ಮೊಬೈಲಿನಲ್ಲಿ ಕನ್ನಡ ಬರೆಯೋದು ಕಷ್ಟವೇ? ಹೇಳಿಬಿಡಿ!

ಬೆಂಗಳೂರು: ಮೊಬೈಲಿನಲ್ಲಿ ಕನ್ನಡ ಬರೆಯೋದು ಕಷ್ಟ ಅಂದುಕೊಳ್ಳುವವರಿಗೆ ಇದೋ ಇಲ್ಲಿದೆ ಹೊಸ ಕೀಬೋರ್ಡ್ ಆ್ಯಪ್. ಕನ್ನಡದಲ್ಲಿ ಸಂದೇಶ ಕಳುಹಿಸಬೇಕಿದ್ದರೆ, ನಾವೇನೂ ಟೈಪ್ ಮಾಡಬೇಕಿಲ್ಲ, ಬದಲಾಗಿ, ನಿಮ್ಮ ಮೊಬೈಲಿಗೆ ಹೇಳಿದರಾಯಿತು.

ಇದು ಹೇಗೆ? ಲಿಪಿಕಾರ್ ಕನ್ನಡ ಕೀಬೋರ್ಡ್ ಆ್ಯಪ್ ಅನ್ನು ಗೂಗಲ್ ಪ್ಲೇ ಸ್ಟೋರ್‌ನಿಂದ ಡೌನ್‌ಲೋಡ್ ಮಾಡಿಕೊಂಡು, ಅದನ್ನು ಎನೇಬಲ್ ಮಾಡಿಕೊಂಡು ಬಿಡಿ. ಮತ್ತು ಈ ಕೀಬೋರ್ಡನ್ನೇ ನಿಮ್ಮ ಡೀಫಾಲ್ಟ್ ಕೀಬೋರ್ಡ್ ಆಗಿ ಮಾಡಿಕೊಳ್ಳಿ.

ಯಾವುದೇ ಸಂದೇಶ ಕಳುಹಿಸಬೇಕಿದ್ದರೆ (ವಾಟ್ಸಾಪ್, ಎಸ್ಸೆಮ್ಮೆಸ್) ಅಥವಾ ಫೇಸ್‌ಬುಕ್, ಟ್ವಿಟರಿಗೆ ಕನ್ನಡದಲ್ಲಿ ಪೋಸ್ಟ್ ಮಾಡಬೇಕಿದ್ದರೆ ಕೀಬೋರ್ಡ್ ತೆರೆದು, ಬಲ ಮೇಲ್ಭಾಗದಲ್ಲಿರುವ ಮೈಕ್ ಬಟನ್ ಒತ್ತಿದರಾಯಿತು. ಬಳಿಕ ಇಂಗ್ಲಿಷ್ ಅಥವಾ ಕನ್ನಡ ಆಯ್ಕೆ ಮಾಡಿಕೊಂಡರೆ, ನೀವು ಹೇಳಿದ್ದು ಕೀಬೋರ್ಡಲ್ಲಿ ಕಾಣಿಸುತ್ತದೆ. ತಿದ್ದುಪಡಿ ಇದ್ದರೆ ಮಾಡಿ, ಕಳುಹಿಸಿಬಿಡಿ ಅಥವಾ ಪೋಸ್ಟ್ ಮಾಡಿಬಿಡಿ.

ಆದರೆ, ನೆನಪಿಡಿ: ಸದ್ಯಕ್ಕೆ ಕೇವಲ 14 ಸೆಕೆಂಡುಗಳ ಅವಧಿಯ ವಾಕ್ಯವನ್ನು ಮಾತ್ರ ನೀವು ಪೋಸ್ಟ್ ಮಾಡಬಹುದು.

ಇದು ಸ್ಪೀಚ್ ಟು ಟೆಕ್ಸ್ಟ್ (STT) ಅಂದರೆ ಮಾತಿನಿಂದ ಪಠ್ಯಕ್ಕೆ ಪರಿವರ್ತನೆಯಾಗಬಲ್ಲ ತಂತ್ರಜ್ಞಾನ. ಕನ್ನಡವನ್ನು ಬಹುತೇಕ ಸರಿಯಾಗಿ ಗುರುತಿಸುತ್ತದೆ. ಆಂಡ್ರಾಯ್ಡ್ ಸಾಧನಗಳಿಗೆ ಈ ಆ್ಯಪ್ ಉಚಿತವಾಗಿ ಲಭ್ಯ.