು ಚೆನ್ನಮ್ಮ ಕ್ರೀಡಾ ಸಂಕೀರ್ಣದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಎಲ್‌ಐಸಿ ತಂಡ 3-1(25-23, 29-27, 23-25, 25-18) ಸೆಟ್‌ಗಳಿಂದ ಎಚ್‌ವೈಎಸ್‌ಎ ತಂಡದ ವಿರುದ್ಧ ಗೆದ್ದು ನಿಟ್ಟುಸಿರು ಬಿಟ್ಟಿತು. 90 ನಿಮಿಷ ನಡೆದ ಹೋರಾಟದಲ್ಲಿ ತೃತೀಯ ಸೆಟ್‌ನಲ್ಲಿ ಹಿನ್ನಡೆ ಕಂಡರೂ ಅಂತಿಮವಾಗಿ ಎಲ್‌ಐಸಿ ತಂಡ ಪಂದ್ಯ ವಶಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಯಿತು.
ಮತ್ತೊಂದು ಪಂದ್ಯದಲ್ಲಿ ಎಸ್‌ಡಬ್ಲ್ಯುಆರ್‌ ತಂಡ 3-2(23-25, 15-25, 25-18, 25-13, 15-10) ಸೆಟ್‌ಗಳಿಂದ ಪೋಸ್ಟಲ್‌ ಎದುರು ರೋಚಕ ಜಯ ಗಳಿಸಿತು. 105 ನಿಮಿಷ ನಡೆದ ಜಿದ್ದಾಜಿದ್ದಿನ ಕಾಳಗದಲ್ಲಿ ಎಸ್‌ಡಬ್ಲ್ಯುಆರ್‌ ಪರ ಆಲ್‌ ರೌಂಡರ್‌ ಹರೀಶ್‌, ಬ್ಲ್ಯಾಕರ್‌ ಮನೋಜ್‌ ಶ್ರೇಷ್ಠ ಪ್ರದರ್ಶನ ನೀಡಿದರು.