ಮುಂಬಾ, ಯೋಧಾಗೆ ಗೆಲುವಿನ ತುಡಿತ

ಪ್ಲೇಆಫ್ಸ್‌ ಹಂತದ ಪಂದ್ಯಗಳು ಇಂದಿನಿಂದ

Vijaya Karnataka Web

ಕೊಚ್ಚಿ : ಮಾಜಿ ಚಾಂಪಿಯನ್‌ ಯು ಮುಂಬಾ ಮತ್ತು ಪ್ರಬಲ ಯು.ಪಿ. ಯೋಧಾ ತಂಡಗಳು ಪ್ರೊ ಕಬಡ್ಡಿ ಲೀಗ್‌ 6ನೇ ಆವೃತ್ತಿಯಲ್ಲಿ ಭಾನುವಾರ ನಡೆಯಲಿರುವ ಮೊದಲ ಪ್ಲೇಆಫ್ಸ್‌ (ಎಲಿಮಿನೇರ್‌-1) ಪಂದ್ಯದಲ್ಲಿ ಮುಖಾಮುಖಿಯಾಗಲಿದ್ದು, ಗೆಲುವಿನ ವಿಶ್ವಾಸ ಹೊಂದಿವೆ.

ಲೀಗ್‌ ಉದ್ದಕ್ಕೂ ಶ್ರೇಷ್ಠ ಪ್ರದರ್ಶನ ನೀಡಿರುವ ಮುಂಬಾ, ಗೆಲ್ಲುವ ನೆಚ್ಚಿನ ತಂಡ ಎನಿಸಿದೆ. ಸ್ಟಾರ್‌ ರೇಡರ್‌ ಸಿದ್ದಾರ್ಥ್‌ ದೇಸಾಯಿ ತಂಡದ ಬಲಾಢ್ಯ ಶಕ್ತಿ ಎನಿಸಿದ್ದಾರೆ. ಅತ್ತ ಆರಂಭದಲ್ಲಿ ಸೋಲು, ಗೆಲುವಿನ ಮಿಶ್ರಫಲ ಕಂಡರೂ ಕ್ರಮೇಣ ಚೇತರಿಕೆಯ ಪ್ರದರ್ಶನ ನೀಡಿರುವ ಯೋಧಾ ಕೊನೆಯ ತಂಡವಾಗಿ ಪ್ಲೇಆಫ್ಸ್‌ಗೆ ಕಾಲಿಟ್ಟಿದ್ದು, ಮುಂಬಾ ತಂಡವನ್ನು ಕಟ್ಟಿ ಹಾಕಲು ಹವಣಿಸುತ್ತಿದೆ.

ಎಲಿಮಿನೇಟರ್‌-2ನೇ ಪಂದ್ಯ ದಬಾಂಗ್‌ ಡೆಲ್ಲಿ ಮತ್ತು ಬೆಂಗಾಲ್‌ ವಾರಿಯರ್ಸ್‌ ತಂಡಗಳು ಪೈಪೋಟಿ ನಡೆಸಲಿವೆ. ಕಳೆದ ಐದು ಆವೃತ್ತಿಗಳಲ್ಲಿ ನಿಸ್ತೇಜ ಪ್ರದರ್ಶನದೊಂದಿಗೆ ಲೀಗ್‌ ಹಂತದಲ್ಲೇ ಹೊರಬೀಳುತ್ತಿದ್ದ ದಬಾಂಗ್‌ ಡೆಲ್ಲಿ ಇದೇ ಮೊದಲ ಬಾರಿ ಇರಾನ್‌ ಆಟಗಾರ ಮೆರಾಜ್‌ ಶೇಖ್‌ ನೇತೃತ್ವದಲ್ಲಿ ಪ್ಲೇಆಫ್ಸ್‌ ತಲುಪಿದೆ. ಅತ್ತ ವೈಲ್ಡ್‌ ಕಾರ್ಡ್‌ ಪಂದ್ಯಕ್ಕೂ ಮುನ್ನವೇ ಪ್ಲೇಆಫ್ಸ್‌ ಟಿಕೆಟ್‌ ಪಡೆದಿದ್ದ ಬೆಂಗಾಲ್‌ ವಾರಿಯರ್ಸ್‌, ದಬಾಂಗ್‌ ಎದುರು ಸುಲಭ ಜಯವನ್ನು ಎದುರು ನೋಡುತ್ತಿದೆ.

ಪ್ಲೇಆಫ್ಸ್‌ ಟು ಫೈನಲ್‌ ಹೀಗಿದೆ

ಪ್ರಸ್ತುತ ಪ್ಲೇಆಫ್ಸ್‌ ಹಂತಕ್ಕೆ 'ಎ' ಮತ್ತು 'ಬಿ' ಗುಂಪಿನಿಂದ ತಲಾ ಮೂರು ತಂಡಗಳು ಅರ್ಹತೆ ಹೊಂದಿವೆ. 'ಎ' ಮತ್ತು 'ಬಿ' ಗುಂಪಿನಲ್ಲಿ ಅಗ್ರಸ್ಥಾನ ಪಡೆದಿರುವ ಎರಡು ತಂಡಗಳು ಕ್ವಾಲಿಫೈಯರ್‌ 1ರಲ್ಲಿ ಮುಖಾಮುಖಿಯಾಗಲಿವೆ. ಕ್ವಾಲಿಫೈಯರ್‌ 1ರಲ್ಲಿ ಗೆದ್ದ ತಂಡ ನೇರವಾಗಿ ಮುಂಬಯಿನಲ್ಲಿ ಜ.5ರಂದು ನಡೆಯಲಿರುವ ಫೈನಲ್‌ಗೆ ಅರ್ಹತೆ ಗಳಿಸಲಿದೆ. ಸೋತ ತಂಡ ಎಲಿಮಿನೇಟರ್‌ 3ರಲ್ಲಿ ಗೆದ್ದ ತಂಡದ ವಿರುದ್ಧ ಜ.3ರಂದು ನಡೆಯಲಿರುವ ಕ್ವಾಲಿಫೈಯರ್‌ 2ರಲ್ಲಿ ಕಣಕ್ಕಿಳಿಯಲಿದೆ. ಇದರಲ್ಲಿ ಗೆದ್ದ ತಂಡವು ಫೈನಲ್‌ ಪ್ರವೇಶಿಸಲಿದೆ. ಈ ಮಧ್ಯೆ, ಎಲಿಮಿನೇಟರ್‌ 1 ಮತ್ತು 2ರಲ್ಲಿ ಸೋತ ತಂಡಗಳು ಪ್ಲೇಆಫ್ಸ್‌ ಹಂತದಲ್ಲೇ ಹೋರಾಟ ಕೊನೆಗೊಳಿಸಲಿವೆ.