ವಿಂಬಲ್ಡನ್‌: ನಡಾಲ್‌ಗೆ ಸೋಲಿನ ಶಾಕ್

ಲಂಡನ್: ವಿಂಬಲ್ಡನ್ ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಾರೆಗಳಲ್ಲಿ ಓರ್ವರೆನಿಸಿಕೊಂಡಿದ್ದ ಸ್ಪೇನ್‌ನ ರಾಫೆಲ್ ನಡಾಲ್ ಅನಿರೀಕ್ಷಿತ ಸೋಲಿನ ಆಘಾತ ಎದುರಿಸಿದ್ದಾರೆ.

ಸೋಮವಾರ ನಡೆದ ನಾಲ್ಕನೇ ಸುತ್ತಿನ ಹೋರಾಟದಲ್ಲಿ 16ನೇ ಶ್ರೇಯಾಂಕಿತರಾದ ಗಿಲ್ಲೆಸ್ ಮುಲ್ಲರ್ ವಿರುದ್ಧ ನಡಾಲ್ ಮುಗ್ಗರಿಸಿದ್ದಾರೆ.

ಅಂತಿಮ ಕ್ಷಣದ ವರೆಗೂ ಕೆಚ್ಚೆದೆಯ ಹೋರಾಟ ನೀಡಿದ ನಡಾಲ್ ಕೊನೆಗೂ ಪಂದ್ಯವನ್ನು 3-6, 4-6, 6-3, 6-4, 13-15ರ ರೋಚಕ ಹಂತದಲ್ಲಿ ಕಳೆದುಕೊಂಡರು.

ಈ ಅಚ್ಚರಿಯ ಸೋಲಿನಿಂದಾಗಿ ಕಳೆದ ಆರು ವರ್ಷಗಳಲ್ಲಿ ವಿಂಬಲ್ಡನ್‌ನಲ್ಲಿ ಕ್ವಾರ್ಟರ್ ಪ್ರವೇಶ ಕಾಣದೇ ನಡಾಲ್ ಹೊರಬೀಳುತ್ತಿದ್ದಾರೆ. 2013ರಲ್ಲಿ ಮೊದಲ ಸುತ್ತು, 2012, 2013ರಲ್ಲಿ ಎರಡನೇ ಸುತ್ತು ಮತ್ತು 2014 ಹಾಗೂ 2017ರಲ್ಲಿ ನಾಲ್ಕನೇ ಸುತ್ತಿನಿಂದ ಹೊರಬಿದ್ದಿದ್ದಾರೆ.

ನಡಾಲ್ ಇದುವರೆಗೆ ಗೆದ್ದಿರುವ 15 ಗ್ರ್ಯಾನ್ ಸ್ಲಾಮ್‌ಗಳ ಪೈಕಿ ಎರಡು ವಿಂಬಲ್ಡನ್ ಪ್ರಶಸ್ತಿಗಳು ಸೇರಿವೆ. ಅವರು ಕೊನೆಯ ಬಾರಿ 2011ರಲ್ಲಿ ವಿಂಬಲ್ಡನ್ ಗೆದ್ದಿದ್ದರು.

ಅತ್ತ 2008ರಲ್ಲಿ ಗ್ರ್ಯಾನ್ ಸ್ಲಾಮ್ ಕೂಟದಲ್ಲಿ ಕ್ವಾರ್ಟರ್ ಫೈನಲ್ ತಲುಪಿರುವುದನ್ನು ಬಿಟ್ಟರೆ 34ರ ಹರೆಯದ ಮುಲ್ಲರ್ ಪ್ರತಿಷ್ಠಿತ ಟೂರ್ನಿಯಲ್ಲಿ ಅಂಥದ್ದೇನು ಸಾಧನೆ ಮಾಡಿರಲಿಲ್ಲ. ಆದರೂ ತಮ್ಮ ಅಪಾರ ಅನುಭವ ಸಂಪತ್ತಿನಿಂದ ನಡಾಲ್ ಅಡಿಮೇಲು ಮಾಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಮುಲ್ಲರ್ ತನ್ನ ಮುಂದಿನ ಹೋರಾಟದಲ್ಲಿ 2014ರ ಅಮೆರಿಕನ್ ಏಪನ್ ಚಾಂಪಿಯನ್ ಮರಿನ್ ಸಿಲಿಕ್ ಸವಾಲನ್ನು ಎದುರಿಸಲಿದ್ದಾರೆ.