ಸದ್ಯದಲ್ಲೇ, ಭೀಮ್‌ ಆ್ಯಪ್‌ನಿಂದ ಆಧಾರ್‌ ಪೇ

ಹೊಸದಿಲ್ಲಿ: ಈ ತಿಂಗಳೊಳಗೆ ಬೆರಳಚ್ಚನ್ನು ಬಳಸಿ ಹಣಕಾಸಿನ ವಹಿವಾಟು ನಡೆಸಲು ಸಾಧ್ಯವಾಗುವಂಥ ಆಧಾರ್‌ ಪಾವತಿಗೆ ಅನುವುಮಾಡಿಕೊಡುವಂತೆ ಎಲ್ಲ ಬ್ಯಾಂಕ್‌ಗಳಿಗೆ ಕೇಂದ್ರ ಸೂಚನೆ ನೀಡಿದೆ.

ಅದೇ ರೀತಿ, ಮಾರ್ಚ್‌ 31ರೊಳಗೆ ಭೀಮ್‌ ಆ್ಯಪ್‌ ಮೂಲಕ ಆಧಾರ್‌ ಪೇಗೆ ಎಲ್ಲ ಬ್ಯಾಂಕ್‌ಗಳು ಅನುವು ಮಾಡಿಕೊಡಬೇಕಿದೆ. ಎಸ್‌ಬಿಐ ಹಾಗೂ ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ವಾರಾಂತ್ಯದೊಳಗೆ ಈ ಸೌಲಭ್ಯ ನೀಡಬೇಕಿದೆ.

ಭೀಮ್‌ ಆ್ಯಪ್‌ನಲ್ಲಿನ ಹೊಸ ಆಯ್ಕೆಯಿಂದ, 12 ಅಂಕಿಗಳ ಆಧಾರ್‌ ಸಂಖ್ಯೆಯನ್ನು ದಾಖಲಿಸಿ ಸುಲಭವಾಗಿ ಪಾವತಿ ಮಾಡಬಹುದಾಗಿದೆ. ಗ್ರಾಮೀಣ ಜನರು, ಅನಕ್ಷರಸ್ಥರು ಹಾಗೂ ಬಡವರು- ಆನ್‌ಲೈನ್‌ ವಹಿವಾಟು ನಡೆಸಲು ಈ ಕ್ರಮಗಳು ಉತ್ತೇಜಕವಾಗಿವೆ.

ಪಾಸ್‌ವರ್ಡ್‌ ಹಾಗೂ ಪಿನ್‌ ನಮೂದಿಸಬೇಕಾದ ಆನ್‌ ಲೈನ್‌ ಹಾಗೂ ಕಾರ್ಡ್‌ ವಹಿವಾಟಿಗೆ, ಆಧಾರ್‌ ಆಧರಿತ ಪಾವತಿ ವ್ಯವಸ್ಥೆ (ಎಇಪಿಎಸ್‌) ಪರ್ಯಾಯವಾಗಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ವ್ಯಾಪಾರಿ ಬಳಿ ಆಧಾರ್‌ ಸಂಖ್ಯೆ, ಬ್ಯಾಂಕ್‌ ಹೆಸರು ಹೇಳಿ, ಬೆರಳಚ್ಚು ದಾಖಲಿಸಿದರೆ ಗ್ರಾಹಕರು ನಗದು ರಹಿತ ವಹಿವಾಟು ನಡೆಸಬಹುದು. ಆದರೆ, ಈ ಸೇವೆಯನ್ನು ಬಳಸಲು ಗ್ರಾಹಕರು ಮೊದಲು ತಮ್ಮ ಆಧಾರ್‌ ಸಂಖ್ಯೆಯನ್ನು ಬ್ಯಾಂಕ್‌ ಖಾತೆ ಜತೆ ಜೋಡಣೆ ಮಾಡಬೇಕು.