ಕೊನೆ ಕ್ಷಣದಲ್ಲಿ ಒಲಿದು ಬಂದ ಭಾಗ್ಯ; ವಿಶ್ವ ಬಾಕ್ಸಿಂಗ್‌ನಲ್ಲಿ ಪದಕ ಖಾತ್ರಿಪಡಿಸಿದ ಬಿಧೂರಿ

ಹ್ಯಾಮ್‌ಬರ್ಗ್: ಜರ್ಮನಿಯಲ್ಲಿ ಸಾಗುತ್ತಿರುವ ವಿಶ್ವ ಬಾಕ್ಸಿಂಗ್ ಚಾಂಪಿಯನ್‌ಶಿಪ್ಸ್‌ನಲ್ಲಿ ಭಾರತದ ಬಾಕ್ಸರ್ ಕನಿಷ್ಠ ಕಂಚಿನ ಪದಕವನ್ನು ಖಾತ್ರಿಪಡಿಸುವ ಮೂಲಕ ಗಮನಾರ್ಹ ಸಾಧನೆ ಮಾಡಿದ್ದಾರೆ .

ಈ ಮೂಲಕ ವಿಶ್ವ ಚಾಂಪಿಯನ್‌ಶಿಪ್ಸ್‌ ಇತಿಹಾಸದಲ್ಲಿ ಪದಕ ಗೆದ್ದಿರುವ ನಾಲ್ಕನೇ ಭಾರತೀಯ ಬಾಕ್ಸರ್ ಎನಿಸಿಕೊಂಡಿದ್ದಾರೆ.

ಮಂಗಳವಾರ ನಡೆದ ಸೆಮಿಫೈನಲ್ ಮುಖಾಮುಖಿಯಲ್ಲಿ ಟ್ಯುನೇಶಿಯಾದ ಬಿಲೆಲ್ ಮಮ್ಮದಿ ಮಣಿಸಿದ ಗೌರವ್ ಐತಿಹಾಸಿಕ ಸಾಧನೆ ಮಾಡಿದರು.

ಬಾಟಂವೇಟ್ 56 ಕೆ.ಜಿ ವಿಭಾಗದಲ್ಲಿ ವೈಲ್ಡ್ ಕಾರ್ಡ್ ಪಡೆದಿದ್ದ ಗೌರವ್, ವಿಶ್ವ ಚಾಂಪಿಯನ್‌ಶಿಪ್ಸ್‌ನಲ್ಲಿ ತಮ್ಮ ಚೊಚ್ಚಲ ಪ್ರಯತ್ನದಲ್ಲೇ ಪದಕ ಗೆದ್ದಿರುವ ಎರಡನೇ ಭಾರತೀಯ ಬಾಕ್ಸರ್ ಎಂದೆನಿಸಿಕೊಂಡಿದ್ದಾರೆ.

ಈ ಹಿಂದೆ 2011 ಆವೃತ್ತಿಯಲ್ಲಿ ವಿಕಾಸ್ ಕೃಷ್ಣನ್ ಸಹ ಇದೇ ಸಾಧನೆ ಮಾಡಿದ್ದರು. ಇನ್ನುಳಿದಂತೆ 2009ರಲ್ಲಿ ವಿಜೆಂದರ್ ಹಾಗೂ 2015ರಲ್ಲಿ ಶಿವ ತಾಪಾ ವಿಶ್ವ ಬಾಕ್ಸಿಂಗ್ ಚಾಂಪಿಯನ್‌ಶಿಪ್ಸ್‌ನಲ್ಲಿ ದೇಶಕ್ಕಾಗಿ ಪದಕ ಗೆದ್ದುಕೊಟ್ಟಿದ್ದರು.

ಮೇಲೆ ತಿಳಿಸಿದ ಎಲ್ಲ ಮೂವರು ಕಂಚಿನ ಪದಕ ಮಾತ್ರ ಗೆದ್ದಿದ್ದರು. ಹಾಗಾಗಿ ಗೌರವ್ ಐತಿಹಾಸಿಕ ಸಾಧನೆ ಮಾಡಲಿದ್ದಾರೆಯೇ ಎಂಬುದನ್ನು ಕಾದು ನೋಡಬೇಕಿದೆ.

ವೈಲ್ಡ್ ಕಾರ್ಡ್ ಎಂಟ್ರಿಯನ್ನು ಭೂತಾನ್ ನಿರಾಕರಿಸಿದ್ದರಿಂದ ಏಷ್ಯನ್ ಬಾಕ್ಸಿಂಗ್ ಕಾನ್ಫೇಡರೇಷನ್ ಈ ಅದೃಷ್ಟ ಅವಕಾಶವನ್ನು ಭಾರತದ ಬಿಧೂರಿಗೆ ನೀಡಿದ್ದರು.