ಐಸಿಸಿ ಮಹಿಳಾ ವಿಶ್ವಕಪ್‌ ಕ್ವಾಲಿಫೈಯರ್‌ ಟೂರ್ನಿಯ ಸೂಪರ್‌ ಸಿಕ್ಸ್‌ ಪಂದ್ಯ
ಕೊಲಂಬೊ: ಸಂಘಟಿತ ಪ್ರದರ್ಶನ ತೋರಿದ ಭಾರತ ತಂಡ, ಐಸಿಸಿ ಮಹಿಳಾ ವಿಶ್ವಕಪ್‌ ಕ್ವಾಲಿಫೈಯರ್‌ ಟೂರ್ನಿಯ ಸೂಪರ್‌ ಸಿಕ್ಸ್‌ ಹಂತದ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ 49 ರನ್‌ಗಳ ಭರ್ಜರಿ ಜಯ ದಾಖಲಿಸಿದೆ.
ಇದರೊಂದಿಗೆ ಮಿಥಾಲಿ ರಾಜ್‌ ಬಳಗ ಐಸಿಸಿ ಮಹಿಳಾ ವಿಶ್ವಕಪ್‌ ಟೂರ್ನಿಗೆ ಅರ್ಹತೆ ಪಡೆಯುವ ಹಾದಿಯಲ್ಲಿ ದಿಟ್ಟ ಹೆಜ್ಜೆ ಇಟ್ಟಿದೆ. ಇಲ್ಲಿನ ಪಿ ಸಾರಾ ಓವಲ್‌ ಮೈದಾನದಲ್ಲಿ ಬುಧವಾರ ನಡೆದ ಪಂದ್ಯದಲ್ಲಿ ಟಾಸ್‌ ಸೋತು ಮೊದಲು ಬ್ಯಾಟಿಂಗ್‌ ನಡೆಸಿದ ಭಾರತ 50 ಓವರ್‌ಗಳಲ್ಲಿ 8 ವಿಕೆಟ್‌ಗೆ 205 ರನ್‌ ಗಳಿಸಿತು. ಆರಂಭಿಕ ಆಟಗಾರ್ತಿ ಮೋನಾ ಮೆಶ್ರಮ್‌ (55) ಮತ್ತು ನಾಯಕಿ ಮಿಥಾಲಿ ರಾಜ್‌ (64) ಅರ್ಧಶತಕಗಳೊಂದಿಗೆ ತಂಡದ ಮೊತ್ತವನ್ನು ಹೆಚ್ಚಿಸಿದರು.
ಸಾಧಾರಣ ಸವಾಲು ಬೆನ್ನಟ್ಟಿದ ದಕ್ಷಿಣ ಆಫ್ರಿಕಾ ತಂಡ ಭಾರತೀಯ ವನಿತೆಯರ ಕರಾರುವಾಕ್‌ ದಾಳಿಗೆ ಕುಸಿದು 46.4 ಓವರ್‌ಗಳಲ್ಲಿ 156 ರನ್‌ಗಳಿಗೆ ಆಲ್‌ಔಟಾಯಿತು. ಭಾರತ ಪರ ಮಧ್ಯಮ ವೇಗಿ ಶಿಖಾ ಪಾಂಡೆ (34ಕ್ಕೆ4) ನಾಲ್ಕು ವಿಕೆಟ್‌ ಪಡೆದರೆ, ಎಡಗೈ ಸ್ಪಿನ್ನರ್‌ ಏಕ್ತಾ ಬಿಶ್ಟ್‌ (22ಕ್ಕೆ3) ಮೂರು ವಿಕೆಟ್‌ ಉರುಳಿಸಿದರು.
ಶುಕ್ರವಾರ ನಡೆಯುವ ಸೂಪರ್‌ ಸಿಕ್ಸ್‌ ಹಂತದ ತನ್ನ 2ನೇ ಪಂದ್ಯದಲ್ಲಿ ಭಾರತ ತಂಡ, ಬಾಂಗ್ಲಾದೇಶದ ಸವಾಲನ್ನು ಎದುರಿಸಲಿದೆ.
ಸಂಕ್ಷಿಪ್ತ ಸ್ಕೋರ್‌
ಭಾರತ: 50 ಓವರ್‌ಗಳಲ್ಲಿ 8 ವಿಕೆಟ್‌ಗೆ 205 (ಮೋನಾ ಮೆಶ್ರಮ್‌ 55, ಮಿಥಾಲಿ ರಾಜ್‌ 64; ಮರಿಜೇನ್‌ ಕಪ್‌ 23ಕ್ಕೆ2, ಅಯಾಬೊಂಗ ಖಾಕ 44ಕ್ಕೆ2)
ದಕ್ಷಿಣ ಆಫ್ರಿಕಾ: 46.4 ಓವರ್‌ಗಳಲ್ಲಿ 156 (ತ್ರಿಶಾ ಚೆಟ್ಟಿ 52, ಮರಿಜೇನ್‌ ಕಪ್‌ 29; ಶಿಖಾ ಪಾಂಡೆ 34ಕ್ಕೆ4, ಏಕ್ತಾ ಬಿಶ್ಟ್‌ 22ಕ್ಕೆ3)