ಬೆಂಗಳೂರು ಓಪನ್‌ ಟೆನ್‌ಪಿನ್‌ ಬೌಲಿಂಗ್‌
ಬೆಂಗಳೂರು: ನಿರೀಕ್ಷಿತ ಪ್ರದರ್ಶನ ನೀಡಿದ ಅನುಭವಿ ಆಟಗಾರ್ತಿ ಕರ್ನಾಟಕದ ಜೂಡಿ ಆಲ್ಬ, ಇಲ್ಲಿ ನಡೆಯುತ್ತಿರುವ ಬೆಂಗಳೂರು ಓಪನ್‌ ಟೆನ್‌ಪಿನ್‌ ಬೌಲಿಂಗ್‌ ಚಾಂಪಿಯನ್‌ಷಿಪ್‌ನ ಮಹಿಳಾ ವಿಭಾಗದಲ್ಲಿ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದಾರೆ.
ಇಲ್ಲಿನ ಒರಾಯನ್‌ ಮಾಲ್‌ನಲ್ಲಿರುವ ಬ್ಲೂ ಒ'ಅರೆನಾದಲ್ಲಿ ಶುಕ್ರವಾರ ನಡೆದ ಮಹಿಳಾ ವಿಭಾಗದ ಫೈನಲ್‌ ಸ್ಪರ್ಧೆಯಲ್ಲಿ ಗಮನ ಸೆಳೆದ ಜೂಡಿ ಆಲ್ಬ, ಎಂಟು ಗೇಮ್‌ಗಳಿಂದ ಒಟ್ಟಾರೆ 1444 ಅಂಕಗಳನ್ನು ಸಂಪಾದಿಸಿ ಟ್ರೋಫಿ ಎತ್ತಿಹಿಡಿದರು. 1441 ಅಂಕಗಳನ್ನು ಗಳಿಸಿದ ಹರಿಯಾಣದ ಯುವ ಬೌಲರ್‌ ಅನುಕೃತಿ ಭಿಶ್ಣೋಯ್‌ ರನ್ನರ್‌ ಅಪ್‌ ಸ್ಥಾನ ತಮ್ಮದಾಗಿಸಿಕೊಂದರು.
ಪುರುಷರ ವಿಭಾಗದಲ್ಲಿ ಭರ್ಜರಿ ಪ್ರದರ್ಶನ ನೀಡಿದ ಆಕಾಶ್‌ ಅಶೋಕ್‌ ಕುಮಾರ್‌ 3 ಗೇಮ್‌ಗಳಲ್ಲಿ 745 ಅಂಕಗಳನ್ನು ಗಳಿಸುವ ಮೂಲಕ ಅಂಕ ಪಟ್ಟಿಯ ಅಗ್ರಸ್ಥಾನಿಯಾಗಿ ಫೈನಲ್‌ ತಲುಪಿದ್ದಾರೆ. ರಾಷ್ಟ್ರೀಯ ಚಾಂಪಿಯನ್‌ ದೃವ ಸದ್ರಾ (1442) ದ್ವಿತೀಯ ಸ್ಥಾನದಲ್ಲಿದ್ದು, 16 ವರ್ಷದ ಯುವ ಪ್ರತಿಭೆ ಮಿಸಾಮ್‌ ರಿಜ್ವಿ (1441) ತೃತೀಯ ಸ್ಥಾನ ಅಲಂಕರಿಸಿದ್ದಾರೆ. ಶನಿವಾರ ಕರ್ನಾಟಕ ಬಂದ್‌ ಇರುವ ಕಾರಣ ಪುರುಷರ ಫೈನಲ್‌ ಸ್ಪರ್ಧೆಯನ್ನು ಒಂದು ದಿನದ ಕಾಲ ಮುಂದೂಡಲಾಗಿದೆ.