ಪೋಸ್ಟ್‌ಪೇಡ್‌ ಗ್ರಾಹಕರಿಗೆ ಏರ್‌ಟೆಲ್ 30 ಜಿಬಿ ಉಚಿತ ಕೊಡುಗೆ

ಹೊಸದಿಲ್ಲಿ: ಭಾರತದ ಅತಿ ದೊಡ್ಡ ದೂರಸಂಪರ್ಕ ಸಂಸ್ಥೆಯಾಗಿರುವ ಭಾರ್ತಿ ಏರ್‌ಟೆಲ್‌, ತನ್ನ ಪೋಸ್ಟ್‌ಪೇಡ್‌ ಗ್ರಾಹಕರಿಗೆ 'ಏರ್‌ಟೆಲ್‌ ಸರ್ಪ್ರೈಸ್‌' ಕೊಡುಗೆಯ ಭಾಗವಾಗಿ 30 ಜಿಬಿವರೆಗೆ 4ಜಿ ಡೇಟಾ ಸೇವೆಯನ್ನು ಉಚಿತವಾಗಿ ನೀಡಲು ಪ್ರಾರಂಭಿಸಿದೆ.

ಏರ್‌ಟೆಲ್‌ನ ಪೋಸ್ಟ್‌ಪೇಡ್‌ ಗ್ರಾಹಕರು 'ಮೈ ಏರ್‌ಟೆಲ್‌ ಆ್ಯಪ್‌' ಮೂಲಕ ಈ ಸೌಲಭ್ಯವನ್ನು ಪಡೆಯಬಹುದಾಗಿದೆ. 'ಮೈ ಏರ್‌ಟೆಲ್‌ ಆ್ಯಪ್‌'ನಲ್ಲಿ ಗೋಚರಿಸುವ 'ಕ್ಲೇಮ್‌ ಫ್ರೀ ಡೇಟಾ' ಎಂಬ ಬ್ಯಾನರ್‌ ಮೇಲೆ ಕ್ಲಿಕ್ಕಿಸುವ ಮೂಲಕ 30 ಜಿಬಿವರೆಗೆ ಉಚಿತ 4ಜಿ ಡೇಟಾ ಸೇವೆಯನ್ನು ಪೋಸ್ಟ್‌ಪೇಡ್‌ ಗ್ರಾಹಕರು ಪಡೆಯಬಹುದು.

ಈ ಕುರಿತು ಮಾತನಾಡಿದ ಭಾರ್ತಿ ಏರ್‌ಟೆಲ್‌ನ ಸಿಇಒ ಗೋಪಾಲ್‌ ವಿಠಲ್‌, ' ಇದೀಗ ಏರ್‌ಟೆಲ್‌ ಭಾರತದಲ್ಲಿಯೇ ವೇಗದ ಮೊಬೈಲ್‌ ನೆಟ್‌ವರ್ಕ್‌ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಇದಕ್ಕಾಗಿ ನಮ್ಮ ಗ್ರಾಹಕರಿಗೆ ಬರೀ ಬಾಯಿ ಮಾತಲ್ಲಿ ಧನ್ಯವಾದ ಹೇಳುವುದು ಸರಿಯಲ್ಲ ಎಂದು ಭಾವಿಸಿದ ನಾವು, ಏರ್‌ಟೆಲ್‌ ಸರ್ಪ್ರೈಸ್‌ ಮೂಲಕ ಪೋಸ್ಟ್‌ಪೇಡ್‌ ಗ್ರಾಕರಿಗೆ ವಿಶೇಷ ಕೊಡುಗೆ ನೀಡಲು ಮುಂದಾಗಿದ್ದೇವೆ. ಗ್ರಾಹಕರು ಇದರ ಲಾಭ ಪಡೆದುಕೊಳ್ಳಬೇಕು' ಎಂದು ಹೇಳಿದರು.

ಇತ್ತೀಚೆಗಷ್ಟೇ ಏರ್‌ಟೆಲ್‌ ಸಂಸ್ಥೆ ರಿಲಯನ್ಸ್‌ ಜಿಯೋಗೆ ಪೈಪೋಟಿ ಎಂಬಂತೆ ಪ್ರತಿದಿನಕ್ಕೆ 1 ಜಿಬಿ (345 ರೂ. ಪ್ರಿಪೇಡ್‌ ಪ್ಲ್ಯಾನ್‌, 500 ಎಮ್‌ಬಿ ಹಗಲು, 500 ಎಮ್‌ಬಿ ರಾತ್ರಿ) 4ಜಿ ಡೇಟಾ ಮತ್ತು ಅನಿಯಮಿತ ಕರೆಗಳ ಸೌಲಭ್ಯವನ್ನು ನೀಡಿ ಎಲ್ಲರ ಗಮನ ಸೆಳೆದಿತ್ತು. ಇದೀಗ ಪೋಸ್ಟ್‌ಪೇಡ್‌ ಗ್ರಾಹಕರಿಗೂ ವಿಶಿಷ್ಟ ಸೌಲಭ್ಯ ನೀಡಲು ಮುಂದಾಗಿದೆ.