ಬ್ಯಾಡ್ಮಿಂಟನ್ ವಿಶ್ವ ಚಾಂಪಿಯನ್‌ಶಿಪ್: ಸಾಯಿ, ಪ್ರಣೋಯ್ ಶುಭಾರಂಭ

ಬಾಸೆಲ್‌ (ಸ್ವಿಜರ್ಲೆಂಡ್‌): ಪ್ರತಿಷ್ಠಿತ ಬ್ಯಾಡ್ಮಿಂಟನ್‌ ವಿಶ್ವ ಚಾಂಪಿಯನ್‌ಶಿಪ್‌ಗೆ ಭರ್ಜರಿ ಚಾಲನೆ ದೊರಕಿದ್ದು, ಭಾರತದ ಸಾಯಿ ಪ್ರಣೀತ್ ಹಾಗೂ ಎಚ್‌ಎಸ್ ಪ್ರಣೋಯ್ ಗೆಲುವಿನೊಂದಿಗೆ ಶುಭಾರಂಭ ಮಾಡಿಕೊಂಡಿದ್ಾದರೆ.

ಪುರುಷರ ಸಿಂಗಲ್ಸ್ ವಿಭಾಗದಲ್ಲಿ ವಿಶ್ವ 30 ಶ್ರೇಯಾಂಕದ ಪ್ರಣೋಯ್, ಫಿನ್ಲೆಂಡ್‌ನ ಎದುರಾಳಿ ಈಟು ಹಿನೊ ವಿರುದ್ಧ 17-21, 21-10, 21-11ರ ಕಠಿಣ ಅಂತರದಲ್ಲಿ ಗೆಲುವು ದಾಖಲಿಸಿದರು.

ಇನ್ನೊಂದೆಡೆ 19ನೇ ಶ್ರೇಯಾಂಕದ ಪ್ರಣೀತ್ ಸಹ ಕೆನೆಡಾದ ಜೇಸನ್ ಆಂಥನಿ ಹೊ-ಶೂ ವಿರುದ್ಧ 21-17, 21-16ರ ಅಂತರದಲ್ಲಿ ಗೆದ್ದು ಬೀಗಿದರು.

ಮಹಿಳಾ ಸಿಂಗಲ್ಸ್ ವಿಭಾಗದಲ್ಲಿ ಭಾರತದ ಮುಂಚೂಣಿ ಆಟಗಾರ್ತಿ ಪಿ.ವಿ ಸಿಂಧೂ ಚಿನ್ನದ ಬೇಟೆಯ ನಿರೀಕ್ಷೆಯಲ್ಲಿದ್ದಾರೆ. ವಿಶ್ವ ಚಾಂಪಿಯನ್‌ಷಿಪ್‌ ಕೂಟದಲ್ಲಿ ಸಿಂಧೂ ಹೆಚ್ಚು ಯಶಸ್ಸು ಪಡೆದಿರುವ ಭಾರತೀಯ ಬ್ಯಾಡ್ಮಿಂಟನ್‌ ತಾರೆಯಾಗಿದ್ದು, ಸತತ ಎರಡು ಬೆಳ್ಳಿ ಹಲವು ಕಂಚಿನ ಪದಕಗಳನ್ನು ಪಡೆದುಕೊಂಡಿದ್ದಾರೆ.