ಜಿಯೋಗೆ ವೊಡಾಫೋನ್‌ ಸೆಡ್ಡು: ವಿದ್ಯಾರ್ಥಿಗಳಿಗೆ ನೀಡಿದ ಆಫರ್ ಏನು?

ಹೊಸದಿಲ್ಲಿ: ಟೆಲಿಕಾಂ ವಲಯದಲ್ಲಿ ಸಂಚಲನೆ ಮೂಡಿಸಿರುವ ರಿಲಯನ್ಸ್ ಜಿಯೋಗೆ ಸೆಡ್ಡು ಹೊಡೆಯಲು ವೊಡಾಫೋನ್ ರಣತಂತ್ರ ರೂಪಿಸಿದ್ದು, ವಿದ್ಯಾರ್ಥಿಗಳನ್ನು ಗುರಿಯಾಗಿಸಿಕೊಂಡು ನೂತನ ಆಫರ್‌ ಬಿಡುಗಡೆ ಮಾಡಿದೆ.

ದಿಲ್ಲಿಯ ಎನ್‌ಸಿಆರ್ ಪ್ರದೇಶದ ವಿದ್ಯಾರ್ಥಿಗಳಿಗೆ 'ವೊಡಾಫೋನ್ ಕ್ಯಾಂಪಸ್ ಸರ್ವೈವಲ್ ಕಿಟ್' ಘೋಷಣೆ ಮಾಡಿರುವ ವೊಡಾಫೋನ್, ಪ್ರಾರಂಭಿಕ 445 ರೂಪಾಯಿಗಳ ರಿಚಾರ್ಚ್ ಮೂಲಕ 84 ದಿನಗಳ ಅವಧಿಗೆ ಅನಿಯಮಿತ ಧ್ವನಿ ಕರೆ, ಪ್ರತಿದಿನ 1 ಜಿಬಿ 4ಜಿ ಡೇಟಾ, ಡಿಸ್ಕೌಂಟ್ ಕೂಪನ್ ಹಾಗೂ ಮೆಸೆಂಜರ್ ಬ್ಯಾಗ್ ನೀಡುತ್ತಿದೆ. ನಂತರ 352 ರೂಪಾಯಿಗಳ ರಿಚಾರ್ಚ್ ಮಾಡಿಸಿದರೆ ಸಾಕು ಮೇಲಿನ ಎಲ್ಲ ಕೊಡುಗೆಗಳನ್ನು ಪಡೆಯಬಹುದಾಗಿದೆ.

ಈ ಆಫರ್‌ ಸದ್ಯ ದಿಲ್ಲಿಯ ಎನ್‌ಸಿಆರ್ ಪ್ರದೇಶದ ವಿದ್ಯಾರ್ಥಿಗಳಿಗೆ ಮಾತ್ರ ಲಭ್ಯವಾಗುತ್ತಿದ್ದು, ಹಂತ ಹಂತವಾಗಿ ದೇಶದ ಎಲ್ಲ ಭಾಗದ ವಿದ್ಯಾರ್ಥಿಗಳಿಗೂ ಲಭ್ಯವಾಗಲಿದೆ ಎಂದು ಕಂಪೆನಿಯ ವಕ್ತಾರರು ತಿಳಿಸಿದ್ದಾರೆ.

ಈ ನೂತನ ಯೋಜನೆ ದೇಶಾದ್ಯಂತ ಲಭ್ಯವಾಗಲಿದೆ. ಆದರೆ, ಬೇರೆ ಬೇರೆ ಪ್ರದೇಶಗಳಲ್ಲಿ ರಿಚಾರ್ಜ್ ದರ ವಿಭಿನ್ನವಾಗಿರಲಿದೆ ಎಂದು ವೊಡಾಫೋನ್ ಇಂಡಿಯಾದ ಗ್ರಾಹಕ ಮಾರುಕಟ್ಟೆ ವಿಭಾಗದ ಮುಖ್ಯಸ್ಥ ಅರವಿಂದ್ ನೆವಟಿಯ ಹೇಳಿದ್ದಾರೆ.