ಕ್ವಾರ್ಟರ್ ಫೈನಲ್‌ನಲ್ಲಿ ಮುಗ್ಗರಿಸಿದ ಸೈನಾ

ಹೊಸದಿಲ್ಲಿ: ಚೀನಾದ ನಾಂಜಿಂಗ್‌ನಲ್ಲಿ ಸಾಗುತ್ತಿರುವ ಬಿಡ್ಲ್ಯುಎಫ್ ಚಾಂಪಿಯನ್‌ಶಿಪ್ ಬ್ಯಾಡ್ಮಿಂಟನ್ ಟೂರ್ನಮೆಂಟ್‌ನಲ್ಲಿ ಭಾರತದ ಹಿರಿಯ ಅನುಭವಿ ಆಟಗಾರ್ತಿ ಸೈನಾ ನೆಹ್ವಾಲ್ ಕ್ವಾರ್ಟರ್ ಫೈನಲ್‌ನಲ್ಲಿ ಸೋಲಿನ ಕಹಿ ಅನುಭವಿಸಿ ಕೂಟದಿಂದಲೇ ನಿರ್ಗಮಿಸಿದ್ದಾರೆ.

ಬ್ಯಾಡ್ಮಿಂಟನ್‌ ವಿಶ್ವ ಚಾಂಪಿಯನ್‌ಷಿಪ್‌ ಟೂರ್ನಿಯಲ್ಲಿ ಸತತ ಎಂಟನೇ ಬಾರಿಗೆ ಕ್ವಾರ್ಟರ್ ಫೈನಲ್ ಪ್ರವೇಶಿಸಿದ ದಾಖಲೆ ಮಾಡಿರುವ ಸೈನಾ, ಮತ್ತೆ ಪ್ರಭಾವಿ ಎನಿಸಿಕೊಳ್ಳುವಲ್ಲಿ ವಿಫಲವಾದರು.

ಪ್ರಿ ಕ್ವಾರ್ಟರ್‌ಫೈನಲ್‌ನಲ್ಲಿ ಬಲಿಷ್ಠ ಎದುರಾಳಿ ಇಂತನಾನ್‌ ಸವಾಲು ಮೆಟ್ಟಿ ನಿಂತ 10ನೇ ಶ್ರೇಯಾಂಕದ ಸೈನಾ ನೆಹ್ವಾಲ್‌ ಅವರಿಗೆ ಕ್ವಾರ್ಟರ್‌ಫೈನಲ್‌ನಲ್ಲಿ ಸ್ಪೇನ್‌ನ 7ನೇ ಶ್ರೇಯಾಂಕದ ಕ್ಯಾರೊಲಿನಾ ಮರಿನ್‌ ಸವಾಲು ಎದುರಾಗಿತ್ತು. 6-21, 11-21ರ ಸುಲಭ ಹೋರಾಟದಲ್ಲಿ ಸೋಲನುಭವಿಸುವ ಮೂಲಕ ನಿರಾಸೆ ಅನುಭವಿಸಿದರು.

ಏಳನೇ ಶ್ರೇಯಾಂಕಿತರಾಗಿರುವ ಮರಿನ್ ಕೇವಲ 31 ನಿಮಿಷಗಳಲ್ಲಿ ಸೈನಾ ಸವಾಲನ್ನು ಹಿಮ್ಮೆಟ್ಟಿಸಿದರು. ಈ ಮೂಲಕ ಸೈನಾ ಜತೆಗಿನ ಸ್ಪರ್ಧೆಯಲ್ಲಿ 5-5ರ ಅಂತರದ ಸಮಬಲ ಸಾಧಿಸಿದರು.